اللى بيعاكس البنات بيحلل تصرفاته ازاى ؟

[DR DOOLA]

المعاكسة واجب قومي وحق اتجاه اي واحده نازلة الشارع وتاعبة نفسها ومتشيكه وحاطة ميكب ونازلة تقول للأرض اتهدي ما عليكي ادي ... عايزين ايه من الشباب يعني ... مش لازم يشجعوا المنتج المحلي... وكمان لما البنت دي تتعاكس والشباب يقرفها في الشارع اكيد هاتتربى وهاتتعلم الادب وتنزل الشارع بعد كده محترمة .... ماهو لو محترمة والله ما كانش حد قرب ناحيتها .

بس في مشكلة ...

البنت اللي لبسها كويس ولابسة اسدال كمان او خمار بتتعاكس ليه.؟؟؟.... ايه اللي بتتعاكس ليه ... اكيد ماشية تتمايع وتضحك في الشارع وحاطة ميكب اد كده ....لازم نربيها بردو وتنزل الشارع محترمه ... ساكتة ولا تنطق من اساسه ... مش بقولكم واجب قومي ... بنربي بنات مصر ...

طب واللي ماشية لابسه محترم ولا حاطة ميكب ولا غيره وماشية في حالها لا بتضحك ولا بتتمايع ماشية في حالها ... ...لأه بقى ما هي نازلة الشارع وحدها وقاصدة تتعاكس ايه اللي منزلها الشارع وحدها وهي عارفة الشوارع بقت عاملة ازاي ... ماهي لو محترمة بجد كانت نزلت مع باباها ولا اخوها ولا خطيبها حتى ... دي عايزة تعمل محترمة وتضحك عالشباب وتجيب عريس ... وبردو لازم نبينها على حقيقتها وتتعاكس علشان محدش يفتكرها محترمة ...

طب واللي نازلة مع اخوها ولا خطيبها ولا حتى جوزها (مش نازلة وحدها اهو) ويطلع لها واحد من ورا خطيبها ولا اخوها بيبصبص ليها كده من ورا ضهر الراجل الغلبان وعمال يشاور ويعمل حركات ويقرفها ... ... يا سلاااااااااااام ومين قاللك ان ده خطيبها ولا اخوها .. تلاقيها الواد اللي ماشية معاه ماهو لو كان خطيبها كان قعد يشوفها في بيتهم .. وانا بعاكسها علشان اعرفهم قيمتهم هما الاتنين علشان يتربوا ويبطلوا صرمحة في الشوارع ... مش بقولك واجب قومي علشان البلد والله....

طب واللي واقفه في البلكونه الغلبانه بتنشر ولا بتجيب حاجة بالسبت بيطلع لها ميت واحد من الشارع راصدينها واللي يعاكس واللي يشاور.. الله ما هي قاصداها اهي وطالعة البلكونة علشان الناس تشوفها وتتعاكس .. هي اللي عاوزة تتعاكس من الاساس .. وانا لما بعاكسها بوريها قيمتها اصلا ... هي ايه اللي طلعها البلكونة من الاساس .. تنشر .. هههه دي تلاكيك يا عمنا ... دي عاوزة تتعاكس ... ماهى لو محترمة والله ما كنت هاقرب ناحيتها ...

طب واللي قاعدة في بيتها يا ناس .. ويطلعلها من الشباك اللي عمال يبص ويبحلق فيها ويعاكسها ... شوفت اديك قلت بنفسك ياعم ... هيا اللي فاتحة الشباك علشان الراجل ده يشوفها ويعاكسها ... وتلاقيها كانت بتتمخطر قدامه رايحة جاية ومتشيكه علشان يشوفها ويعاكسها .. هي لو محترمة تفضل في بيتها وتقفل الشبابيك والبلكونات والبيبان كلها وتقعد تحت السرير كمان علشان تبقى بنت محترمة بصحيح ومحدش يشوفها خااااااالص وتدفن نفسها بالمرة...
على فكرة انا بوضح لكم ان اللى بيعاكس بيحلل تصرفاته على انه صح وبيقنع نفسه بكدة بس هى غلط مية فى المية

[marooo]

ههههههههههههههههه موضوع جامد جدا بس على كده البنت من الاول ما تنزلش من بطن مامتها وتريح نفسها خلينا جد بقى لو كل واحد عاكس بنت سواء محترمه اوغير محترمه يارييييييييييييييييييت يحط مكانها اخته ومش هقول اكتر من كده ميرسى يا دوك على الموضوع

[smart_girl]

والله معاك حق
انا عن نفسى بقيت بخاف امشى لوحدى
حتى لو البنت ماشية محترمة وفى حالها وبصة فى الارض
بردو بتتعاكس يعنى المفروض احنا نعمل ايه عشان نمشى براحتنا بعد كدا على الاقل واحنا مطمنين
مش بنمشى خايفين من اى واحد يقرب نحياتنا

تسلم الايادى ع التوبيك
جامممممممد اوووووووووى

[jojo_m]

موضوع جميل جدا
شكرا على الموضوع

[DR DOOLA]

الله اعلم يا جماعه
المعاكسه اصلها بقت ادمان

[متفائل]

شكرا يا دكتر على التوبك الرائع

و ممكن نقول لأى واحد نازل من بيتهم بالنية دى

أترضاااااااااااه لأختك ؟؟؟؟؟؟؟؟

و من عاش على شئ مات عليه

[د\بوسى ربيع]

ههههههههههه بس اللى بيفكروا بالصوره دى المتخلفين بس العقليات الفاضيه العقيمه لا بيفكروا حلال ولا حرام ولا اى حاجه ولا هما بيستفيدوا حاجه

[قناع الذهب]

يعنى هو لا عاجبه اللى حاطة ميكب ولا اللى باسدال وخمار ولا اللى خارجة مع باباها ولا خطيبها ولا جوزها
ايه مفهوم المحترمة اللى عندة اللى مفروض متتعاكسش
العيب على اللى بيعاكس مش اللى بتتعاكس بصراحة
لان مهما كانت عامله فى نفسها ولا ماشيه ازاى معاكستة دى مش هيا اللى هترجعها عن اللى ف دماغها يعنى
هوا بيعاكس عشان عايز يعاكس مش اكتر وعشان فاضى
بس موضوع لذيذ بس انا مش فاهمة الاستفتاء بصراحة ...

[DR DOOLA]

متسغربيش من الاستفتاء فى ناس بتفكر كده يا قناع الذهب و احنا بناخد الاراء من الكل

[*Aya*Verse*]

هي لو محترمة تفضل في بيتها وتقفل الشبابيك والبلكونات والبيبان كلها وتقعد تحت السرير كمان علشان تبقى بنت محترمة بصحيح ومحدش يشوفها خااااااالص وتدفن نفسها بالمرة...

هههههههههههه
حلوة برده الفكرة دى
بس ياريت اللى بيعاكس هوا اللى يعملها
يبقى ارتاح وريّح الناس
وشكرا يا دكتور ع الموضوع