الاحتواء العاطفي في مجتمعنا .. أين هو ؟؟

[pharmacistina]

السلام عليكم ورحمة الله وبركاته

ازيكم ؟؟ يارب تكونوا بخير و سعادة

لحظة

لحظة

محدش يتسرع و يفهم معنى العنوان غلط ..


هشرح لكم معنى العنوان دلوقت و نطرح موضوع للنقاش أنا أعتقد انه مهم جداااااااااااااا لكل انسان عايش على وجه الأرض


الموضوع المطروح بيناقش حاجة الانسان الى الاحتواء العاطفي , ليس بالمعنى المحدود اللي المعظم مننا فاهمه انه العاطفة بين رجل و امرأة أو شاب و فتاة .. مش دة قصدي


الاحتواء العاطفي ..

أن تظهر العاطفة الطيبة لمن تحبهم , و في المقابل تحس بالحب ممن حولك .. برده محدش يفهم غلط .. لحظة



يعني ليه الناس عايشة في بيوت جافة ,

الأب و الأم كل هدفهم يوفروا احتياجات مادية أكل و شرب و ملبس و تعليم لأبنائهم , لكن نسيوا ان الأبناء كانوا محتاجين حاجة مهمة جدااااا لا تقل أهمية عن الأكل و الشرب - في رأيي - و هي الاحساس بالحب و الترابط الأسري

بدون شك انه أي أب و أم بيحبوا أولادهم , لكن فين الأب اللي ياخد ابنه تحت ذراعه و يتمشى معاه و يسمعه و يناديه ( يا حبيبي ) مثلا ..

و كذلك الأب مع بنته و الأم مع أولادها

ليه الحياة بقت جافة ؟؟؟


أيضا في علاقة القرابة , ليه مش بنظهر و نقول لأقاربنا أننا بنحبهم و نفرح لما نشوفهم ..

لماذا خطر ببالي هذا الموضوع ..

لأني اكتشفت انه الاحتياج العاطفي لدى الانسان هو سبب كثير من المعاصي و النكسات في حياته ..

يعني علاقة حب محرمة بين شاب و فتاة ( كما هو شائع ) في رأيي من أهم أسبابها الاحتياج العاطفي و انه كل طرف يريد أن يجد انسان يشعر معه بالحب و الارتياح و يسمعه .. و طبعا البيت جااااااف باااااارد زي فندق للأكل و الشرب و النوم مفيش عاطفة , مفيش صداقة و اظهار للحب من الأب و الأم


مهم جدااااااااااااا .. مهم أن ينشأ الطفل أو الطفلة ثم الشاب أو الفتاة على تغذية عاطفية مناسبة من الأب و الأم و الأصدقاء و الأقارب الخ .....

علشان يطلع يحب الحياة و يطلع انسان ناجح .. ملتزم لا يبحث عن حب حرام .. يطلع أب أو أم ناجح

و مجتمعنا يستقيم

كل أب و أم مسئولين أمام الله عن الاحتواء العاطفي لأولادهم و استقرارهم النفسي و منعهم من أن يصبحوا عندهم ما يسمى بـ ( هشاشة العاطفة )


الرسول - صلى الله عليه و سلم - كان مثال لقلب كبييييييير قدر يحقق الاحتواء العاطفي لكل من عرفه صلى الله عليه و سلم

الرسول احتوى بناته و كانت السيدة فاطمة حبيبة أبيها ,

احتوى زوجاته فكان أطيب زوج خلقه ربنا

احتوى أصحابه خير احتواء

هذا هو الدين الاسلامي

الدين الاسلامي يحثنا على اظهار العاطفة و احتواء بعضنا البعض ( بحدود الشرع )

الاحتواء العاطفي قضية مهمة لاااازم الكل يهتم بيها اذا كنا نريد جيل مستقر نفسيا ملتزم أخلاقيا ناجح في عمله ينهض بالأمة ..

أما أن ينشغل كل فرد بالماديات و العمل و ينسى أن له أسرة و أفراد يحتاجون الى كلمة حلوة منه أو جلسة استماع يصبح النشأ حزين هش العاطفة , سهل جداااا بأقل شيء انه يضل أو يبحث عن الاحتواء العاطفي الحرام




مهم جداااا , يااااااريت كلنا نفكر و نخطط لحياتنا بهذا الشكل ,

و من الآن .. نروح نقول لوالدينا و لاخواتنا اننا بنحبهم , و أصحابنا و أهلنا ..


أسوأ أنواع البخل أن يكون الانسان بخيل في عاطفته , فلا يظهرها و يظل يكابر أنه غير محتاج لأحد و لن يظهر حبه لمن حوله ..


بجد و الله بتفرق جداااا ,

لو العاطفة تم اشباعها في البيوت , تقل جداااا الانحرافات

و دة اللي الدين أمرنا به ..

