حواء .. مصلحة الكون

[pharmacistina]

السلام عليكم ورحمة الله وبركاته

بعد التحية لكم ..

موضوع هام في رأيي ..

حبيت نناقشه مع بعض , و نفيد بعض فيه ..

و أسأل الله أن يجعل هذا الموضوع في ميزان حسناتنا ..

هنتكلم في هذا الموضوع عن حواء المربية .. الأم

هل فكرتي مرة لما يكون ليكي family ..

هتعامل ازاي أولادك , هتتصرفي معاهم ازاي , هتعاقبي ازاي ,


مراهقة أولادك .. هتتصرفي ازاي في مشاكل هذه الفترة العصيبة ..

تربية البنات تختلف عن تربية الأولاد ..

في ظل النحلال الأخلاقي و الاعلام الهابط , تفتكروا ممكن نربي جيل محترم ؟؟!!!

و المدارس المصرية اللي أصبحت سيئة , لا تعليم ولا تربية للأسف

بالتالي دورك أصبح مضاعف

و تقريبا حواء عليها 90% من الدور التربوي في حياة أولادها , لأن آدم دوره غالبا خارج المنزل ..

تعالوا نعطي لبعض أفكار حلوة ..

في حاجات ماما عملتها معانا دلوقت لما كبرنا قدرناها و فهمناها و قررنا نعملها , و حاجات تانية ماكانتش كويسة قررنا اننا ما نعملهاش ..

تعالوا نتحدث في هذا الموضوع ..

ملحوظة : الوعي بهذا الأمر هام جداااااااا قبل الارتباط ..

لأنه ليس المهم انك تجيبي أولاد و بنات , العبرة مش بالعدد ..

لكن المهم انك تنتجي للأمة دي حد يفيدها ..

بقول لنفسي كدة .. دة احنا عددنا كبير أوي , و الانسان ربنا كرمه ,

سوري في التشبيه , منتيش هتربي مزرعة دواجن , تزودي عددها و خلاص ..

في ناس كتير اتجوزت و لم تفكر مرة ايه الهدف من انشاء أسرة أصلا ,

جابوا أولاد و بنات , صرفوا عليهم و أكلوهم و دخلوهم كليات و بعد لما اتخرجوا جوزوهم و قالوا ( احنا كدة عملنا رسالتنا في الحياة ) و تتكرر المسألة ..

أجيال تولد في الدنيا و تعيش و تموت دون أن تصلح شيء أو تقدم شيء ..

هل هذه العبرة من خلق الانسان ؟؟

أكيد لأ ..

حواء بيدها اصلاح الأجيال ..

هي حواء قليلة في البلد دي ؟؟


يللا نقترح على بعض أفكار حول هذا الصدد ..

======================


Gohary

[river]

دكتورة / فارماسيستينا
جزاكى الله خيرا على الموضوع
فعلااا الموضوع ده مهم جداااااااااااا
وكلنا لازم ناخد بالنا منه
سواء ادم او حواء
لما بقعد افكر واتصور حياتى المستقبلية ان شاء الله يعنى بلاقيها مليئة بعلامات الاستفهام فى الايام دى

وطبعل مسئولية الاب والام مهمة جدااااااا فى انشاء جيل صالح للامة

بس العبء على الام اكتر
ومن اسمى اهداف الزواج انشاء جيل وذرية صالحة تتقى الله وتفيد الامة

انا شايفة ان اهم حاجة التربية الاسلامية
حفظ القران الكريم وتعليمهم اسس المبادئ الاسلامية

غير كدا علاقة الاب بالام مهمة اوووى وبتأثر فى الاطفال جداااااااا
دى نقطة مهمة وفيه ناس مش بتاخد بالها من النقطة دى

وبردو لازم اعرفهم من هما اطفال ايه هدف الحياة

لازم اعرضهم لمواقف الحياة
يعنى مثلا لما انزل اشترى حاجة اخد بناتى معايا
لما باباهم ينزل مشوار ياخدهم معاه
عشان يكتسبوا خبرة فى الحياة

فيه حاجات كتيرة اووووووى بس انا مش مجمعة
وانا طولت عليكى
وباحييكى على اثراء الموضوع ده

واتمنى لكى مزيد من التفوق والابداع

[pharmacistina]

حدوتة قبل النوم


حدوتة قبل النوم , من أهم الوسائل اللي تقدر بيها الأم تزرع القيم الصحيحة في أولادها ,

أنا في رأيي انها مهمة جدااا ..

