5 (ممكن افضفض)
السلام عليكم ورحمة الله
ازيكم يا دكاترة
بعد مرور 5 ايام من الشهر المبارك
فى كلام نفسى اقوله لحضراتكم (ولنفسى قبل اى حد)
...............
بسم الله
ربنا ييسر وحد يقرأهم
............
كنا قاعدين بنستنى رمضان
وهييجى امتى
وكلنا همة
دلوقتى
عدى 5 ايام من رمضان
يااااااااه
عدوا بسرعة اوى
هو رمضان هيعدى بسرعة
لأ مش رمضان بس
ده شهر ورا شهر
وسنة ورا سنة
عمرنا اللى بيعدى بسرعة
واحنا مش حاسين
او بنعمل نفسنا مش واخدين بالنا
ناسيين
او بنتناسى
...........
يا ترى ال5 ايام اللى عدواعملنا كام فى المية من اللى كنا ناويين نعمله
بالنسبة لى اقل من 70%
ويا ترى كام حاجة كنا ناويين نبطلها
وما بطلناش
.........
وبعدين؟؟؟؟؟؟؟
هنستنى كده كتير
..........
فى ناس ربنا اكرمها وعملت كل اللى كانوا ناويين عليه وممكن اكتر
السؤال هل هنثبت بعد رمضان ان شاء الله؟
من علامات قبول العمل
الثبات عليه بعد رمضان
...........
عاوزين نعدى على بعض احاديث عن رمضان بسرعة
قال النبى
رغم أنف رجل دخل عليه رمضان ثم انسلخ قبل أن يغفر له،
(ياه صعبة اوى لو فكرنا فيها)
............
الصلوات الخمس ، و الجمعة إلى الجمعة و رمضان إلى رمضان ، مكفرات لما بينهن إذا اجتنبت الكبائر
يا ترى احنا اجتنبنا الكبائر ؟
اجتنبنا عقوق الوادين
ولا زعلناهم مرة واتنين وتلاتة
...........
يا ترى اجتنبنا الغيبة؟
ولا اللى بيغيظنا ويستفزنا
بنبهدله من وراه
بصراحة انا بستغرب من نفسى اوى
حد يضايقنى
اقوم احب افضفض
اروح احكى اللى حصل
واقنع نفسى ساعتها انى بحكى اللى حصل وبس
انا ما بغلطش فى حد
لكن طبعا ده ما بيحصلش
لازم يدخل فى النص
هو عمل اصله ......
عشان هو ....
سبحان الله
استفدت انا ايه فى الاخر من انى حكيت ؟؟!!
..............
الشئ بالشئ يذكر
اذكركم ونفسى
بقول النبى
وهل يكب الناس في النار على وجوههم أو قال : على مناخرهم إلا حصائد ألسنتهم
.................
يا ترى كام ذنب عملناه من رمضان اللى فات
قعدت مع نفسى
عشان احسبهم
يااااه
مش نافع
كام مرة اخرت الصلاة عشان سكشن ولا محاضرة ولا المواصلات
كام مرة صليت وقلبى مش معايا
كام نظرة فى غير محلها
وكام وقت ضاع من غير قيمة
وكم وكم ........
كل ده فى سنة
طب لو حبيت اعد كل اللى فات
......
الموضوع كبير
ايه اللى يستحق فى الدنيا دى كلها
المشقة يوم تقترب الشمس من الرؤوس
مش هنقف يوم ولا اتنين
دول 50 الف سنة
مين يستاهل اننا نعصى ربنا عشانه
وهيعملى ايه
لما ادخل قبرى وحدى
هيعملى ايه وانا بعدى من على الصراط
لحد امتى
اسمع درس عن التوبة ابكى وادعى
وتانى يوم
وكأن شيئا لم يكن
مفيش حاجة اتغيرت
....................
نكمل عن رمضان
يا دكاترة
لو ما تبناش فى رمضان هنتوب امتى
سبحان الله
احنا بنقرا قرآن والحمد لله
بس قلوبنا معانا
ولا بتبقى فى حتة تانية
هل موجودة ولا لسه جارى البحث
عاوزين نحس بالقرآن
فين دموعنا؟
فين بكاءنا من خشية الله؟
قلوبنا ما لها؟
هل رمضان هييجى ويخلص واحنا زى ما احنا
مفيش حاجة اتغيرت فينا؟
موقفين شهر ونرجع للى كنا بنعمله
...................
