رحلتي في منتدى الأطباء

[pharmacistina]

رحلتي في منتدى الأطباء

السلام عليكم ورحمة الله وبركاته

كل عام و أنتم بخير و صحة و سعادة ..

بعد التحية لكم اخواني و أخواتي زملائي و زميلاتي الأعزاء طلاب الصيدلة ..

طلاب الصيدلة في جامعة المنصورة و في غير جامعة المنصورة ..

هذا الموضوع من الموضوعات التي قد لا تكون مهمة بشكل كبير , الا أن شيوعها يجعل منها أمر يستحق أن يكون محسوما , خصوصا بالنسبة لي و لزملائي المقبلين على التخرج ( ان شاء الله ) و التعامل مع المجتمع الصحي المهني بكل أفراده طبيب و ممرضة و غيره ..


موضوع تحدثنا فيه كثيرا ,

منذ أن سجلت في هذا المنتدى , مرت علي العديد و العديد من الصفحات التي تناقش نفس الفكرة ..


مكانة الصيدلي

كرامة الصيدلي

امتهان الأطباء للصيدلي

الأطباء جعلوا كرامة الصيادلة ...

هل الصيادلة بقالين ؟

و غيرها العديد من الموضوعات التي تناقش نفس الفكرة ..

ورغم اقتناعي التام بكلية الصيدلة قبل أن أدخلها , ورغم كون كلية الصيدلة رغبتي الأولى في استمارة الثانوية العامة , ورغم حبي الحمد لله لدراسة كلية الصيدلة ..

كان لابد لي أن أحسم أمر كهذا مع نفسي لأني قد أتعرض لهذا الأمر في مستقبلي المهني ..

كان لابد أن أكون متوقعة و مستعدة و عارفة ظروف و نظرة الناس ليا كصيدلانية ..


حبي للصيدلة ( الحمد لله ) أكبر من نظرة الناس , لكن مع ذلك كان لازم نحسم هذا الأمر مع أنفسنا و نعرف واقعنا ..


منذ فترة أكثر من شهر , أحد زملاءنا في الفرقة الأولى على ما أذكر عمل موضوع عن رأي الأطباء في الصيادلة ..

و حط لنا رابط المنتدى الطبي اللي قرأ فيه نقاشات مطولة بين أطباء و صيادلة لا أنكر أنها كانت تحوي قدرا عظيما من الاساءة و الاستهانة و الامتهان من جانب بعض الأطباء ..


كلنا اتعصبنا , طبيعي بنحب كليتنا و نغير و نزعل لما حد يقول كدة على مهنة عريقة و عظيمة زي مهنة الصيدلة ..

قررت أن أسجل اشتراك في هذا المنتدى الطبي ..

في البداية كنت أرد ( باحترام طبعا وبدون تطاول ) على الاساءات و الامتهانات و التهم الموجهة الى الصيادلة كلمة بكلمة , و كنت أضيع الوقت في ذلك , فلا أجد غير ردود أخرى و تعليقات مطولة و كلام مكرر للمرة الألف يستنزف كل ذلك المزيد من الوقت و كل ذلك عديم الفائدة ..



قررت بعد ذلك أن أتوقف تماما عن الرد على الاهانات و الاساءات .. و أن أدخل الى منتدى الأطباء بشكل طبيعي ( غير منافس ) و ذلك بالمشاركة في الساحات الاجتماعية و الـ General talks و ابداء الرأي في مشاكل بعض الأفراد .. أردت أن يسقط حاجز الكراهية و الندية لي من جانب هؤلاء الأطباء ..


بعدها من الممكن أن أعرض فكرتي كصيلانية , و أري هؤلاء الأطباء ماذا تعني كلمة ( صيدلة ) التي يجهلها الأطباء و كثير من الناس حتى بعض الصيادلة أصبح لا يعرف معناها .. و الله بجد


و قد كان ذلك ..

كان لي هدفان من الاشتراك على هذا المنتدى الطبي ..

