هل حدث لكم ذلك..؟!!!!

[محمد فهمي]

بإختصار ده اللي حدث ليا في يوم الإنتخاب....اللي أنا أُتهموني بالتزوير...ولو عايزين يطلعوني خاين...ممكن..!!
أنا دخلت وكلي تفائل(صوتك أمانة)بالرغم من الزحمة والخنقة.. وأنا داخل من الباب ..الراجل اللي واقف علي الباب تقريباً غفير..زقني جوه كأنه بيرمي كيس زبالة..مش مشكلة...المهم واحد شاف بطاقتي ..وبص لي كده نظرة غريبة ...قولت في نفسي (انت هتكولني ولا إيه..أنا بريييييييء..علي رأي اللمبي )
شاف اسمي ورجع تاني بص لي بصة غريبة..من الآخر بيقولي في النظرة دي انت شكلك كده مزور...!!!!!!!
ده مش اسمك...ودي مش صورتك اللي في البطاقة..(صورتي دي من أيام الثانوي علي فكرة)
قولت له ازاي..دا اسمي زي اللي في الكشف..
فقالي لأ ده فتحي وعندي في الكشف فهمي..!!والله شككني في نفسي وشكله كده عاوزني أمشي..!
والصورة.. علشان من أيام ثانوي..مش واضحة قوي.والله أنا ده....ده أنا..جننوني منهم لله....(هوا أنا مش عارفني ولا إيه..ولاأنا مش أنا)...
المهم في الآخر لولا ان قولتله اني في صيدلة ساعة ماسألني ..وكمان فيه واحد دخل وكان عارفني كان زمانوا قالي (اطلع بره ياتيييييييييت) والله كنت عايز أعيت
بس هوا قاله ..ياعم يعني راجل دكتور وشكله محترم كده هيكذب..!! (غريبة أوي يكذب دي يعني أجيب ايه تاني غير البطاقة علشان يصدقوا)...مع أني عارف اللي هم عارفين..والله ماعدتش فاهم حاجة..!!)..
في النهاية وافق يديلي الورق..وساعة لما لقاني اتأخرت ..واحد منهم قالي عاوز تحط لمين..؟ قولت له كذا وكذا وعلم لي هوا علي الورق.وأنا واقف مندهش..(ياسلام علي المساعدة)
ملحوظة أنا مابصمتش..يالا بقه مش مهم هوا حد سألني..

لو واحد عنده قصة ولا حاجة يقول..وآسف علي الإطالة

[dr.noody]

بصراحة كانوا محترمين والجو طبيعى جدااااااااا

[BonaBart]

دا اقل واجب اللى حصل معاك

تلاقى كل الناس اللى ليها لازمة واللى مالهش بيتكلموا وبيزعقوا
كانهم هم المسئولين عن سير العملية الانتخابية العشوائية

فى ناس لما بتدخل بيسلمهم ورقة متعلم عليها ؟!!!!

يعنى بيسرق صوتك أمام عينك
وانت رايح فقط لمجرد انك تضع الورقة داخل الصندوق ؟!!!

أو ياخد البطاقة ويرجعهالك
ويغمز لك بعينه كدا كانه عمل الواجب بدالك ؟!!
ويقولك هقفلهالك ؟!!

وكلاء المرشحين قاعدين ف اللجان لاصطياد الاصوات ؟!!

واقفين ورا الناخب تشويش باسماء الرموز والاستعجال
وبيشد الورقة من ورا الستارة اللى مالهاش لازمة ؟!!!

