ماذا تفعل لو كنت مكاني؟؟؟؟

[ahmed helmy]

طبعا الموضوع بدأ من الساعه 11 ونص
واذ بي محدثا نفسي
ياد يا احمد قوم نام بدري النهارده
عندك امتحان مدسنال الساعه 10
ولازم تصحي ع الاقل الساعه 8 ونص
عشان تعرف تشتغل بدقه وتركيز وتطلع نتايجك المعهوده
لان شغل المدسنال ده بيني وبينكم عايز حنكه ومهاره
وبالفعل استجابت نفسي للنصيحه وقومت انام
قولت ايه بقي انام في البلكونه (ليه بقي)
عشان انا نومي تقيل ويمكن تروح عليا نومه
وفي البلكونه هصحي اما من البرد او الضوء او الصوت
المهم هي ساعه وحسيت ان البرد بياكل في عظمي
قولت لا مفيش مفر
انا اقوم انام في الاوضه احسن ما اموت من البرد
وكده كده يبقي مفيش امتحان
دخلت انام في الاوضه اقعد ساعه مفيش فايده
قولت يبقي السبب في ايه؟؟؟؟؟؟
البطانيه مش مظبوطه فقولت اعدلها
وطبعا خد بقي في الفتره دي تقلبات ايه بقي
نمت علي جميع الاوضاع
مكنش ناقص غير اني انام علي دماغي
المهم طبعا قومت ابص في الساعه لقيتها 2 ونص
قولت الله يخربيت الامتحان علي بيت الكليه علي بيت النوم
انا اقوم اتعشي تاني واقعد ع النت والنوم يبقي يجي براحته
السؤال بقي تعمل ايه لو كنت مكاني؟؟؟؟؟؟؟؟
وايه هيكون شعورك؟؟؟؟؟؟؟؟؟؟
وهل حصلك الموقف ده؟؟؟؟؟؟؟؟؟؟؟؟

[ganaa]

انا لو كنت مكانك كنت لبست ونزلت رحت الكلية مشى من بلدنا لحد لما النهار يطلع و على فكرة الحكاية دى منتشرة عندى كتير اوى هتلاقيك بس كنت نايم كتير فى اليوم اللى قبله وربنا يوفقك يا دكتور فى الامتحان

[LOVELY BIRD]

على فكره الموقف ده بيحصل كتيييييييييييييييير والمشكله انك مش بيكون لك مزاج تفتح اي ورق تاني خلاااااااااااااااص فالحل بقى انك تدعي ربنا شويه انه يخليك تفتكر اللي زاكرته
ههههههههههههههههه

[yojeena]

ههههههه
زي ما اكون انا اللي بتكلم
اول مره الاقي حد زيي بالضبط
فكرتني باللذي مضي كانت اياااام .....
بس اللي اعرفه ان الشباب دايما اعصابهم بارده ما اقصدش حاجه والله يعني مش بيقلقوا بسرعه زي البنات
اكيد يا دكتور ما قرأتش حتي السكشن بيقول ايه

[Dr Anonymous]

انا بيحصلى كتير
خد اى حاجه تخليك تنام واخلص
بس انت من امتى بتقلق يا حلمى
مش عوايدك خالص
!!!!!!!!!

[شمس مشرقة]

واضح ان كل اللى بيدخل الكليه دى بيحصله كده
انا زيك كده يا دكتور بفضل ليلة الامتحان اتحايل ع النوم عشان ييجى ما بيجيش خالص بس انا ما بقومش بفضل لابده مكانى فى السرير واللى يغيظ بقا ان النوم ما بيجيش ولا يحلى الا قبل المعاد اللى المفروض كنت اصحى فيه بساعه كده او نص ساعه اقوم انا بقا اعند وانام الساعه دى وكله بييجى على دماغى فى الاخر

[M.32L]

هاقوم اقعد على النت واكلم حد من اصحابى لحد الصبح
وربنا يسهلها بقى فى الامتحان

[ahmed helmy]

يا جماعه ده المشكله ان انا مكنتش قلقان
لانه ببساطه امتحان عملي عباره عن تيتراشن
يعني الخطوات هتجي مكتوبه ومش محتاجه مذاكره
المشكله ان انا خلاص بقي عايز انام وتاقلمت علي كده
لا والمشكله افتح الايميل ان الاقي اي بني ادم فاتح مفيش
والنوم بقي ميجيش الا قبل الفجر بنص ساعه قومت معاند معاه
وقولت والله منا نايم الا لما اصلي
بس واضح ان دي مشكله عامه في كليه الصيدله
وربنا يستر بقي في الامتحان وتكون النتايج اللي طلعتهامظبوطه
لان مفيش حد نهائي طلع نتايج زيي ولا حتي قريبه مني

[white light]

دى مشكله ازليه يعانى منها طلبه كليه الصيدله
بتحصلى كتير ايام امتحانات التيرم
النوم مبيجيش خالص مع انى بكون قايمه من بدرى
بس بفضل فى مكانى اتحايل على النوم يجى

[سنجانا]

ان شاء الله النتايج هتكون مظبوطة وعلى فكرة انا عندى نفس المشكلة بس من غير امتحانات مش بنام الاخميس وجمعة"اصلى ساكنة مدينة وبنام حوالى 3 ساعات بس "