الهدف الأول : معرفة سبب امتهان بعض الأطباء لنا كصيادلة و لا أنكر وجود رغبة بداخلي للدفاع عن قومي ( الصيادلة ) حتى و ان كانوا مقصرين و ينطبق عليهم جوانب سلبية عبر عنها الأطباء بأسلوب غير لائق أحيانا ..

الهدف الثاني : أن أعبر عن الصيدلي , و أعلمهم معنى كلمة ( صيدلة ) و ما هي علومها و ما هي حدود دراستها , و أن أغير من الصورة السيئة و الخاطئة في كثير من الأحيان التي رسمها بعض الأطباء للصيادلة نتيجة تجارب فردية أصبحت تشكل فكر عام عند الأطباء ..


من واقع هذه التجربة على الشبكة العنبكبوتية أحببت أن أنقل لزملائي و زميلاتي خلاصة رأيي و ما سوف ألتزم به في حياتي المهنية ان شاء الله ..

و سيكون كلامي مدعم بكلمات قالها الأطباء بأفواههم .. اقتباسات من مشاركات الأطباء يعني ..

أحب أن نكون جميعا صادقين مع أنفسنا و مع الناس سواء صيادلة أو أطباء أو مرضى ..


و أحب أن أشير الى ملحوظة هامة ..


قررت أن تكون هذه الصفحة أخر كلام لي في حياتي بخصوص موضوع مكانة و كرامة الصيدلي , لأني عرفت حقيقة الأمر و أن مكانة الصيدلي بيدي أنا ,
أنا - الصيدلي - الذي أحدد مكانتي في المجتمع بنفسي


و سيتضح هذا في الموضوع ..

تابعوني ..


شكرا لكم ..

أختكم \ منى

الفرقة الرابعة - صيدلة المنصورة

27 - نوفمبر - 2009

[pharmacistina]

[]

هل من الممكن أن أغير وجهة نظر الأطباء و الناس تقلل من شأن الصيدلي ؟؟

المشاركة دي بس أنا حاطاها فقط دليل على كلامي , و يعلم الله .. أقسم بالله ان هذا الكلام عندي ليس مدعاة للسرور و أنا كصيدلانية لا أحتاجه اطلاقا ,

أنا مكسوفة من المشاركة دي

لأن مش حلو ان الواحد يجيب كلام الناس عنه كأنه ما صدق بقى و مبسوط يعني ..

عايزة بس أقول ان الكلام القادم المقتبس من مشاركات الأطباء , ليس مدعاة للفخر أو السرور عندي طبعا , و لكن مجرد دليل على امكانية تغيير وجهات النظر ..

أول لما سجلت في منتدى الأطباء كان كلامهم وحش و كله اهانة للصيادلة و انتقاص من المكانة .. ماكنوش يعرفوا يعني ايه صيدلي ..

بعد مشاركة عدة أسابيع ..

برافو دوك
ربنا يوفقك يارب
برافو ابناء جامعه المنصوره

المنتدى ازداد شرف بانضمامك لاسرته

د/pharmacistina88
جزاك الله خيرا على اسلوبك الهادىء فى ادارة النقاش
حضرتك نورت المنتدى

أحيى حضرتك على تفكيرك العلمى

تسلم ايديكي يا دكتورة
كلام مهم ومفيد وخاصة لمن يعملون في طب الاطفال زينا
ولا تحرمينا من مشاركات ايجابية زي دي

شكرا يادكتورة علي الشرح الجميل ده

و أكيد حضرتك أدرى مننا بالجانب الكيميائى و تحضير الدواء
دى مقدرش أناقش فيها

جزاكي الله خيرا يا دكتورة فعلا انا سمعت هذه المعلومة والحمد لله اني اتاكدت منها من حضرتك\
وياريت حضرتك تبقي علي طول كده تنبهي علي حاجات زي دي .جزاكي الله خيرا

بالاضافة الى عمل قسم مستقل بعنوان ( مناقشات الصيادلة ) في داخل هذا المنتدى ..