يا دكاترة
هل ممكن نقضى يومنا قدام المسلسلات ونطلب من ربنا المغفرة
المسلسلات اللى لو مفيهاش حاجة غير اطلاق البصر لكفى
.............
رمضان فرصة عظيمة
مش عاوزينها تضيع
نستغله صح
نقفل صفحات
ما كنش المفروض تتفتح
ونفتح صفحات
مشرقة بالقرب من الله
مليانة بالطاعات
.....
رمضان
يعنى يلا نتوب
ذنب كنت مقيم عليه بقالك فترة
هتبطله امتى لو لم يكن فى رمضان
......................
كلام كتير نفسى اقوله
عاوزين نتغير
عاوزين الباطن يكون افضل من الظاهر
كم مرة حد لما قرب منى اتصدم
كنت فاكراها احسن من كده
مش عاوزين ده يحصل
بصراحة
انا شفت ناس كتير كده
لما قربت منهم ندمت
يا ريتنى فضلت بعيد
وفضلت صورتهم جميلة ومثالية
مش عاوزين حد يتصدم فينا
عاوزين نكون مسلمين بجد
غى كل تصرفاتنا
..................
يا دكاترة اولى وتانية و.........
ما تضيعوش دقيقة فى الكلية
عشان ما تيجوش بعد ما تخلصوا تقولوه
5 سنين عدوا بسرعة
يا ترى عملت فيهم ايه
ييجى سؤال
كام واحدة لبست زى شرعى على ايدك
وكام واحد ربنا هداه بسببك
ونفاجأ باجابة صادمة
...........
عاوزين نتحرك لدين الله
عاوزين رمضان الانطلاقة
نصلح من نفسنا وما ننساش غيرنا
.............
عاوزين دين الله همنا
واللى بيشغل بالنا
اللى بيحركنا
..........
فى الكلية فى المدينة فى الصيدلية والشارع والمواصلات
عاوزين حركة مستمرة
...........
يا دكاترة
محتاجين وقفة
احنا صح ولا غلط
نكمل ولا نغير الاتجاه
ولا نظبطه
دينا ما ناخدوش من اى حد
ناس كتير بتتكلم عن الدين
كل احد بيقول الحق معايا
يا ترى الحق مع مين؟
هنعرف ازاى
اسمع كلمتين من اى حد اصدقهم وخلاص
الموضوع خطير
الشيطان بيزين للانسان عمله
كام مرة عملنا حاجة واحنا مقتنعين انها صح وطلعت غلط
كام مرة كنا بنبتغى الاجر على عمل
وبعد كده قلنا يا رب اغفر لنا
عشان اكتشفنا انه غلط
هل احنا نعذر بجهلنا؟
الدعاة فى كل مكان
لسه مش بنسأل
ليه مش بنتعب عشان نوصل للحق
هل ممكن يوم الدين لما نسأل
نقوا كنا فاكرين ان ده صح؟
...................
الا ان سلعة الله غالية الا ان ساعة الله هى الجنة
الجنة محتاجة تعب
هدفى وهدفكم رضا ربنا
لو عرفت ان اللى بعمله مش بيرضى ربنا
ازاى اكمل فيه
ازاى اصر عليه؟
.........
انا اتكلمت مع ناس واتناقشت معاهم قبل كده فى حاجات خطيرة ومهمة جداا
وكان ردهم
مهما قلت مش هنتغير
طب ليه؟
تقنعونى عشان انا اتغير
مفيش اجابة
.............
ليه
احنا بنعند على نفسنا؟
.....................
يا رب الكل يدعى انه على الحق
فارنى الحق الذى يرضيك وارزقنى اتباعه
ندعى ربنا بصدق
مش معنى اننا مقتنعين بحاجة نقف عندها وخلاص
ونشوف ادلة على بطلانها وبرده نكمل
مينفعش
....................
مش عارفة خلصت اللى انا عاوزاه ولا لأ
اتمنى ان يكون فى دكاترة قراوه
وصبروا للاخر
يقال
ما خرج من القلب يصل للقلب
وما خرج من اللسان لا يخترق الاذان
فادعو الله ان تصل تلك الكلمات لقلوبكم
وان ينفعنا واياكم بها
............
أعوذ بالله ان اكون ممن يأمرون بالمعروف وينسون انفسهم
ربى
احسن عبادك بى الظن
فاجعلنى خيرا مما يظنون
واغفر لى ما لا يعلمون
اللهم ارزقنى قيام ليلة القدر
واخرجنى من رمضان مغفورة الذنب
رد مع اقتباس
