موضوعي الانتخابي

[AlaDDin]

بسم الله الرحم الرحيم ..

اهلا بيكم في موضوعي الدعائي لانتخابات الاسره 2009-2010

معاكم علاء الدين ابراهيم .. ( طبعا لا يخفى القمر )

في البدايه و قبل كل حاجه ..

كلام كنت اتمنى اقوله في نهاية السنه اللي فاتت .. لكن للاسف الوقت في حفلة نهاية الانشطه بتاعة اسرتنا مكنش متاح ليا اني اقوله ..
( ربنا يسامحهم بقى .. قالولي ليك كلمه .. و طنشوني )

المهم .. انا بهنيكم كلكم ( كل اعضاء الاسره ) على السنه اللي فاتت ..

الحمد لله كانت سنه مميزه جدا في الانشطه .. و الشغل

و قدرنا نوصل اننا نبقى الاسره الاولى على مستوى الكليه ..
بمجهودنا و شغلنا وافكارنا .. و تميزنا ..

يمكن الحمد لله نجحنا جدا في مجال الشغل ( رغم التقصير و السلبيات الكتير .. اللي مش وقت الكلام عنها )

لكن من وجهة نظري اننا قلينا كتير في مجال علاقتنا ببعض ..
اتمنى من كل قلبي ان يكون من اولوياتنا السنه و السنين الجايه علاقتنا ببعض و اننا ننميها و نحاول تكون احسن ..
لأن فعلا هو ده المكسب الحقيقي من ورا الاسره .. الناس اللي احنا بنكسبهم .. و علاقتنا الكويسه ببعض ..
و ان شاء الله نحاول ان انشطة الاسره نفسها يكون فيها دايما حفلات و لقائات و تجمعات على قد ما نقدر ..

بعد نهاية السنه اللي فاتت .. انا بدعي ربنا انه يكون وفقني في المكان اللي كنت فيه ..
و ربنا عالم اني على قد ما اقدر حاولت اكون قده .. و حاولت اعمل كل اللي عليا ..

و راعيت ربنا في كل حاجه بعملها من خلاله .. و كان هدفي الاول في كل حاجه هو مصلحة الاسره و اعضائها ..

و اتمنى من كل قلبي تسامحوني على اي تقصير حصل مني .. او اي تصرف غلط .. او قرار مش مناسب .. بصفتي مقرر ..
و اي حاجه حصلت مني برضه بصفتي اخ .. او زميل .. او صديق ..


يمكن انا السنه دي كنت اخدت قرار فعلا اني مش هترشح لمنصب المقرر في الاسره .. و اعلنته لبعض الناس المقربين ..
و ده كان لاسباب كتير مفيش داعي نخوض فيها دلوقت .. لكن 70 % منها كان لصالح الاسره ..
و كان بسبب اني عارف ان في ناس ان شاء الله تقدر تشيل مكاني من دلوقت ..
لكن بعد ما اكتشفت ان الاشخاص دول في ظروف (بإختلافها ) هتبعدهم عن الاسره ..
اصبح الموضوع صعب بعض الشئ ..

خاصة ان الاسره حاليا انا شايف انها بتمر بأصعب مرحله ليها .. يمكن حتى اصعب من انشائها ..
لان حاليا اعضاء كتير مؤثرين اتخرجوا .. و اعضاء كتير هيبعدوا لاسباب مختلفه ..
هيبقى عدد الاعضاء الفعليين و الشغالين مش كبير ..
هيبقى زي ما نكون بنعمل اسره من اول و جديد .. بس الفرق اننا بنعملها و احنا ورانا مسؤوليه كبييييره جدا ..
و هي مسؤولية المركز الاول .. و الانشطه المميزه .. و اللي لازم نحافظ عليها ..
عشان نثبت اننا زي ما وصلنا للقمه .. قادرين ان شاء الله اننا نحافظ عليها ..

يمكن دي من ضمن الاسباب اللي خلتني ارجع عن قراري . يمكن بعد كمان ما كلمت بعض الاشخاص انهم يترشحوا كامقرر ..
لكنهم رفضوا .. و بعد ما لقيت ان مفيش حد اترشح للمقرر ..

فقررت اني ارشح نفسي .. و من ضمن اكبر اهدافي ان شاء الله ..
اننا نكون جيل قادر انه يقود الاسره السنين الجايه من بعدنا ان شاء الله ..
لان الكيان ده لازم يستمر ان شاء الله .. و ميكونش وجوده مرتبط بوجود شخص او عدة اشخاص

عشان كده كان ترشيحي .. و موضوع دعايتي الانتخابيه ..

يمكن كدعايه انا مبوعدش بالكتير ..

بس ان شاء الله ربنا يوفقني و ابذل اقصى جهد ليا .. معاكم ..
و ان شاء الله نحافظ على المركز اللي وصلنا ليه ..
و ان شاء الله نستمر في الانشطه المميزه و الجديده و المبتكره ..
و ان شاء الله الشغل جوا الاسره ياخد طابع ممتع اكتر .. و اسري و اخوي اكتر

وفي النهايه مش هقول انتخبوني .. لكن اعملوا اللي انتم شايفينه مناسب

و شكرا ليكم .. و اسف لو طولت عليكم .. و انا طولت عليكم فعلا ..

بس معلش .. موضوعي الانتخابي و حقي بقى

[RASHAD_RESALA]

بالتوفيق يا علاء ان شاء الله

[dr.noody]

ربنا يوفقك يا د/ علاء وتكون على قدر المسؤلية دائما