السلام عليكم

ألف مبروك ليكم يا دكاترة افتتاح قسم خاص بيكم واللى أكيد هتلاقوا فيه نفسكم جامد وهتفيدوا وتستفيدوا منه كتير

معلش جات متأخر بس غصب عنى

انا كان نفسى ادخل صيدلة بجد وكنت هموت عليها بس والدى بقى الله يسامحه رفض رغم انه صيدلى

يلا الحمد لله محدش عارف الخير فين

عامة مبروك عليكم وان شاء الله تكون اضاف ليكم ولينا

الف الف مبروك يا دكاترة
القسم ده غالي عليا اوي والله
انا كمان كان نفسي ادخل صيدله

الف مبروك عليكم القسم الجديد
تقريبا معظم الاطباء ان لم يكن جميعهم كان نفسهم يدخلوا صيدلة
لكن الحمد لله كل شئ بارادة الله وكل يسر لما خلق له..

فعلا القسم ده اضافه هايله للمنتدى

الناس دي كانت بتهزأ بينا جداا في الأول ..

سبحان مغير الأحوال





الدرس الأول من التجربة ..


دع عقلك و فكرك يعبر عن الصيدلي ..

لا ترد الشتيمة بالشتيمة ,

ولا ترد الاساءة بالاساءة ..

عقلك يرد و يرفع من مكانة الصيدلي عند جميع الناس ..



أؤكد .. الكلام السابق لا يزيدني أي شيء , حسبي أن أحس تقدير و تشجيع أساتذتي لي


و للحديث بقية

[Dr/HULK]

منتدى .......؟؟؟؟؟

احسن فيه واحد معانا فى الدفعة دخل عمل حرب بينا وبينهم

وشتم واتشتم وفى الاخر طردوه

انا مردتش ادخل المنتدى ده

لانى مش محتاج اثبت نفسى فى حاجة مفروغ منها

ومفيش منها فايدة

[عبدالله عبدالرحمن]

كل عام وحضرتك بخير
وعيد سعيد
بصراحة
من خلال متابعتى للمنتدى ده
فأنا أشهد ان حضرتك سببتى انقلاب
كامل فيه
لدرجة انهم عملوا قسم خاص لمناقشات الصيادلة
بعد ما شافو الأكتفيتى العالية
والموضوعات المفيدة اللى كانت فيه

تجربة حضرتك وضحت لى كثير
اذتى الصيدلى يقدر بذكاء يحول الطبيب
لصفه ويقنعه بدوره دون مشاحنات
مش زى مامحمد قال
زميلنا اللى دخل منتدى الأطباء اعطى انطباع سيء
بشدة
على عكس حضرتك تماما
منتظر باقى الموضوع
^ ^

[pharmacistina]

لأ طبعا ميصحش ان الواحد يشتم الناس و يسيء اليهم مهما حصل منهم ..

الشتيمة و الغلط في الناس دليل على ضعف موقف الشخص ,

أزعق ليه ؟؟

أنا as a pharmacist مش محتاج اني أغلط في حد عشان أثبت نفسي ..


و بعدين في حاجة :

الدرس الثاني : الأطباء ليسوا أعداء للصيادلة

لماذا نضع في اعتبارنا أن الطبيب عدو نا ؟؟

بالعكس ..

الطبيب يقوم بدور فعال و مهم في تشخيصه للمرض و ان كانت الثقافة الصحية أعطته صلاحية زائدة في الأدوية فهذا ليس ذنبه و لكن ذنب أمة تأخرت عن ركب الحضارة في كل المجالات ..

و بالتالي لا يجب أن ننظر الى الطبيب على أنه عدو ..

كراهية الناس حرام و ليس لها مبرر ..

على العكس لو تعاوننا صيدلي و طبيب لنختار الأفضل للمريض ,

من هم الأطباء ؟؟

الأطباء ناس مننا , أختي و أختك أو والدك أو والدتك أو صديقك أو أخوك ..

