يا ست الكل يا سمرا

[Joker]

بقلمي...

بروح واّجي
وصورتك ماشية قدامي
بشوفها حتي في منامي
ومالية عليا أحلامي
يا ست الكل يا سمرا
دا نور البدر من نورك
وييجي النجم ويزورك
يلاقي شكله صار ضلمة
في ثانية لو فعد جارك
يا ست الكل يا سمرا
يا روح قلبي ونور عيني
يا سارية في شراييني
ده حبك هو تكويني
وأصل الحب من قلبك
يا ست الكل يا سمرا
يا بلدي لو وقف ضدك
ملوك الدنيا مين قدك
كفاية في التاريخ جندك
يقول للدنيا مين انتي
يا ست الكل يا سمرا
ترابك مش تراب عادي
فديته بعمري وفؤادي
يهون العمر شئ عادي
ولا يهون شبر من أرضك
يا ست الكل يا سمرا
يا ست الكل يا بلدي

[M.Hegazy]

جميلة قوي يا دكتور .. و كلماتها بسيطة و معبرة .. سهل الواحد يغنيها .. حلوة ما شاء الله

تقبل تحياتي .. و للأمام دائما

[Al-Shaimaa]

معاني حلوة اوي تدل على الوطنية والآنتماء واللي بدأنا نفتقد تواجدهم في معظم الكتابات الآونة الأخيرة
وكمان أسلوب سهل أوي

وفقك الله
وتقبل مروري

[chocolata]

جميله جدا وبسيطه ومعبرة بسلاسه عن شعور مواطن بسيط نحو بلده

انا حاولت اغنيها فعلا
بس محتاجه حد يلحنهالى
سياقها يشبه الاغنيه فعلا

لا فعلا اسلوبها بسيط بيفكرنى بالابنودى فى كلماته القليله اللى اعرفها يعنى
اسلوب بسيط اوى وكلمات سهله

تسلم الايدى ياجوكر

[dr-aya]

حلوة قوى بجد منتهى البساطة و منتهى الروعة
تسلم إيدك يا دوك

[NonY]

جميله جدا وبسيطه ومعبرة بسلاسه عن شعور مواطن بسيط نحو بلده

انا حاولت اغنيها فعلا
بس محتاجه حد يلحنهالى
سياقها يشبه الاغنيه فعلا

لا فعلا اسلوبها بسيط بيفكرنى بالابنودى فى كلماته القليله اللى اعرفها يعنى
اسلوب بسيط اوى وكلمات سهله

تسلم الايدى ياجوكر

انا بمووووت فى تعليقاتك ع الحاجات الأدبية
بجد بحب تحليلك جدا
استمرى ..

----------------------------

موضوع جامد يا دووووك

[صاحبة القلم الحائر]

كلمات جميلة يا دكتور تدل انك بتحب بلدك بجد ربنا يوفقك

[د///*مطحونة*\\\]

انا حاولت اغنيها فعلا
بس محتاجه حد يلحنهالى

تم
اللحن عندى والتوزيع كمان
-------
جميلة جدا يادكتور والاحساس فيها حلو اوى
وفعلا زى ماكلهم قالوا الاسلوب سهل ويوصل للقلب بسرعة
انا تقريبا حفظتها

شكرا لحضرتك
تحياتى عالقصيدة الرائعة
او نقول الاغنية الرائعة

[Joker]

والله يا جماعة الواحد مش عارف يقول ايه ويرد علي كلامكم الرائع ده بإيه
بشكر جدا كل اللي شاركوا في الموضوع
وبقترح بقي نعمل مسابقة في التلحين عشان نشوف المواهب عشان د/شيكولاتة متزعلش وعشان حجازي كمان يغنيها ههههههه
ومتقلقش يا د/مشمش الوطنية والانتماء موجودين بس مستخبيين وكل واحد بيعبر عنهم بطريقة شكل
د/ مطحونة كده انتي وفرتي علينا موضوع الملحن والموزع فاضل بقي المغني ههههههه عايزين نعمل بيزنس بقي وكل اللي يشارك في الموضوع هنا ياخد نسبة يعني اتنين تلاتة جنيه كده كفاية