يوووووووووم عطلة وبهدلة بكل المقاييس
وكله ف الفااااااااضى

أنا ماكملتش 10 دقايق ف المكان الفظيع دا

مع انه كان مدرستى الاعدادية
أيام عز وأمجاد ليا

ودى مشاركة ليا ف موضوع تانى

يخربييييييييييت أم الفوضى والعشوائية
والعطلة والبهدلة اللى الشعب الغلبان دا فيها

أنا أساسا عمرى ماكنت هشارك ف المهزلة دى
بس رحت من باب انى اشوف ايه اللى بيحصل

بجد تعبت من منظر العشوائية والفوضى
وف الاخر كل دا ف الفاااااااااااااضى

مشكلتى انى رحت متأخر بعد المغرب بعد الامتحان
يعنى وكيل كل مرشح بيحاول يكمل عدد الاصوات

الناس رايحة تجامل وخلاص
واللى بيدلى بصوته بيقف يتفرج
الزحمة فظيعة ...الشباب اللى مالوش لازمة قاعد طالع نازل
الناس بتدخل مقر الانتخاب ....مابتطلعش تانى

بالنسبة بقى انى قلت الكلام دا هنا

انى بقترح فكرة جايز تكون موجودة مع وقف التنفيذ


فكرة البوابة الالكترونية

ليه الانتخابات وأى استفتاءات تبقى على النت بكل سلاسة ونزاهة ؟!!!

يعنى مثلا ان كل مواطن مصرى يبقى له أكاونت (حساب بريدى)
مسجل به كل بياناته
باسم وباسورد بمعرفة المواطن

بحيث انه يكون كسجل للمواطن دا
أو حافظة لاوراقه ومستنداته وكل بياناته وسجله الاجرامى حتى

ويستخدمه للادلاء فى اى استفتاء
التصويت ف اى انتخابات

أنا عارف ان الموضوع دا هيحتاج مجهود جبار ف بدايته
لتنظيمه ورفعه على النت
والتاكد من البيانات
وقبل كدا توعية البنى أدمين المصريين
حد يقولى ناس كتير كبار مايعرفوش يستخدموا الالة الحاسبة حتى
أنا واثق ان بعد 10_15 سنوات
الجيل الموجود كله هيبقى علاقته بالنت أكبر من كدا بكتير

ليه بقى مانستعدش حاليا ونعمل تجارب للموضوع

وأكيد هنستفيد بالحساب البريدى للمواطن دا
فى حاجات كتيييييييييييير جدااااا سواء مضطرين ليها حاليا
أو هنفكر نستفيد بيه بعد كدا

كمان الموضوع دا
هيقضى على معظممممم الروتينيات ف البلد

الموضوع عايز شوية تنظيم وتفكير
وناس متخصصة ف المجال تفكر ف الفايدة القصوى من الموضوع دا

[BonaBart]

دى بردو مشاركة تانية ف نفس الموضوع

حبيت انقلهم هنا لانهم يخصوا الموضوع هنا
اكتر من هناك

أكيد المواطن اللى عنده 40 سنة دا او اكتر
عنده ابنه او ابن اخوه او ابن جاره حتى بيعرف يدخل النت مثلا
أو حتى الشخص اللى ف السايبر

ولنا فى تجربة ملف تنسيق الجامعات تجربة !!

لما كان عبارة عن شبابيك وطوابيييييير
واستيكرات وبهدلة وروتين وزحمة وموظفين تعبانين

لما اتغير وبقى الكترونى
ومسموح لك بوقت تقدر تغير رغباتك فيه
بعده لا تستطيع التعديل

بالظبط نفس الفكرة هتكون ف الانتخابات
عندك فرصة الـ 12 ساعة بتوع الانتخابات بالظبط
تقدر تعدل
كل واحد هيدلى بصوته وهو ف بيته معزز مكرم
بدون ضغط جماهيرى او عطلة لنقل وفرز الاصوات

وتعطيل هيئات كاملة وموظفين
لادارة العملية الانتخابية

ومش هنحتاج لاشراف قضائى

طب فى نقطة كمان جات على بالى مهمة ومفيييدة جداااا

المرشح اللى بنختاره لمجلس الشعب
اكيد مهمته اثارة القضايا الللى بتهم المواطنين
أو الاقرار باى قرارات جديدة والموافقة على اى تعديلات قانونية او تشريعية جديدة

ليه بقى بدل ماناخد راى الـ 500 عضو بالنيابة عن الشعب
طب ليه مانشركش الشعب كاملا ف الاستفتاء

ولو اتجاه استفتاء الجماهيرى ف نفس اتجاه الاعضاء كان بها
لو فى اختلافات يبقى ينظر ف الامر