و أنا عندي فكرة ان كتير مننا - نحن طلاب الصيدلة - أهله أطباء و رفضوا انه يدخل طب

دول مسلمين , اياكم أن يسيطر احساس البغض و عدم الارتياح على قلوبنا مهما حدث ..

اذا تحسنت علاقة الطبيب بالصيدلي , عندها سيقبل بصدر رحب تعديل الروشتة اذا كان ذلك مطلوبا أو مستحبا ..

لذلك لا تضع في اعتبارك أبدااا ان الطبيب عدوك و انه سبب في تدهور أحوال المهنة ,

لأن السبب في تدهور أحوال المهنة هو : نحن الصيادلة .. و الله نحن السبب أولا و أخيرا ..
-----

الدرس الثالث : اخواني الصيادلة , ليكن ارضاء الله غايتنا و سقف طموحنا

أما و قد تكلمنا عن تغيير وجهة نظر الناس فينا اذا أثبتنا نفسنا و كنا صيادلة جديرين بثقة الأطباء و الناس عموما ..

فأريد أن أتكلم عن نقطة أهم من تغيير وجهة نظر الناس ..

هل سأقضي حياتي أكدح و أجتهد لكي أثبت دوري للناس ؟؟؟؟!!!!!!

هل سيكون ارضاء الناس هو منتهى أحلامي و كل ما أتمناه ؟؟؟؟!!!

هل سوف أستمر باضاعة الوقت لاثبات أن الصيادلة لهم دور فعال جدااا في العملية الدوائية ؟؟؟!!!!


أين مرضاة الله من كل هذا بالله عليكم قولوا لي ؟؟


ليكن ارضاء الله غايتنا الأولى و الأخيرة ..

اذا أنكر الناس دوري , لن أحزن ..

يكفي أن الله يراني و يعلم أني أجتهد و أؤدي دوري كصيدلي باتقان لا أبغي من وراء ذلك غير الثواب من الله و حسن الجزاء ..

ارضاء الناس أصلا غاية لا تدرك ..

فلينكر الناس أطباء و غيرهم دوري , يكفي أن يرضى عني الله و أنا أقدم للناس خدمة و دور في الرعاية الصحية حتى لو أنكروا علي دوري في الدنيا , سأنتظر حسن الجزاء من الله في الآخرة ..

سوف أبدأ بنفسي في الاصلاح , و سوف أتوأجد في الصيدلية و أفحص و أدقق في الروشتة و لا أصرفها الا اذا كانت مناسبة للمريض , و سوف أقوم بعمل تحضيرات عالية الجودة , و سوف أزيد معرفتي و أقرأ كل يوم لكي لا أتخلف عن المستوى الصيدلي المفترض أن أكون فيه ,

و اذا كنت صيدلي أعمل في مصنع سوف أراعي ضميري و لن أسمح بمخالفات أيا كانت ..

و اذا كنت صيدلي باحث سوف أجتهد و أجد للناس أدوية جديدة أو أطور الأدوية الموجودة ..

كل ذلك لأن الله أمرنا باتقان العمل ..

اعمل جيدا لارضاء الله , فان تحقق ارضاء الناس فخير وبركة وان أنكر الناس دورك و استهانوا بك فلا تحزن يكفيك أن يرضى الله عنك و يقبل عملك الحسن ..


لذلك قررت .. لن أرد أبدااا على أي أحد يقول الصيادلة بقالين أو الصيادلة ليس لهم دور ..

لأن دوري الذي سوف أقوم يعلمه الله و سيجزيني بكل الخير و هذا مرادي ..

لا تحزن اذا استهان بك أطباء أو غيرهم ,

عادي .. هما مين أصلااا الأطباء أو غيرهم ؟؟

يا سلام علينا كصيادلة لما يكون ربنا راضي عن عملنا , هنحتاج رأي الناس في ايه بعد كدة ؟؟

يعني أنا لما الأطباء قالوا عني كلام كويس و مدحوني , ايه اللي زاد عليا دلوقت ؟؟

هل حد فيهم جابلي شيكولاتة مثلا , و لا حد منهم اداني حاجة ؟؟

اياك أن يكون مدح الناس و مرضاتهم هدفك لأن دة هدف قليل و تافه ..

