لية ااحنا بنزاكر من الورق؟

[uzuris2006]

سؤال مهم ياجماعة ومحدش واخد بالة منة هو احنا لية بنزاكر من الورق ومش بنزاكر من الكتاب المدرسى قصدى الجامعى؟ياترى هو استسهال ولا الورق احسن من الكتب ولا احنا اخدنا على المزكرات من ايام الثانوية العامة؟بصراحة انا عن نفسى مقدرش امسك كتاب وازاكر منة انا اصلا مش طايق امسك مزكرة وكل دكتور يدخل يقولك انا الورق معايا وهجيب الامتحان من براة ورغم كدة بنزاكر منة ممكن حد يقولى الظاهرة دى سببها اية ولو هى غلط نعالجها ازاى؟ مستنى رايكم

[Alaa_Resala]

عشان الورق جايب المختصر المفيد
شكله حلو يفتح النفس للمذاكرة
وعشان الكتب بتبقى طريقة السرد فيها مملة شوية وفيها رتابة

انا لما بلاقى كتاب حلو مش بلجأ للورق
وده زي كتب الفارما
وكتاب الصيدلانيات جزء د/حمدى عبد العليم ود/عبد المنعم فى سنة تانية

[annocent laugh]

بصراحه شكل الكتب يفرح
احنا ايام ثانوى كنا غالبا بنفتح كتاب المدرسة ايام الامتحانات
عشان الاجابات النموزجية
لكن فى الكلية عشان نعرف نجمع اجابات اصلا يبقى المفروض ما نفتحش الكتاب
خالص بصراحة شكله ممل جدا واللى يتكتب فى سطرين بيتحكى فى 15 صفحة

[أمــ هـنـد ــة الله]

فعلا ده موضوع عايز مناقشة
وفيه أسباب كتيرة تخلينا نذاكر من الورق وهى:
-من اول ما بدأنا نتعلم وأحنا بناخد دروس وبنذاكر من المذكرات وبنركن الكتاب على جنب
وده خلانا ما نحبش القرأة
-ودايما عايزين الشىء المختصر وعايزين كل شىء على الجاهز
-فابالتالى فى الجامعة نفس النظام
بس احنا معذورين شوية نقول فى ايه؟
أولا مشكلة السفر فده فى حد ذاتة متعب فلما تيجى الجامعة فبتكون مرهق وتركيزك قليل واكيد بيفوتنا نقاط كتير
أو لما بتغيب يوم لظروف معينة وغيرها وغيرها
يعنى فى النهاية هتبحث عن شىء يعوض اللى فاتك لان مش هتعرف تروح للدكتور وتقوله عيد تانى وحتى لو حصل فهيكون مرة لا اكثر
نيجى لنقطة أنت بتفهم من الدكتور أصلا ولا لأ
دى برده مشكلة
فيه دكاترة كتير مش بفهم منهم وبتعقد وبتكون طريقتهم فى الشرح مش سلسه
وأنى أقدر ادون وراهم
طب أعمل أيه غير انى اروح اجيب الورق ده!!!!!
وعلى فكرة كتير نصحونى فى البداية أنى اشترى الورق ده لانه كويس
وانا حاليا بذاكر منه لانى بلاقى فيه ترتيب وتنظيم واللى كاتبه دكتور فاهم
مش اى حد
غير كده الحمد لله بفهم منه اكتر من الدكتور
الخلاصة :اننا ما اتعودناش الاعتماد على نفسنا من بداية التعليم واعتمدنا على الدروس الخصوصية
لوكان أهلنا يعرفوا ان هيجى يوم وندخل الجامعة اللى لازم الواحد يعتمد فيها على نفسه
ما كناش سبنا الكتاب من ادينا وكنا أحنا اللى نلخص وندور ونبحث
لكن ذى ما قولت عايزين اللوزة مقشرة
يارب أكون افدت

[Dr.soma]

يااااااااااااااااااااااااااجماعه الموضوع بسيط جدا
الورق اللي بينزل دا هو المحاضرات اللي الدكاتره بيدوها بالمللي ولو جمعهوها وجابوا الامتحان من براها يبقي محدش هينجح لان مش الكل بيمسك الكتاب ويزاكره سطر سطر
الورق هو المختصر المفيد وحتي بيبقي اسهل
وربنا يوفقنا كلنا بس احنا نعمل اللي علينا

[Doctor_Ahmed]

أغلب الدكاتره مش بيتقيدوا بالكتاب
ولما الورق ينزل نفس المحاضرات يجيبوه
وتلاقي في الأمتحان أسئله تخليك طالع تقول " ايه اللي جاب القلعه جنب البحر"

[Amira]

انا رايي ان الكتاب اصلا مش بيفهم حد لكن المذكرات بتبقى مبسطه وسهله انا حاولت اطلع المحاضره من الكتاب عشان اذاكرها ماعرفتش وذاكرتها من المذكره اصلا الكتب بتعقد وحتى مابيبقوش عاملين حسابهم اننا فى اعدادى مش دكاتره

[دينا عبده]

انا رايى ان دى مساله تعود من ابتدائى وحتى الثانوى اتعودنا نذاكر من الورق وكمان الورق اسهل من مذاكره الكتاب الممل جدا واللى بيعتمد على السرد

[Pharmcist_girl]

العيب فى بعض الدكاترة متعرفش تكتب وراهم ومتقدرش تفهم منهم والمدرج زحمة والدنيا حر ولو جينا للمذاكرة مفيش حاجة اذاكر منها لو واحد فتح الكتاب هيحس ان الكتاب فيه حاجات مختلفة ومش منظم ،الورق يجبيلنا المحاضرة بالضبط بالحرف غالبا وبعدين احنا وجدنا ان كله بيعمل كده جت علينا يعنى ده عادة متوارثه من الاجيال السابقه............

[:|©؛°¨¨°؛©الصيدلى الذهبى©]

بصراحه الكتاب مايشجعش.... انا ايام الثانويه كنت بذاكر من الكتب بتاع الوزاره اكتر من المذكرات بس دلوقتى صعبه