لضمااااان ان دا صوت الاغلبية فعلا

نقطة كمان
ليه مانستفيدش بالاكاونت دا
انى اقدر ابعت شكوتى او اقتراحى بالنسبة لموضوع معين ؟!!!
لجهة متخصصة لقراءة وتفنـيد الشكاوى والاقترااحات

لو فكرنا ف الموضوع هنلاقى استفادات كتيرة بطريقة هائلة

[متفائل]

الحمد لله انتخبت قبل كده فى الشورى من أشهر قليلة

و المرة دى روحت اللجنة على طول و الأمور مانت ماشية طبيعية

لكن من متابعتى للأخبار وجدت عجب العجاب

+ YouTube Video

[ameer]

هي النتائج بانت ولا لسه ؟
اصل الموضوع كان ماشي طبيعي امبارح طول اليوم ومفيش امن خالص عندنا ولا حتي عسكري مرور والناس مبسطوه وبتدخل تدي صوتها بسهوله وبعدين فجأه نقلوا الفرز لمكان معزول تماما حتي اسمه"المستعمره " وبعدين نقلوها لمكان تاني معزول اكتر من الاولاني اسمه" الجزاير"
وفجاه بالليل قلبت بضرب رصاص حي ورشاشات طلعت عيني عينك كده والله واعلم ايه اللي بيحصل هناك دلوقتي

[عبير الجنه]

بسم الله الرحمن الرحيم
صراحه عندنا الاحوال مكنتش طبيعيه بالمره تقريبا كل ربع ساعه كانت فيه خناقات وضرب نار عمال على بطال بس فيه حاجه لاحظتها هيا كل مره بتحصل فى الانتخابات بس الدوره دى زايده شويتين وهيا ادراج عدد كبير جدا من اسماء المتوفين فى الكشوف الانتخابيه
يعنى تزوير على الملأ والشوارع متقفله بطريقه غير عاديه
والله مافيش كلام يوصف اللى حصل يوم لاينسى
ربنا يستر

[meramar]

ادراج اسماء المتوفين دى مهزله والله
ناس راحت لقت اسماء اخواتها اللى متوفيين من عشرين سنه
وواحد لقى اسم بنته اللى ماتت وعندها سنتين

الحاجه اللى بجد تموت من الضحك..ابن خالتى راح ينتخب دخلوا معاه عسكرى ورا الستاره
طيب لازمتها ايه الستاره ؟..مش عارفه
وخلاه يعلم على مرشح الحزب الوطنى!
انا مالييش حق التصويت لانى تحت السن لسه ..بس نزلت اتفرجت والله
شوفت مهازل ..الناس اللى جايبينهم بالميكروباصات كل واحد ماسك كيس فيه عصير وساندويتشات
وبيبسى..اكيد كان مع السندوتشات طحينه زى اوربا والدول المتقدمه

الناس بايعه صوتها بسندوتش وكانزايه ياعااالم ..ياريتها بحاجه تستاااهل
والتانى مرشح الحزب بردو اللى بيوزع شربات احتفالا بالفوز
والمنقبات اللى منعوهم من دخول اللجان بالبلطجه
انا مستعجله اللوقتى بس هارجع اكمل ا ن شاء الله !

[Dr/HULK]

هو محدش فيكم خد فلوس من الحكاية دى

انا سمعت ان الصوت وصل ل150 جنيه

وفيه عرض للى يجيب معاه مجموعة بياخدله نفحاية جامدة

[NeScaFE]

عندنا بقى المرشح خرج البلطجية من السجون وكل واحد شايل بقى اللى شايله

واى حد كان بيروح ينتخب المرشح قصاده كان بيتضرب وبيتبهدل

يعنى اللجان زى ماتقولو مخصصة لانتخاب مرشح واحد فقط واللى هيقول

انا اهو ملوش دية

طبعا كان فى حالات اصابة متعددة

ده غير ان المرشح ده اتشاكل مع خصمه واوصى اتباعه بالهجوم

عليه اما بالكلام او بالمطاوى ..

حاجة اخر مهزلة والله..مهو الزمن ده بقى زمن البلطجة والدراع