أي مدح الناس تقوله ليك انساه ,

المهم أن يزكيك الله يوم القيامة بحسن عملك يا أخي ..

بلاش كلام فاضي ..



للحديث بقية

[pharmacistina]

الدرس الرابع : Read to Lead

كلمة أستاذنا دكتور عبد الله موافي ..



ايوة , لن نكون صيادلة حقيقيين الا اذا تعودنا على القراءة , ليس فقط في مناهجنا , لكن في جميع المجالات الصيدلية ..

أصل في البعض مننا بيزعل و يقول ( دة احنا مناهجنا دي ضعيفة , دة احنا كدة عمرنا ما هنبقى صيادلة كويسين )

بقولكم و لنفسي .. لأ يا جماعة ..

الكلية خمس سنين , يستحيل تتعلم الصيدلة في خمس سنين ..

و الله العظيم لو حتى كلية الصيدلة بقت عشر سنين , و الله لا تكفيك أبدااا لتعلم الصيدلة ..

أقصد , الكلية بتعطينا فكرة عن كل المجالات الصيدلية المشهورة ,

يعني ان شاء الله أنا هتخرج و عندي فكرة عن العقاقير , و عندي فكرة عن الصيدلانيات , و عندي فكرة عن الفارماكولوجي و عندي فكرة عن الطبية و عندي فكرة عن التحليلية .. الخ .....

الباقي علينا احنا ,

مهو احنا دلوقت مش صغيرين , الطالب الجامعي كبير و المفروض يكون independent

احنا نحمد ربنا , عندنا كتب مطبوعة و عندنا انترنت ..

ليه مش بنقرأ و نعلم نفسنا ؟؟؟؟؟!!!!!

المعلومة أصبح الحصول عليها أسهل بكتير من زمان ..

أساتذتنا كانوا بيروحوا المكتبة ينقلوا بخط ايدهم من الـ Text book المعلومات , و مع ذلك كان المستوى الصيدلي أعلى بكتير من دلوقت لأن كان في جدية ..

و خصوصا في مجال زي الأدوية , كل يوم و كل لحظة في دواء جديد بيكتشف و دواء آخر يلغى استخدامه , يعني المجال عايز حد متابع باستمرار .. و طبعا احنا و أنا أولكم في سبات عميق ..

اقرأ ..

أول كلمة نزلت في القرآن الكريم ..

أهمية القراءة في كونها بتعطيك خبرة تحتاج الى سنين لاكتسابها ,

كل معلومة في أي كتاب ستقرأه , أي معلومة انقضى فيها أعمار ناس ..

التوصل لأي حقيقة علمية يحتاج الى سنين و سنين ..

كل دة ممكن تاخده انت ع الجاهز بصفحة تقرأها و تفهمها ..

القراءة بتكبر العقل جداااا , يعني ممكن تقابل شخص مش كبير في العمر لكن كبير في العقل و دة بفضل القراءة ,

لأن القراءة غذاء العقل و الله ..

لكن الانسان اللي مش بيقرأ , هيفضل عقله مقصور على خبراته و الحاجات اللي عاشها و دي معرفة قليلة ..

تقدر تحصد أكبر قدر من خبرات الغير و من حقائق هذه الدنيا عن طريق القرااءة ..

القراءة أوصانا بها ربنا أولا , و أساتذتنا كلهم أيضا أوصونا بالقراءة ..

شيء وحش و ظاهرة سيئة لما نلاقي في الكلية ورق مرمي قدام اللجان ,

لما نلاقي شعبنا متعود يودي الكتب عند بتاع المقلة عشان يتعمل منها قراطيس اللب و الحمص ..