لأنك بيها تقدري تتحكمي في العقل الباطن للطفل , خصوصا قبل ما ينام ..

و لأن كل الأطفال بتحب الحواديت , استخدمي حدوتة قبل النوم في تهذيب أولادك ..

أنا فاكرة حواديت قبل النوم اللي ماما كانت بتحكيها لي ..

من تأليفها ..

البنت فلانة , اللي كانت بتكدب ع الناس و بعدين حصل لها كذا .. و في الآخر قررت انها مش هتكدب تاني أبداا

قصة عن الأمانة ..

قصة ليلى الحمراء و الذئب

الذئب أكل ليلى لأنها لم تسمع كلام مامتها لما قالت لها ما تكلمش حد ما تعرفهوش ..

و هكذا ..

صدقيني طريقة جميلة جداا و مقنعة و فعالة ..

و الفايدة التانية انها بتنمي حب الاستماع عند الطفل , حتى لما يكبر و يبقى في فصل أو في محاضرة هيعرف يحسن الانصات للمحاضر ..

[Mohamed Al Gohary]

طيب وآدم مش من حقه يرد ويشارك ولا ايه !!

طب انا هرد واشارك بقى .. اصل انا المشرف
لا بجد موضوع رائع .. وسعيد جدا بوجودك على ساحة المناقشات دكتورة فارماسيستينا ..

الحقيقه فعلا الايام دي التربية المنزلية بقت لها دور رئيسي وكبير جدا .. يعني هضرب لكم مثال جميل .. ولاد أخويا راحوا الحضانه ما يقرب من 3 شهور تقريبا .. متعلموش اى حاجه والله .. وبعدها حصلت ظروف وسابوا الحضانه وبقوا يقضوا الوقت كله مع جدتهم .. شهر بالظبط .. ولقيتهم حافظين الفاتحه والمعوذات .. وحديث بنى الاسلام على خمس .. وشوية اغاني جميله .. بتاعة الاطفال دي ..

بجد جدتهم قدرت تعمل معاهم اللى الحضانه - وهى من المفروض انها تعتبر مؤسسه تربوية - مقدرتش تعمله ..

اما الاساليب المتبعه .. فلي حديث فيها لاحق .. بس لأسلوب سلبي مش إيجابي ..


تحياتي واحترامي لكي يا دكتورة ..

[pharmacistina]

آدم يشرفنا ..

بجد جدتهم قدرت تعمل معاهم اللى الحضانه - وهى من المفروض انها تعتبر مؤسسه تربوية - مقدرتش تعمله ..

طبعا ..

هي دي النقطة الأساسية في موضوعنا ..

محدش يا جماعة سواء شاب او فتاة يعمل حسابه ان المدرسة هتربي أولاده ..

بل على العكس , احنا لازم ندور على طريقة نحمي بيها الأطفال من العادات السيئة اللي ممكن يكتسبوها من المدرسة ..

مثال حدث بالفعل : الأبلة في مدرسة ابتدائية جالها موجه فجأة , و كان المفروض انها ماشية في التدريس بخطة معينة , و طبعا انتو عارفين المدرسين في المدارس الحكومية ما شاء الله على اخلاصهم في الشغل ..

المهم ..

الأبلة طلبت من الأطفال في سنة ثانية ابتدائي انهم يقولوا للموجه لو سألهم انهم أخدوا الدرس الفلاني ..

جه الموجه سأل بنوتة صغيرة ( بنت عمتي ) سؤال في درس ماكانتش الأبلة شرحته ..

البنت ردت على الموجه ببراءة ( لسة ما أخدناهوش يا أستاذ )

بعد لما الموجه مشي الأبلة مسكت البنت شتايم و تهديدات ( و الله لهوريكي , أنا مش قلتلكم كذا .... )

اتفضلوا دور المدرسة في التربية و التعليم ..

ان شاء الله مش هودي أولادي مدرسة حكومية في مصر , لأني عارفة كويس ان المدرسة هتبوظهم و تهدم اللي أنا بعمله معاهم ..

نورت متصفحنا يا أخونا الكريم Gohary و نتمنى تجاوبكم دائما ..

[pharmacistina]

أختنا river

عفوا لسة واخدة بالي من مشاركتك ..

