هل ده بقي العادى؟

[toqaa]

الواحد بجد فالحياة العملية دى ياما بيشوف العجب.
استلمت العمل فصيدلية موقعها جيد يوم السبت الماضي(اول امبارح بس)وعلي الفور توالت علي الصدمات من اول يوم
1-انى مسئولة عن دفاتر الصيدلية التي لا تعد ولا تحصي.لماذا لان ببساطة مفيش كمبيوتر عندنا.ايشي دفتر نواقص ودفتر مبيعات وكام دفتر شكك .امال كل واحد ليه حسابه الخاص وسجل يا معلم تحس انك محاسب مش صيدلي وكل شوية تقعد تعد فالفلوس وتشوفها مظبوطة ولا لأ.قلت ماشي وماله اهي خبرة.
2-انى واقفة لوحدى من اول يوم (متسالنيش ازاي)ولبخ مع نفسك بقي(مع العلم ده اول شغل ليا)قلت مااااشي اهى خبرة وربنا هيستر ان شاء الله وطبعا بضطر اتصل بالدكتور مراااااااااااااااات فاليوم اسأله.
3-الدكتور طلب منى اعمل جرد للادوية كلها
طب ازااااااااااي طيب. دا اول يوم يا اخوانا طبعا قلت لا لازم وقفة فطلبت مساعدة والدكتور وافق.
4-اما اربعة بقي دى اللي حكايتها حكاية واللي اصلا عملت عشانها الموضوع اول يوم دخلت فيه الصيدلية لقيتها مردومة تراب لان اللي كانو واقفين مش مهتميين بيها فاشتكيت للدكتور خصوصا انه عايزنى اعمل جرد طب اعمل ازاي والادوية مردومة تراب قام قالي(العامل بينضف الارض والسقف بس اما الارفف دي المفروض انها مسئوليتي)نعممممممممممممممممممممم هي دى اخرتها بعد خمس سنين صيدلة تبقي اخرتها انضف الصيدلية وحتى مش انا اللي خليتها مش نضيفة.هو مش العادى انه فيه عامل يا اخوانا ولا انك بتبقي واقف بطولك كدا تعمل كل حاجة بنفسك.طبعا مرضيتش بالوضع ده واستغربت جداااااااااااااا انه طلب منى كدة ولسة مش مصدقة نفسي.
اكيد طولت عليكم بس حبيت افضفض لكم مأساتى.
مستنية ردودكم.

[diamond]

رلنا يعينك يا دكتوره
اما بالنسبه لحكايه تنفيض الرفوف دي طبعا مسؤوليه العامل اللي في الصيدليه واكيد طبعا مستحيل تعملي الجرد لوحدك

[yojeena]

نعــــــــــــــم!!!!!!
ازاي انتي ما قولتيلوش ان نظاااااافة الصيدليه مش وظيفتي دي وظيفة عامل النظافة
لا انصحك تاخدي موقف من الاول عشان متبقيش انتي المتلامه في الاخر
اظن انه كفايه كل المهام اللي انتي موكله بيها
انتي عارفه انا لسه ما اشتغلتش و مطبعا مش عاجبني الوضع دا
بس عندنا نادرا ما تلاقي صيدليه عاوزه صيدلي بيسترخصوا
عادي جدا ان الصيدلي يدرب بنت و هيا اللي تقوم بكله بتوصف للناس و تاخد الصيدليه فمين بالمره
حاله يرثي لها
بس انتي عارفه نفس الموال اللي عندك دا عندنا صورة بالكربون التراب و الدفاتر و انتي اللي تحاسبي المريض
و تكتبي النواقص و اللي صرفتيه و ترتبي الجديد دا العادي بتاعنا هههههههههه
يعني مش انتي لوحدك اللي حالتك صعبه في بلاد زيكم
بس انتي عارفه المسئوليه الملقاه عليكي هتعلمك و بأسرع مما تتخيلي
ما تحطيش في اعتقادك ان الشغل ضغط و بس حاولي تستمتعي بحاجه انتي بتحبيها
انا عن نفسي بحب ترتيب الادويه جدااااااااا
لدرجة اني عندي استعداد اعمل جرد و ارتب كله من جديد علي مزاجي

عاوزه اقولك ان ما فيش حاجه سهلة و لولا التعب مش هتعرفي حلاوة النجاح
ربنا يوفقك في شغلك و تبقي قد المسئوليه

[A H M E D]