غلط طبعا اننا نرمي أوراقنا اللي ذاكرنا منها و قرأنا منها .. احتفظ بكل أوراقك و كتبك .. بكرة تحتاجها أشد الحاجة ..

م الآخر اقرأ كتير لو عايز تبقى صيدلي بجد ,

لو قرأت تأكد انك هتكون مميز ان شاء الله ,

يعني محدش مننا يتحجج و يقول المناهج و مش عارفة ايه ..

دلوقت الكتب متحملة ع النت و كل حاجة available ..

بالله عليكم .. مجال الأدوية مهوش مجال سهل .. دة بحر واسع يغرق أكبر العلماء ..

و محدش في الدنيا دي يقدر يحصي علوم الصيدلة ولا يقدر يحصيي مجال واحد من مجالات الصيدلة ..

وربنا قال ( و ما أوتيتم من العلم الا قليلا ) .. كل المعرفة الموجودة في الدنيا طبعا قليلة في علم ربنا عز و جل ..

اقرأ و ناقش المعلومة مع زمايلك , خلونا نقعد كدة نتناظر حول معلومة و كل واحد يعبر عن رأيه ..

ساعتها هنكون صيادلة ..

و تذكر ان المفكر عباس محمود العقاد كان معاه الشهادة الابتدائية فقط , يعني ماكانش عنده مناهج دراسية رائعة يذاكر منها , لكن علم نفسه بنفسه فكان متميز و أحسن من أي حد اتعلم في جامعة ..

طبعا الكلام دة أنا أقوله لنفسي في الأول .. و لست بأفضل من أي حد .. مش بقول مواعظ ليكم فقط لكن بقولها لنفسي قبلكم


للحديث بقية ..

[pharmacistina]

الدرس الخامس : الثقة بالنفس سر النجاح

طبعا لا يخفى على أي حد مننا ان الثقة بالنفس سر أساسي و ضروري من أسرار النجاح ..

لأن لو كنت واثق في نفسك , ستجد الناس كلها واثقة فيك و دة شيء مطلوب عشان تقدر تقوم بدورك على أكمل وجه ..

[pharmacistina]

الدرس السادس : ما هي حدود تخصص الصيدلي ؟

شيء مهم ينبغي ذكره ,

كلمة pharmacist معناها ايه ؟؟

pharma يعني دواء

pharmacist يعني بتاع الدواء ..

يعني مسئول عن كل حاجة تخص الدواء من قريب أو بعيد .. بالاضافة لمستحضرات التجميل ..

في الدول المتقدمة كل أسرة لها صيدلي أهلي بتتعامل معاه باستمرار و بتثق فيه ..

و تلاقي ممكن الـ pamphlet فيها Ask your pharmacist ..

فاحنا لازم نبقى عارفين مبدئيا .. كل معلومة عن الدواء احنا مطالبين بيها و مسئولين عنها ..

يعني ميصحش الواحد يكون pharmacist يعني بتاع دواء و يجي ميعرفش الدواء دة بتاع ايه و بيتاخد ازاي و قبل و لا بعد الأكل و كام مرة في اليوم و مايتاخدش مع ايه هذا الدواء .. و ازاي يتحلل هذا الدواء و ازاي يصنع dosage forms

. الخ من المعلومات الدوائية


ولا يضر معرفة بعض المعلومات عن الأمراض ..

لكن ..

الأمراض و تشخيصها هي تخصص الطبيب ..

يعني أنا مينفعش يجيلي واحد الصيدلية أقوم أشخص ان عنده ارتفاع ضغط دم و أديله B- blcker مثلا .. مينفعش ..

لأن الأمراض و تشخيصها دة مش تخصصنا ولا شغلنا .. احنا لينا دعوة بالأدوية ..

يستثنى من ذلك أدوية الـ OTC = Over The Counter drugs التي أقر العالم بجواز صرفها بدون تذكرة طبية ..

لا تشخص أمراض , لأن هذا ليس تخصصنا , و لأنك ان أصبت 99% قد لا تصيب 1% و قد تتسبب في مشكلة لأن الأدوية مش لعبة ..