غير كدا علاقة الاب بالام مهمة اوووى وبتأثر فى الاطفال جداااااااا
دى نقطة مهمة وفيه ناس مش بتاخد بالها من النقطة دى

أكيد طبعا ..

علاقة الأم و الأب مهمة لأنها لو متوترة دة بيخلق حالة من عدم الاستقرار النفسي و الخوف عند الأطفال ..

و له آثار عليهم بعد لما يكبروا ..

شكرا لمشاركتك عزيزتي river

[muna7assan]

وعليكم السلام ورحمه الله وبركاته

توبيك جميل كالعاده يا د.فارمسستينا


هل فكرتي مرة لما يكون ليكي family ..

هتعامل ازاي أولادك , هتتصرفي معاهم ازاي , هتعاقبي ازاي ,

مراهقة أولادك .. هتتصرفي ازاي في مشاكل هذه الفترة العصيبة ..

تربية البنات تختلف عن تربية الأولاد ..

ايوه فعلا الموضوع دا فكرت قبل كده فيه بالذات فى الفتره الاخيره لما دخلت الجامعه وشفت نوعيات كتير من الشباب والبنات اللى بجد خفت منهم وزعلت انهم هايكونوا مسئولين عن اجيال بعد كده
بالاضافه ان ليا اختى اصغر منى بكتير وتقريبا انا شاركت بكتير فى تربيتها لأن كانت بتقضى اغلب الوقت معايا وماما فى الشغل
اتعلمت كتير جدا منها

في ظل النحلال الأخلاقي و الاعلام الهابط , تفتكروا ممكن نربي جيل محترم ؟؟!!!

ايوه انا شايفه اننا ممكن نربى جيل محترم عن طريق اننا نلفت نظره للسئ فى مجتمعه حتى لو كان فى الاعلام او فى المدرسه ونخليه يشارك فى نقده

تعالوا نعطي لبعض أفكار حلوة ..

في حاجات ماما عملتها معانا دلوقت لما كبرنا قدرناها و فهمناها و قررنا نعملها , و حاجات تانية ماكانتش كويسة قررنا اننا ما نعملهاش ..

فعلا فيه حاجات كتير جدا لما بأفتكرها بالاقى انها كانت صح جدا
يمكن اللى ساعد ماما انها دارسه رياض اطفال وتربوى
طبعا مش كل الناس اللى ربوا اولادهم صح كانوا دارسين
بس دلوقتى لما باشوف تربيه بنات لسه متزوجين قريب لأولادهم باعرف انها عملت لنا حاجات كتير صح هأقولها ان شاء الله


ملحوظة : الوعي بهذا الأمر هام جداااااااا قبل الارتباط ..

لأنه ليس المهم انك تجيبي أولاد و بنات , العبرة مش بالعدد ..

لكن المهم انك تنتجي للأمة دي حد يفيدها ..

بقول لنفسي كدة .. دة احنا عددنا كبير أوي , و الانسان ربنا كرمه ,

سوري في التشبيه , منتيش هتربي مزرعة دواجن , تزودي عددها و خلاص ..

في ناس كتير اتجوزت و لم تفكر مرة ايه الهدف من انشاء أسرة أصلا ,

جابوا أولاد و بنات , صرفوا عليهم و أكلوهم و دخلوهم كليات و بعد لما اتخرجوا جوزوهم و قالوا ( احنا كدة عملنا رسالتنا في الحياة ) و تتكرر المسألة ..

أجيال تولد في الدنيا و تعيش و تموت دون أن تصلح شيء أو تقدم شيء ..

هل هذه العبرة من خلق الانسان ؟؟

أكيد لأ ..

حواء بيدها اصلاح الأجيال ..

هي حواء قليلة في البلد دي ؟؟

معاكى فى كل كلمه قولتيها
احنا علينا دور كبير جدا ونفسى كل بنت تدرك دا وتضعه امام عينيها

يللا نقترح على بعض أفكار حول هذا الصدد

فتره قبل الحضانه
فتره مهمه جدا فى حياه الطفل

انا واخواتى دخلنا الحضانه واحنا بنجمع بالحمل
يعنى نجمع 23+9

حاجه الاطفال بياخدوها فى تانيه حضانه تقريبا
وبنكتب الحروف وكلمات عربى وشويه انجليزى