[عبدالله عبدالرحمن]

اعتقد ان الأاستاذ عبدالوهاب مطاوع
رحمه الله
كان كتب مقالا يتحدث عن هذا الأمر
والحقيقة ان مجتمعنا يعانى جفافا حقيقيا
فى التعبير
والتعاطف
ولاتظهر مثل هذه المشاعر
الا فى الحالات المتطرفة
الفرحة الشديدة
او الحزن الشديد
اما فى الأوضاع الطبيعية
فهذه العواطف والمشاعر مختبئة
تحت تلال من المسئوليات
والواجبات والظروف الاجتماعية
المتغيرة
وانا لا الوم الأباء على هذا الأمر
بقدر ما الوم الظروف الأجتماعية
التى حالت من ان تخرج الأسرة فى نهاية الأسبوع
الى حديقة ما او مكان ليجلسوا ويتشاركوا معا الذكريات

الموضوع معقد للغاية ويتطلب
تغييرا للثقافة العامة
لدور العائلة
ودور الأبناء
ونوعية العلاقة بينهم
وهذا التغيير يجب ان يتم
فى اطار تغيير شامل
للعديد من الأمور المشوهة
والغير طبيعية فى مجتمعنا
يتطلب الأمر عادة حملة اجتماعية
يقودها المثقفون
وتشرف عليها وتدعمها الدولة
لأن اصلا النسيج الأسرى
هو الخطوة الأولى
لأصلاح المجتمع

جزاكم الله خيرا على طرح الموضوع

[NonY]

صح كل كلامك

دا اللى بفكر فيه بنفس الأسلوب فعلا
تمام

[ahmed helmy]

موضوع جميل جدا يا دكتوره بس انا ليا وجهه نظر في الموضوع ده
وهي ان سبب الجفاء ده هو ابتعادنا عن الدين وعدم تطبيقه في الحياه
زي ايه
يعني مثلا لو الاب عرف انه الرزق ده من ربنا ومحدش هياخد اكتر من اللي ربنا قسمه له
مش هيشغل نفسه بصراعات الدنيا ورا الفلوس وهياخد من الدنيا اللي هو محتاجه بس
واكيد طبعا هيعرف ان الدين بيامرنا بحسن تربيه الاولاد ومعاشره الزوجات
وبكده تفكيره هيبقي منصب علي ازاي يسعد اولاده ويبقي كويس مع الناس
والام لو عرفت ان الدين بيامرنا بالامتناع عن الغيبه والنميمه مش هتتكلم علي حد بطريقه مش كويسه
وبالتالي مش هتشيل في قلبها اي كره لاي حد يعني مش هتشغل نفسها بالناس
وبرضه لما تعرف ان الدين بيامرها انها تطيع زوجها ومتزعلوش في اي حاجه
اكيد الحياه هتتغير وهيعيشوا مع بعض في سعاده
وبالتالي طبعا لما الاب والام يبقوا كويسين مع بعض
اكيد ده هينعكس ع الاولاد وهيحسوا بالسعاده في الجو الاسري
ولما البيت ده كله يبقي كويس اكيد هيعاملوا البيت اللي جنبهم كويس
ومش كده وبس ده المعامله طبعا هتبقي مختلفه مع الاصحاب والاقارب
وخصوصا لما يعرفوا ان الدين منبه ومشدد علي صله الرحم
وعشان هما اسره متدينه اكيد هيطبقوا الدين
شوفوا بقي لو كل الناس التزموا بالدين وعملوا زي الاسره دي
يا تري ايه اللي هيحصل؟؟؟؟؟؟؟؟
وفي النهايه عشان اؤكد ان كلامي ده مش من فراغ
كاتب الموضوع ذكر مثال باشرف خلق الله سيدنا محمد عليه افضل الصلاه والتسليم
لانه كان بيطبق الدين بكل حذافيره وكان فاهم الدين صح
يعني انا شايف ان كل واحد دوره الالتزام الديني
وبعد كده يسيب الباقي علي ربنا
انا بصراحه في أيه بس مش فاكرها بالظبط فيما معناها
"لو أنفقت ما في الارض جميعا ما ألفت بين قلوبهم ولكن الله الف بينهم"

[Ri7ana]

أسوأ أنواع البخل أن يكون الانسان بخيل في عاطفته , فلا يظهرها و يظل يكابر أنه غير محتاج لأحد و لن يظهر حبه لمن حوله ..
صح جدا الكلام ده وعرفت دلوفتى ان مينفعش حد يعيش من غير ما يحس بحب الناس اللي حواليه ويحبهم ويبينلهم الحب ده ممكن بالكلام ومرة بالهدايا واكتر بالمواقف علشان تفضل علاقتنا سليمة ومستمرة بكل الناس اللي معانا
شكرا جدا عالموضوع عجبنى كتيير

[meramar]

و من الآن .. نروح نقول لوالدينا و لاخواتنا اننا بنحبهم , و أصحابنا و أهلنا ..