كل الكلام السابق أقصد به الصيدلي الأهلي العادي .. أنا يعني على سبيل المثال ..

بخصوص الصيدلي الاكلنيكي أو صيدلي المستشفيات , دة طبعا يتسع دوره ليشمل اختيار الدواء بناء على التشخيص الذي حدده الطبيب .. و دة بحكم دراسة الصيدلي الاكلنيكي ..

أصل اللي يحدد امكانية قيامي بدور معين هو دراستي ..

و الله لو دراستي مجهزاني أعمل حاجة بعملها ..

لازم يكون في كفاءة في العمل و عدم خلط ..

و على فكرة ..

بالنسبة لصيدلي المجتمع العادي Community pharmacist ..

اذا كانت الروشتة بها تعارض دوائي يؤذي المريض , أو بها جرعات غير مناسبة للمريض ( عنده حاجة في الكلية مثلا ) و قمت بصرف الروشتة فاعلم بأن هذه مسئوليتك و قد قصرت فيها , و سيحاسبك الله على ذلك ,

اذا تم التشخيص غلط ( و دة ما أكثره ) فدي مسئولية الطبيب ..

اذا الروشتة اللي كتبها الطبيب فيها حاجة مش مزبوطة أيا كانت و الصيدلي صرفها فهذه مسئولية الصيدلي و ليست مسئولية الطبيب ..

و قد حكى لنا أحد أساتذتنا عن حادثة تسبب فيها اسناد الصيدلية الى طبيب ( نظرا لعدم توافر صيادلة قديما ) في وفاة حالات عديدة نتيجة عدم تخفيف الـ Nux - vomica extract
الـ strychnine في التركيزات القليلة tonic و aphrodisiac و في التركيزات العالية سم قاتل ..

و ليس أي أحد يعرف الفرق بين الـ Tincture و الـ Extract ,,

فالطبيب توكل على الله و استخدم الـ Extract بنفس الحجم بتاع الـ Tincture المنصوص عليه في الكتاب ..

و للعلم هذا الطبيب أخد براءة في الآخر , لأن العيب مش منه , العيب من اللي خلوه يمسك مسئولية الصيدلية ..


فعتدما يعمل المرء بغير عمله ( طبيب كان أو صيدلي ) تحدث الكوارث و يكون الناس هم الضحايا ..

احنا كمان لما نجي نشخص أمراض أكيد هيحصل خطأ مهو دة مش تخصصنا يا جماعة ..

يقوم يجي الأطباء يقولوا ( أخطاء الصيادلة ) ..

المشكلة ان الناس عندنا هنا في مصر بسيطة شوية و على قد حالها ,

الواحد من يوم ما دخل سنة اعدادي و هما بيقولوله يا ( دكتور ) و منتظرين مننا اننا نشخص الـ Congestive heart failure و بيسألوا أسئلة صعبة و بيخلوا الواحد يضطر غصب عنه يقرأ في الأمراض ..

بيضرونا نقرأ في الأمراض و تشخيصها بعدما هربنا منها و لم ندخل كلية الطب , مش لأن تشخيص الأمراض صعب علينا .. لكن لأني لا أحب هذا المجال و لم أدرسه و لم أعمل به ..

فالواحد يراعي ضميره ,

ولا عيب اذا سألك الناس في تشخيصات و قلت لهم ( روح اكشف عند طبيب كذا ) ..

المشكلة بقى ان الناس فاكرة اي حد هتقوله ( دكتور ) يبقى بتاع كله .. يشخص و يعطي دواء و كل حاجة ..

فالأطباء بيلوموا علينا في النقطة دي و عندهم حق ,,

أصل عشان أشخص مرض المفروض أكون دارسة باطنة و أطفال و نسا و رمد الخ من مواد طب ..

و تشخيص الأمراض يعني مهوش فخر عظيم عشان الناس بتجري عليه ..

لكل واحد عمله ..

