هل تفضل السفر ولا العيشه في مصر ؟

**Messi** · 22-04-2010, 10:04 PM

بسم الله الرحمن الرحيم

موضوع يؤرق الشباب حاليا

هل تفضل السفر ولا العيشه في مصر ؟

دا موضوعنا يا شباب اللي عايزين نتكلم فيه مع بعض طبعا معظمنا السؤال ده بيدور في أفكاره وبالذات في فترة الجامعه وتحديداً في سنه رابعه لما بتحس انك خلاص بتودع الحياه الدراسية وداخل علي حياه جديدة وهي الحياه العمليه اللي فيها بتبدأ تحدد ملامح حياتك ومستقبلك في مننا اللي بيبدأ يدور علي فرصة سفر ويبدأ حياته خارج مصر وفي مننا اللي بيحاول يحصل علي وظيفه في مصر حتي لو راتبها او العائد منها أقل من العائد اللي ممكن يحصل عليه لو سافر الخارج ويفضل انه يعيش وسط أهله .

فياترى انت من النوع اللي يفضل السفر ولا العيشه في مصر ؟ ولو فضلتها تعرفنا أسبابها ؟ وإذا رافض فكرة السفر تعرفنا بردو الأسباب ؟ وإيه مميزات السفر وعيوبه ؟

أعتقد ان السؤال ده مفيش بنت هتعرف تجاوب عليه لان البنت بالطبع بتبقي مرتبطه بالشخص اللي هيبقي زوجها ولذلك هنسأل البنات سؤال بردو بنفس المعني .

باترى تفضلي الارتباط من شاب يعمل خارج مصر ؟ ولا تفضلي المقيم في مصر ؟ والاسباب في حاله الرفض أو القبول ؟

**Hope1** · 22-04-2010, 10:21 PM

المشاركة الأصلية كتبت بواسطة محمد عليوة

باترى تفضلي الارتباط من شاب يعمل خارج مصر ؟ ولا تفضلي المقيم في مصر ؟ والاسباب في حاله الرفض أو القبول ؟

اولا شكرا يا دكتور محمد ما شاء الله مواضيع حضرتك مميزة جدا
انا بالنسبة لي مش بقيم الموضوع كده اهم حاجة التدين و الاخلاق اما الارزاق دي بتاع ربنا بس اهم حاجة الاسرة تكون متجمعة مع بعضها
انا بابا سافر 5 سنين السعودية بس دايما كنا بنروحله و هو بيجيلنا
بس في وقت معين الانسان بيفضل انه يرجع لان في حاجات كتيييير مش بتعوضها الفلوس....

**N00R EL _SHAMS** · 22-04-2010, 11:24 PM

انا بالنسبه لى نفسى اسافر للخارج اوى وده طبعا هيكون مع الشخص الى هرتبط بيه ان شاء الله ......لكن مش لازم اوى يعنى .....
لان اهم حاجه انه يكون انسان ملتزم (ودى تحتها كده يجى كام خط )ويتقى الله فى طبعا ....وساعتها بقى ممكن اسافر معاه لاخر الدنيا ولو مش عايز يسافر اسافر انا

(انا بهزر طبعا )....والله فعلا الارزاق دى على الله يعنى السفر مش شرط ف تحقيق الاحلام ولو اننا ف بلد الاحلام بتتحقق فيها لوحدها
مرسى ع التوبيك .

**muna7assan** · 23-04-2010, 12:58 AM

المشاركة الأصلية كتبت بواسطة محمد عليوة

أعتقد ان السؤال ده مفيش بنت هتعرف تجاوب عليه لان البنت بالطبع بتبقي مرتبطه بالشخص اللي هيبقي زوجها ولذلك هنسأل البنات سؤال بردو بنفس المعني .

باترى تفضلي الارتباط من شاب يعمل خارج مصر ؟ ولا تفضلي المقيم في مصر ؟ والاسباب في حاله الرفض أو القبول ؟

بصراحه دى حاجه ترجع للظروف وقتها وللشخص نفسه وحاجات كتير قوى

يعنى ما اقدرش اقول لأ ما اقدرش وما اقدرش اقول عادى مش فارقه

هوا طبعا اى بنت تحب انها تكون جمب اهلها وفى نفس الوقت خارج مصر ما بقاش بعيد

قوى وفيه فرص كويسه جدا

علشان كده بأقول الظروف وقتها هيا اللى هاتحدد ان شاء الله

**Dr\Emy** · 23-04-2010, 01:42 PM

للاسف الشاب المصري دلوقتي يخلص تعليمه من هنا
وبعدين يدور علي فرصة عمل من هنا في اي حتة برة
وانا مش بلومهم بجد لان معتش في فرص عمل في مصربجد يعني مثلا انا كدكتورة صيدلانية اول ما اخلص تعليمي هستني التكليف اللي بشوية ملاليم بضيع ع المواصلات والسفر و البهدلة احنا كبنات مش عندنا مشكل شوية لكن الولد مطلوب منه مسئوليات في المستقبل ملاليم الشهر مش هتنفع ابدا فيعمل ايه يسافر برة هيتبهدل ويطلع عينه بس هيجيب فلوس وده بالنسبة له احسن يلا كلها بهدلة
بس كاجابة ع السؤال انا بفضل ابقي في مصر مع الشخص اللي هرتبط بيه بس للاسف معتش في شباب كامل مش برة مصر

**...مصر...** · 23-04-2010, 05:13 PM

أنا مش بحب أخلى جاجة زي دي مقياس قبول أو رفض المقياس الأول عندي إنه يكون متدين جدا جدا
لكن أنا زهقت من مصر وعاوزة أسافر مش لأسباب مادية لأسباب تانية منها إن المجتمع بقى مليان أنانية والأسر بقت متشتته بسبب غياب جو المدرسة اللي كان بيعلمنا حاجات كتير والدروس اللي الأولاد بيروحوها من ابتدائي فالأسرة ما بتجتمعش حتى على غدا وطبعا الجو اللي في أماكن كتير بعيد عن الدين ... أنا بشوف شعوب تانية تعاملها مع بعض مفيهوش الخداع والأنانية اللي انتشرو بيننا أوي.......