نفس الوضع بالظبط عندنا

لكن الفرق أن الصيدلية بتاعتنا

فعادي لما بجرد وانضف التراب واكنس وامسح مفيش مشكلة

بالنسبة ليكي

لازم يكون فيه وقفة من أول الشغل يا دكتورة
وان مسئوليتك تنحصر في الدوا -كتابة النواقص - الايراد- الشكك

مينفعش تنضيف ومينفعش تدي حقن


الجرد طبعا لازم تعمليه ودا بيخليك تحفظي الادوية ومكانها

لكن طبعا لازم حد يبقي معاكي

او تقسمي الشغل علي أسبوع مثلا

[toqaa]

شكرا د/diamond ود/yojeena ود/ahmed علي ردودكم .
انا طبعا اخدت موقف ورفضت انى حتى اساعد فعملية التنضيف دى.دى كرامتنا يا جماعة ولو محافظناش علي كرامتنا دلوقت ممكن منعرفش نحافظ عليها بعد كدا.
انتو عارفين ايه المشكلة انى اتصدمت ان ممكن يتطلب من صيدلي انه ينضف كانه عامل بجد حسيت ان دى اهانة كبيرة قوى.وحسيت ان وضع الصيادلة فمصر كل مدا بيسوء.مش عارفة هيتحسن امتى؟!!!!ربنا يستر

[wh_kaboo]

ربنا يعينك
طبعا دى بتختلف من مكان لا خر يعنى انا معايا اربعة مساعدين واحد يدخل الطلبية على الكمبيوتر والتانى ينزل النواقص والتالت خاص بالنظافة وكله والرابع خاص بالاكسسورات بس

[د\بوسى ربيع]

بصى هقولك من الاخر الراجل ه بيجيب اخرك واقصى مجهود عندك هو ده اللى هيمشيكى عليه فاعملى لنفسك شخصيه من الاول ايه تنضفى دى ليه يعنى وفى الاخر اكيد ساعتك مش اكتر من 60 جنيه يا بنتى اصحاب الصيدليات بيستغلونا وهيقول انتى بنت وهتتكسفى تتكلمى انتى راحه لمهمه محدده اعمليها وبس وكمان شكلك يبقى ايه قدام لعملاء وانتى بتكنسى اكيد هيفتكروكى دبلوم

[pharmacistina]

اللهم صل ع النبي


و ماله


لا طبعا و ألف مرة لاااااا , القعاد في البيت أكرم


يا دي العيبة على مدير الصيدلية الزميل الفاضل

المفروض تردي على طول : لا مبعملش شغل نظافة , أنا دكتورة و تاخدي شنطتك و تتوكلي على الله و تسيبيه يتكلم مع نفسه مهما قالك مترجعيش

على فكرة لبس البالطو حاجة ضروووووووووووووووووووووووووووووووور يــــــــــــــــــــــــــــــــــة

يا زميلتي الفاضلة .. وجودك في الصيدلية أصلا حاجة بترفع قيمة الصيدلية


الجرد مينفعش تعمليه لوحدك

م الآخر معدتيش تدخلي الصيدلية دي تاني , بس ياريت قبل ما تمشي من الصيدلية تقولي للدكتور مدير الصيدلية كلمتين يحرقوا الدم .. عشان خاطري

[د\بوسى ربيع]

لا طبعا يا منى انا مش متفقه معاكى الانسان ياخد حقه بس بمرونه الصدام ده طبعا شىء سيء للغايه تتكلم معاه وتاخد حقها بهدوء وعقل

[toqaa]

فعلا يا بوسي كلامك صح وده اللي كان واضح جدا في معاملته(المدير الاستغلالي)وده فعلا اللي عملته روحتله يوم وحددتله نقاط واضحة وهو ابدى موافقته.لكن عشان الحق يتقال هو كان عايزنى انضف الادوية بس مش اكنس الصيدلية
وفعلا يا فارماسيستينا البالطو مهم جدا فالصيدلية وبيعمل هيبة للواحد بس في مثل صيدليتنا سيتحول من اللون الابيض الي الرمادى في خلال يومين.فبلاش احسن.

المشكلة اللي بتواجهنى دلوقتى يا جماعة انى طبعا زى ما ذكرت قبل كدة الدكتور مش واقف معايا ف90% من الخبرة باخدها لوحدى ومن نفسي مش حد اللي بيعلمهالي .هل ده صحيح مش لازم يكون فيه حد يوجهنى ويدربنى فالاول عالاقل ويدينى شوية من خبرته لان اكيد فيه أسألة من المرضي بتكون عايزة خبرة ولا ايه رأيكم؟