فلماذا الخلط ؟؟

طبعا في حاجات الواحد بيعرفها بالخبرة و الممارسة , يعني أنا لما يكون عندي برد بعالج نفسي .. من تكرار موضوع البرد دة بقيت عارفة مشكلتي ..

و أصبح هذا المرض Common cold حاجة متشخصة ( لأني حسيت بالأعراض دي كتير قبل كدة و كشفت قبل كدة ) فبختار لنفسي أحسن أدوية و بخف عليها بفضل الله بسرعة و ببقى تمام أوي


للحديث بقية
-----

الدرس السابع : أحسن عرض أفكارك

أول امبارح بالصدفة كان شغال برنامج على الجزيرة , مكنتش بتفرج بس التليفزيون كان شغال ..

المفروض البرنامج جايب شخصين لهم وجهات نظر مختلفة و هيتناقشوا مع بعض ..


شوية و لفت نظري بقى الزعيق ..

دة بيزعق و دة بيزعق و بعدين دة يقول ( اخرس ) و ماسحين حاجات من البرنامج و أستاذ فيصل القاسم يا عيني واقف مش عارف يعمل ايه , يحاول يهدي دة شوية و يحاول يسكت في دة شوية و يقولهم ( سوف أضطر الى الغاء البرنامج ) و هما مستمريين خمس دقايق متواصلة من الزعيق و بيهزأوا بعض و بيشوحوا بايدهم

لقيت نفسي بضحك عليهم في نفسي ..

قاعدين يزعقوا و خلاص ..

لا دة أقنع دة ولا دة سمع دة ..

لماذا يتكرر هذا المشهد في المجتمعات العربية ؟؟؟!!!

كل واحد عايز يقنع التاني برأيه بالعافية و بيعرض رأيه بأسلوب حاد ووحش ..

طريقة النقاش دليل على تحضرك ..

مينفعش نجي نناقش طبيب أو غيره , نقعد نزعق و نهزأ في بعض ..

بهدوء ممكن تعرض فكرتك و تقنع بيها العالم كله لو كانت فكرتك صحيحة و انت أحسنت العرض ..

بالراحة يا جماعة ..

تناقش بهدوء ..

و مش ضروري الناس تقتنع بفكرتك ..

و مش عيب تقتنع بفكرة الناس ..

الرفق زينة الأعمال ..

[pharmacistina]

أعتقد اني كدة حكيت عن كل التجربة بتاعة هذا المنتدى ..

وفق الله الجميع الى ما يحبه و يرضاه .. صيدلي أو طبيب أو غيره ..

و جمع الله على البر و التقوى عزائم المسلمين و نفع بهم ..

و أنا عن نفسي لن أتكلم بكلمة واحدة بعد ذلك في موضوع كرامة الصيادلة ..

لأن الأمر أصبح محسوم و أتمنى ألا أرى موضوعات من هذا القبيل بعد ذلك ..

رزقنا الله و اياكم مستقبل مشرق ننهض بأمتنا الاسلامية و بمصرنا و بمهنتنا ..

كلمة أخيرة :

على قدر أهل العزم تأتي العزائم

وتأتي على قدر الكرام المكارم

[عبدالله عبدالرحمن]

أعتقد بقى

بعد الكلام اللى حضرتك قلتيه
ياريت الموضوعات اللى زى دى

مكانة الصيدلي

كرامة الصيدلي

امتهان الأطباء للصيدلي

الأطباء جعلوا كرامة الصيادلة ...

هل الصيادلة بقالين ؟
لازم تختفى من على المنتدى
ومحدش يتكلم فىها تانى
الأمر أصبح متعلق بينا
واحنا الوحيدين اللى نقدر نحسمه
جزاكى الله خيرا
على هذا العرض
الرائع لتجربتك الخاصة
وياريت كل الأعضاء
يفهموا كويس الكلام ده
بالذات بتوع اعدادى
لأنهم اكثر ناس بيسألوا الأسئلة دى