أسوأ أنواع البخل أن يكون الانسان بخيل في عاطفته , فلا يظهرها و يظل يكابر أنه غير محتاج لأحد و لن يظهر حبه لمن حوله

بجد..من اجمل المواضيع اللى قريتها فى المنتدى
الموضوع ده فعلا فكرت فيه كتير..
معرفش ليه مجتمعاتنا اظهار العاطفه والحب
واظهار الاحتياج للعاطفه والحب فيها بيعتبر جرم
ونستغرب اوى لما نلاقى اب بيدلع ولاده او بنت بتقول لامها بحبك
ونبص لهم باستنكار ونقول عليهم "اوفر ومزدودنها"

فيه ناس كتير بتفضل عايشه طول حياتها بالجفاء ده
ولما حد من اللى بيحبهم يموت يبقى الندم هيقتله

وجود اللى بنحبهم جوالينا فرصه
ان احنا نقولهم اد ايه بنحبهم ومحتاجين ليهم

المثل بيقول عن الجرئ انه "بيقول للاعور انت اعور فى عينه"
مع ان والله الاكثر جرأه وشجاعه منه "اللى بيقول للحلو انت حلو فى عينه"

موضوع مميز جدا جدا كالعاده

[Alaa Elemam]

موضوع جميل جدا يا دكتوره بس انا ليا وجهه نظر في الموضوع ده
وهي ان سبب الجفاء ده هو ابتعادنا عن الدين وعدم تطبيقه في الحياه
زي ايه
يعني مثلا لو الاب عرف انه الرزق ده من ربنا ومحدش هياخد اكتر من اللي ربنا قسمه له
مش هيشغل نفسه بصراعات الدنيا ورا الفلوس وهياخد من الدنيا اللي هو محتاجه بس
واكيد طبعا هيعرف ان الدين بيامرنا بحسن تربيه الاولاد ومعاشره الزوجات
وبكده تفكيره هيبقي منصب علي ازاي يسعد اولاده ويبقي كويس مع الناس
والام لو عرفت ان الدين بيامرنا بالامتناع عن الغيبه والنميمه مش هتتكلم علي حد بطريقه مش كويسه
وبالتالي مش هتشيل في قلبها اي كره لاي حد يعني مش هتشغل نفسها بالناس
وبرضه لما تعرف ان الدين بيامرها انها تطيع زوجها ومتزعلوش في اي حاجه
اكيد الحياه هتتغير وهيعيشوا مع بعض في سعاده
وبالتالي طبعا لما الاب والام يبقوا كويسين مع بعض
اكيد ده هينعكس ع الاولاد وهيحسوا بالسعاده في الجو الاسري
ولما البيت ده كله يبقي كويس اكيد هيعاملوا البيت اللي جنبهم كويس
ومش كده وبس ده المعامله طبعا هتبقي مختلفه مع الاصحاب والاقارب
وخصوصا لما يعرفوا ان الدين منبه ومشدد علي صله الرحم
وعشان هما اسره متدينه اكيد هيطبقوا الدين
شوفوا بقي لو كل الناس التزموا بالدين وعملوا زي الاسره دي
يا تري ايه اللي هيحصل؟؟؟؟؟؟؟؟
وفي النهايه عشان اؤكد ان كلامي ده مش من فراغ
كاتب الموضوع ذكر مثال باشرف خلق الله سيدنا محمد عليه افضل الصلاه والتسليم
لانه كان بيطبق الدين بكل حذافيره وكان فاهم الدين صح
يعني انا شايف ان كل واحد دوره الالتزام الديني
وبعد كده يسيب الباقي علي ربنا
انا بصراحه في أيه بس مش فاكرها بالظبط فيما معناها
"لو أنفقت ما في الارض جميعا ما ألفت بين قلوبهم ولكن الله الف بينهم"

هى دى وجهة نظرى
ومتفقه مع الكلام ده
موضوع رائع جدا
جزاك الله خير

[pharmacistina]

مشغووووووووول على طوووووووووول

و مشغوووووووولة

البعض مشغول علشان دراسة و البعض الآخر بيفكر في الارتقاء في السلم الوظيفي و آخرين بيحسبوا في الفلوس و يدخروا فلوس في البنك علشان أولادهم ,

مع ان لازم الكل يعرف ان الانسان المحروم عاطفيا حزين و هيفضل حزين مهما كان عنده من أموال و مهما نجح و مهما حقق ..

