لما تكون على وشك انك تقتل واحد لازم تقف مع نفسك

[Dr/HULK]

السلام عليكم ورحمة الله وبركاته

لاول مرة هعمل موضوع هتكلم فيه عن نفسى

لكن بجد من امبارح وانا مش متخيل ايه اللى كان ممكن يحصل لو الامر مشى عادى

الموضوع (موقف) بدأ لما كنت واقف فى الصيدلية
وجه راجل كبير فى اسن وقالى انه اشترى امبولات الدولفين من الدكتورة الصبح وعاوز يرجعها

طبعا رجعتهاله عادى وخدت الامبولات(كانت فى درج) وحطتها جنب علب الدولفين

بعد كده روحت وجيت تانى يوم عادى الصيدلية

قاعد فيها بصرف الادوية اللى اعرفها
بعد كده جه الدكتور وبعد ساعة تقريبا الشغل ماشى تمام
جات روشتة لواحد عامل عملية

الروشتة فيها

1. دولفين امبول
2. فولتارين لبوس
3. دبروفوس
4. وصنفين كمان مش جايين فى بالى

بس المهم دلوقتى معايا الدولفين
طبعا انا دخلت لقيت الدرج اللى خدته من الراجل زى ماهو فيه 3 امبولات

فخدته وحطيته مع باقى الادوية

فلما الدكتور جه يراجع ورايا لقيته مستغرب اوى وبيقولى هو الكابرون ده موجود فين فى الروشتة؟؟؟؟؟

دى بقى المصيبة الدرج اللى خدته من الراجل كان كابرون(مضاد للنزيف)
وانا خدته على كلام الراجل وحطيته جنب الدولفين من غير مااقرأ حتى ده ايه

وبرده لما جبته فى الروشته مقرأتش اسمه واعتمدت انى عارف مكان الدولفن

طبعا صرفت الروشته عادى وبعد مالناس مشت

لقيت نفسى مش مستوعب ايه اللى ممكن كان يحصل لو الدكتور كان اتأخر او الروشتة دى جات بدرى

اول مرة فى حياتى من يوم مادخلت صيدلة احس انى ممكن أذى حد

واول مرة اعرف ان الصيدلى مش بقال واقف وده للاسف اللى كنت عليه مجردبقال عارف مكان الحاجة وبيجيبها حتى مسألتش نفسى انا جايب ايه

اسف انى بتكلم كده بس بجد انا كل مافتكر الموضوع ده بترعب ومش متصور ايه اللى كان ممكن يحصل لراجل كبير كنت هديله كابرون بدل دولفن وان خطر تعرضه لجلطه كنت هبقى السبب فيه

انا بس حبيت اكتب الكلام ده هنا عشان لو فيه حد كان بيتدرب بأسلوبى ياخد باله

وبأذن الله لو جايلى اسبرين هركز انا معايا ايه ومين اللى هياخده عشان مجيش فى يوم احس انى اذيت حد

فى الاخر بالتوفيق للجميع

والحمدلله انه الدكتور خد باله

[@Noh]

الحمد لله ان ماحدش حصله أذى , وان شاء الله ربنا ينبهنا دايما وناخد بالنا من الحاجات دى
شكرا للتنبيه يادكتور.

[Amira Said]

ما هو التدريب لازم بتكتسب منه خبرة،، والصيدلي والمساعد بيكونوا واخدين بالهم من الحاجات دي، والموقف اللي حضرتك اتعرضت له أكيد استفدت منه انك تهتم بمراجعة اسم الدواء والتركيز بتاعه،، وده شيء كويس

[Amira]

الحــــمدلله ان المـــوضوع إتلحـــق على طول

شكــــراً على التـــنبيه

[SHEREIF]

الحمد لله ان الموضوع عدى على خير وانا برده كان حصلتلى حاجة اخطر من كدة
اديت لواحد حقنة انسولين 50وحدة كانت اول مرة اديهاله
تخيلو واحد المفروض ياخد 5 وحدات خد 50 بس الحمد لله ربنا ستر والحقنة بدل ما تقتله رجعتله نشاطة انا مش عارف ازاى بس ده اللى حصل والله كان هو اصلا ممنوع من شرب الميه وطبعا السكريات واى لحوم
لانه كان عنده فشل كلوى وكبدى وسكر وحاجات كتير جدا وكان نايم فى السرير مش بيتحرك وعلشان احنا نعادل تاثير الحقنة اديناله ميه وعسل وسكر والحجات دى رجعتله نشاطة وخلته يقوم من السرير ويتحرك
ويمشى طبعا هما كانو فرحانين جدا وتانى يوم جم قالولى تعالى اديله انت الحقنة دى وقعدوا يجى نص ساعة علشان يخلونى اديهاله بس طبعا الحمد لله انا حرمت اقرب منه اصلا ورفضت وده كان درس ليا كبير جدا من ساعتها بتاكد حتى من رقم التشغيلة كمان
بس اللى انا مستغربله لحد دلوقتى ازاى ده حصل ونفسى افهم ياريت اللى يعرف يفهمنى

[muna7assan]

بجد والله الف حمد وشكر ليك يا رب ان الموقف دا عدى على خير

حياه بنى ادم كانت ممكن تروح بسبب الغلطه دى

المهم انك تستفيد من الموقف دا وكل اللى يعرفه يستفيد منه وكمان نحس بقيمتنا كصيادله

بس انا مش فاهمه ازاى دا حصل؟

يعنى المريض اللى رجع الدوا بدل الدولفين بكابرون

[ahmedofegypt]

جزاكَ الله خيراً يا دكتور على التنبيه ده

و فعلاً الصيدلى مش بقال .. ده حتى ال handling ده و انك تناول الدوا للمريض ده فن فى حد ذاته .. بس اللى بيفهم بس هو اللى يعرف كده ..

الحمد لله ان ربنا ستر و عدت على خير

[summer breeze]

الحمد لله عدت على خير بس دا درس لينا كلنا وربنا ينور لينا بصيرتنا وبصرنا ويستخدمنا فيما ينفع ولا يضر