دى حاجه مهمه جدا ان الام تبدأ من الصيف اللى قبل دخوله الحضانه انها تمسكه ورقه وقلم وتكتب له كلمات وترسم جمبها معناها علشان ترتبط الصوره بشكل الكلمه دى فى دماغه

زى ما قلتى ان المدراس اصبحت ضعيفه جدا
مش معقول يكون دا سبب او شماعه نعلق عليها فشل وضعف مستوى اولادنا
المدرسه بتصرف كتب

لازم افتح الكتب دى مع اولادى وادور فيها واضيفلهم عليها

فيه حاجات كتير جدا لازم كل واحده تكون عارفه انها لازم تعملها علشان تربى اطفال اسوياء سواء اخلاقيا او فكريا او دينيا

هأكمل فى مشاركه تانيه ان شاء الله

[Mohamed Al Gohary]

الحاجه السلبيه اللى كنت عاوز اكلم عنها .. وكنت اكلمت فيها قبل كده فى برنامج فى الراديو
هى ان الطفل بيكون عنده طاقة حركه كبيرة .. عاوز يطلعها .. فبتظهر فى شكل شقاوة .. وطبعا الام والاب عاوزين الطفل يهدى او ينام .. فنقعد نسمع العبارات التقليديه نام يا نونا نام واجيب لك جوز حمام
وطبعا الطفل مش بيستجيب بسهوله .. يبدوا بقى فى الاسلوب السلبي جدا اللى بيظهر اثره بعد كده للاسف .. تلاقي الام او الاب .. يقول خلاص يا بعبع .. امشي محمد هينام خلاص .. ويبدا الام والاب فى اطلاق العديد من المسميات الغريبه لاشخاص وهميين .. طبعا كلنا سمعنا عن أبو رجل مسلوخه
والطفل للاسف بيكبر وعنده اعتقاد فى الاشياء دى وان فيه اشخاص مش إنس عاوزين يأذوه وخلاص .. وللاسف بتلاقي ناس كبيرة ويقولك انا بخاف انام فى الضلمه .. او يقولك انا مبعرفش انام الا لما اغطي وشي ..


للاسف ده اسلوب غلط بالمره .. اضافه كمان ان كبت الطاقه الحركيه اللى بتبقى عند الاطفال ده بيسبب تاخر فى النمو الجسدي .. لان بيبقى فيه طاقة مخزونه جوه مش عارفه تطلع ويتم تعوضيها .. لتتم دورة الحياة الطبيعية ..

[pharmacistina]

الهوايات

مهم جدااا تنمية الهوايات عند الأطفال ..

لأن احنا في مجتمعنا المعاصر الأب و الأم بيفضلوا يقولوا لأولادهم ( ذاكروا ) .. المذاكرة , كل شوية المذاكرة ..

لازم تسيب أولادك يمارسوا هواياتهم ,

أنا زمان كنت بحب أرسم و بابا كان بيجيبلي ألوان معجون و دفاتر الرسم ,


لما كبرت شوية أنا انشغلت عن الرسم ,


خلي أولادك يلعبوا و يمارسوا هواياتهم كويس ..

لأن الهوايات بتزيد الذكاء و بتنشط ..

سيبوا الأولاد يلعبوا كرة قدم , شطرنج , أي رياضة ..

خلوهم يستمتعوا بالحياة ..

و المذاكرة لها برده أوقات ,

لكن للأسف يمكن البعض مننا كان أكتر كلمة بيسمعها في البيت ( ذاكري .. ذاكري .. )

[muna7assan]

وطبعا الطفل مش بيستجيب بسهوله .. يبدوا بقى فى الاسلوب السلبي جدا اللى بيظهر اثره بعد كده للاسف .. تلاقي الام او الاب .. يقول خلاص يا بعبع .. امشي محمد هينام خلاص

نعتبر محمد دا ارتجال
~~~~~~~~
شفت فى عيلتنا حاجه زى ده
الطفل شقى جدا وزى ما بتقول يا د.محمد عنده طاقه كبيره بس طبيعيه لانه طفل ولسه فى الحضانه وبيجرى وبيلعب
وللأسف اهله مش عايزين دوشه فبيلجأوا للصوت العالى او العقاب على انه جرى او وقع حاجه غصب عنه
المفروض على الام والاب كمان انهم يوجهوا طاقته دى فى ناحيه ايجابيه
فى انه يتلعم حاجه جديده