البعض بيقول ان السبب هو الظروف الاقتصادية اللي احنا فيها في مصر يعني , بس أنا أعتقد انه دة مش صحيح أوي

لأن زمان أيام أجدادنا كانت الحياة بسيطة و الدخل على قد مصاريف الحياة و مع ذلك كانت الأسرة مترابطة أكتر من دلوقت


يعني بصوا كدة معايا لصورة الأسرة الحديثة :


الأب : في العمل و بياخد overtime علشان المرتب يزيد

الأم : في الشغل أو بتكلم صاحبتها في التليفون

الابن : خارج البيت بيرجع البيت علشان ينام

الابنة : في المدرسة أو الكلية وبعدها بتكلم صاحبتها أو على النت أو جالسة في غرفتها

و يفوت اليوم ممكن ميشوفوش بعض ,

حتى وجبة الغداء ماعادتش بتجمع الناس للأسف نظرا لاختلاف المواعيد

مع ان الرسول صلى الله عليه و سلم و لنا فيه أسوة حسنة كان مسئول عن نشر دعوة ربانية و تأسيس دولة كاملة و حمايتها و كان بيقود غزوات و مع ذلك كان يعطي العاطفة دائما فكان يقبل أحفاده الحسن و الحسين و يداعبهما و يزور بناته و أصحابه ..

دلوقت خصوصا في مجتمع الذكور , عيب انه الزوج مثلا يرجع البيت مبتسم أو يرحب بزوجته و أولاده .. عيب أو انتقاص من هيبته

لازم يدخل البيت مكشر و ماسك الجرنال في ايد و بطيخة في الايد التانية

عايزين يا جماعة نبدأ نعود نفسنا على الأخذ و العطاء في العاطفة ( مش قصدي حاجة حرام أنا أقصد ما يرضاه الشرع داخل اطار الأسر و الصداقات المشروعة و اللي ربنا راضي عنها )

[AbU ElKhAiR-Let`s Go]

بصراحه موضوع فى البدايه ما شدنيش أما قرأته حسيت بقيمته
فعلا هو زى ما الدكتور عبد الرحمن قال
الموضوع فعلا معقد
بس ممكن يتحل بينا
صحيح هتبقى صعبه
لكن مش مستحيله
يمكن من أكبر المشاكل دايما اننا نلقى التهم على غيرنا وان كانوا مخطئين
بس ممكن نكون احنا جزء من المشلكه
يعنى مثلا مشكله العصبيه
كنت فاكرها مشكلتى لواحدى
لكن لقيتها مشكلة ناس كتير
طبعا العصبيه دى أحد الأسباب المباشره للجفاء
محدش عاد مستحمل حد
ممكن لو قلت لحد أنا بحبك
يحس انك بتشتمه
يبقى من أسبابها
عدم وضوح المفاهيم
زى ما حصل معايا ويمكن مع أغلبنا فى البدايه
من عنوان الموضوع
ممكن توارث بعض العادات
ممكن الانجرار وراء الثقافات
ممكن ضياع الدين
ممكن ضياع الثقه
ممكن الأفلام
وممكن المجتمع ومشاكله
بس أكيد فى النهايه أنا وانت وهو وهى سبب فى المشكله

تعالوا نتغير بجد
تعالوا نشوف مشاكلنها
نحاول احنا نحلها ونتناقش فى الحلول
تعالوا ندوزر جوانا هنلاقى فى حاجات جميله أوى ومعانى يمكن نسيناها من كتر ما تجاهلناه
تعالوا نحاول
أكيد هنقدر
أو على الأقل هنبدأ
بس لازم نبدأ

فعلا موضوع يستحق الناقشه لكن الحل حضرتك قلتيه
وهو

و من الآن .. نروح نقول لوالدينا و لاخواتنا اننا بنحبهم , و أصحابنا و أهلنا ..

شكرا دكتوره فارمسيستينا
موضوع رائع فعلا

[pharmacistina]

مكن لو قلت لحد أنا بحبك
يحس انك بتشتمه

فعلا ..

ممكن لو رحت قلت لحد انك بتحبه يحط ايده على جبينك و يقولك ( خير انت سخن , تعبان ولا مالك ؟؟ )

لأننا متعودناش نظهر الشعور الطيب , لكن أسهل حاجة انه الواحد يتعصب و يسيء للناس , ولا أزكي نفسي فأنا أهدي الموضوع لنفسي قبل أي حد

بس برده مش المقصود بالاحتواء العاطفي انه الواحد ينطق حرفيا كلمة أحبك , لكن ممكن التصرفات و الابتسامة و المعاملة الطيبة و الهدية مع الأهل و الأصحاب و المحيطين تغني

تعرف مسح الأم على رأس ابنها أو بنتها دة مثال لصورة من صور الاحتواء العاطفي

لو الأسرة كلها تجلس حتى لو مرة في الأسبوع , و يتكلموا و يتضاحكوا و كل واحد يحكي عن مشاكله أو أي شيء بيشغله , هو دة دفء الأسرة اللي أصبح مجتمعنا مفتقده