**Anas** · 23-04-2010, 07:29 PM

لو لقيت في بلدي اللي يكفيني و يكفي لتكوين أسرة و إعاشة الأسرة دي فيما بعد

يبقى ليه أسافر ؟؟؟

انا ممكن أسافر بره في حالتين ... الأولى للضرورة ... يعني الشغل لو الظروف هنا مش مساعدة
و دي هتبقى حاجة مؤقتة ... يعني بمجرد انقضاء الغرض و خلاص ...

التانية ... اني أكمل دراسة بره ... و دي لو هقضي فيها عمري كله ... و طبعا دي مش هتكون في الخليج

**NeScaFE** · 23-04-2010, 08:37 PM

أعتقد ان السؤال ده مفيش بنت هتعرف تجاوب عليه لان البنت بالطبع بتبقي مرتبطه بالشخص اللي هيبقي زوجها ولذلك هنسأل البنات سؤال بردو بنفس المعني .

باترى تفضلي الارتباط من شاب يعمل خارج مصر ؟ ولا تفضلي المقيم في مصر ؟ والاسباب في حاله الرفض أو القبول ؟
[/quote]

والله محدش عارف نصيبه فين بس لو الانسان اللى هرتبط بيه هيسافر فانا اكيد هسافر معاه

اما لو هيشتغل هنا فاكيد هعد هنا ....لكن انا بفضل اللى يشتغل هنا فى مصر ويكون فى المنصورة عشان ابقى قريبة من اهلى ومبعدش عنهم
انما لو هيسافر بقى يبقى لازم اكون معاه ....وياحبذا بقى لو يكون فى دبى او ابوظبى

**AbU ElKhAiR-Let`s Go** · 25-04-2010, 01:11 AM

[quote=محمد عليوة;274939]

بسم الله الرحمن الرحيم

موضوع يؤرق الشباب حاليا

هل تفضل السفر ولا العيشه في مصر ؟

دا موضوعنا يا شباب اللي عايزين نتكلم فيه مع بعض طبعا معظمنا السؤال ده بيدور في أفكاره وبالذات في فترة الجامعه وتحديداً في سنه رابعه لما بتحس انك خلاص بتودع الحياه الدراسية وداخل علي حياه جديدة وهي الحياه العمليه اللي فيها بتبدأ تحدد ملامح حياتك ومستقبلك في مننا اللي بيبدأ يدور علي فرصة سفر ويبدأ حياته خارج مصر وفي مننا اللي بيحاول يحصل علي وظيفه في مصر حتي لو راتبها او العائد منها أقل من العائد اللي ممكن يحصل عليه لو سافر الخارج ويفضل انه يعيش وسط أهله .

فياترى انت من النوع اللي يفضل السفر ولا العيشه في مصر ؟ ولو فضلتها تعرفنا أسبابها ؟ وإذا رافض فكرة السفر تعرفنا بردو الأسباب ؟ وإيه مميزات السفر وعيوبه ؟

[/quote

أولا شكرا على الموضوع الرائع ده ياعليوه
ثانيا أنا أعتقد أن الموضوع مش مجر شغل وفلوس وخلاص لأنى متأكد ان كل انسان فى الحياه له هدف بيحاول يحققه مهما تعب وعانى مش فارقه معاه بأه هو بيحاول يوصل للهدف ده فين ولا امته انه طول مافيه نفس بيحاول عشان يبقى عمل اللى عليه على قد مايقدر
بس طبعا لازم على طول الرحله محافظ على دينه عارف أولوياته بيوزن الأمور كويس(على قد ما يقدر طبعا)

thank you Dr\3elawa

**محمد وجدي** · 25-04-2010, 04:32 PM

سلام عليكم
انا خريج 2009

وبعمل بالخارج بشركة النهدي الطبيه

وسافرت وانا مرغم

مش بمزاجي

كان نفسي افضل في مصر واتجوز واستقر واكبر انا ومراتي مع بعض واحده واحده

بس للأسف مفيش حد بيحب يكبر واحده واحده
كله لازم يكبر بسرعه مع الطيار
فكان لازم اسافر واسيب اهلي لوحدهم واتغرب علشان اجيب الفلوس اللي لازم تبقي معايه علشان اعرف اعيش في مصر

علشان كده انا بسأل سؤال تاني

هل سفر الشباب للخارج

عقد عمل ؟

أم نفي للأبد ؟

الإرتباط بشاب سافر للخارج
أو الإرتياط بشاب غني مقيم في مصر
حلم كل بنت في مصر

وده رأيي انا

مش عارف انتوا رأيكم
ايه ؟

بس انا جربت الغربه

وحشه جدا لو أنت بعيد عن أهلك وأصحابك

مع اني علي بعد ساعه إلا ربع من الحرم
الحمد لله

بس الأهل والأحباب مهمين برضه

سلاااااااااااااااااااام

الموضوع: هل تفضل السفر ولا العيشه في مصر ؟

أدوات الموضوع

عرض

هل تفضل السفر ولا العيشه في مصر ؟

المواضيع المتشابهه

أيهم تفضل

السفر وقت وبيضيع تيجوا نستغله

لو نحس بفضل الله علينا لأقبلنا وما تولينا

ايهما تفضل...................ولماذا

ايهما تفضل قلمك ام لسانك؟؟

ضوابط المشاركة