نيولوك
بسم الله والصلاة والسلام على سيدنا رسول الله...
اخواتى الافاضل...ربنا يبارك فى عمركم ويعز بيكم الدين..
اسأل الله العظيم ان يكون كمان كلامى كويس ويعجبكم..
بعد اذنكم هبدأ معاكم كده بحاجة صغيرة جدا حصلت مع أحد اعرفه وهو يحكى قائلا ...
كنت ماشى مرة فى بلدى..لقيت شاب جميل قطع عليا سيرى وجه يقولى ممكن اسالك سؤال ..قلتله طبعا تحت امرك...
حقولكم اللى قالى عليه بلغته يعنى...
.قالى انا عايز اعرف انت كده ازاى..
قلتله يعنى ايه مش فاهم..
قالى يعنى شاب ماركات ولابس نضيف وف نفس الوقت
شكلك ملتزم وابتسامتك على وشك...
علطول جه فى دماغى الفكرة اللى بتتاخد على الدين والملتزمين..
والحمد لله قدرت بكلمات بسيطة اوصل لقلب الولد ده...واعرفه انك لو بقيت ملتزم مش شرط انك مش حتعرف تلبس او تخرج او تعيش حياتك..
كل الحكاية انك بتبقى عارف حدودك وبتحاول ترضى ربنا...
الشاب ده فاجانى بكلمة من كلامى..وانا بقوله مش لازم كل حياتك تبقى نيولوك غلط..
.حاول تعمل مرة نيولوك صح..وضحكت بعدها...
لقيته ردد كلمتى قالى فعلا انا محتاج اعمل نيولوك...وحعمل نيولوك فى حياتى..بهرنى رد فعله ده..وكلماته الحلوة...
ايه رايك ياجميل؟؟...مش ناوى انت كمان تغير حياتك ...
مش ناوى انت كمان تعمل مرة واحدة حاجة صح...
ياما اخدنا قرارات كتيرة ولكنها للاسف كانت فى الغلط...
ياريت بقى نفوق ونحاول نعمل نيولوك صح..نيولوك اسلامى..نيولوك دينى...
انا مش بكلمك لانى احسن منك والعياذ بالله..بالعكس انا عايزك تقتنع ان التراب اللى حضرتك بتدوس عليه احسن من اللى زيى ميت مرة...
صدقنى لانك واحد بتحب ربنا وبتقرا الكلمات دى...وعايز تغير حاجة من نفسك...
انا بكلمك وانتى كمان يا اختى بس بحكم ان ليا خبرة محدودة شووية وفارق سن عنك بس..
اخى واستاذى وياللى احسن منى ميت مرة...تقدر تقولى فين شكلك الاسلامى فى لبسك ده..
والناس تعرف ازاى انك مسلم...بلاش اسلامى
علشان الارتكاريا اللى بتيجى لبعض الناس لمايسمعوا اسلامى او دينى..فين شكلك الرجولى بلبسك ده...
تخيل معايا كده...
تى شيرت حمالات ..بنطلون خفيف..شبشب صوبع..سلسلة كبيرة...شعر ملهوش ملامح ...
بالله عليك ده كده واحد خارج من بيته..ياحبيب قلبى واخويا فى الاسلام انت كده خارج اه بس من دش فى بيتكم..او كنت بتغسل وشك بعد النوم...
كل ده علشان ايه..تعجب البنات..ولا علشان يقولوا عليك شاب روش وجامد...طيب خلينى معاك فى الغلط ده..
يااخويا ايه احساسك بذاتك لما البنت يعجبها فيك لون شعرك..ولا ستايل لبسك وتسقيطك لبنطلونك..؟؟
ماهو لو بالمنطق ده يبقى لما يجى حد تانى عامل استايل احسن منك انت خلاص حتبقى راحت عليك...
فين شخصيتك ورجولتك وكيانك..ايه كله نيولوك...
تقدر تقولى مين اللى حيجوز بنته ليك وهو شايفك كده..طيب بلاش دى..بالله عليك يااخى لو حد جه لاختك كده...
حتقول عليه ايه؟؟؟؟؟ بس جاوب بصراحة...مش حتقول عليه مينفعش...
ياحبيبى فى الاسلام والله مش هى دى الرجولة ..ولا الحرية..ولا الشياكة..ولا الموضة...
دى بقى بلغتك كده اشتغالااااات..ايوة والله...
عيزينك يا اخويا الغالى تبعد عن دينك ..تبعد عن فطرتك..تبعد عن سنة حبيبك المصطفى...
اصل مفيش حد شاف رجال فى التاريخ زى المسلمين...وزى اللى المسلمين عملوه علشان ينشروا دينهم...
جهاد وتعذيب ودعوة ورجولة ودم حامى..
فين دمك الحامى....فين نخوتك...فين شرفك...شرف دينك وعرضك....
فووق بقى..اصحى من الغفلة اللى عايزينك تبقى فيها....
مش عيب اوى لما يكونوا اخواتنا بيدبحوا قى كل حتة..وحضرتك كل مشكلتك ان الجيل المضروب بيجيب حساسية فى الراس...
لا يااخويا..انا وانت وكلنا خلاص ..مبقاش عندنا اى حساسية..مبقاش عندنا اى شعور بالمسئولية...
ادخل شوف الناس بتكتب ايه على دينك وعلى ربك وعلى نبيك....
شوف ربنا اللى قادر يخسف بينا الارض واحنا بنعصيه وسايبنا علشان خاطر بيحبنا وعايزنا...
شوف كده يوم الخميس بالليل والمصايب اللى بتحصل على وجه الارض والاماكن اللى بتبقى فيها وشايف بنفسك المعاصى..
وحتى اضعف الايمان انك تسيب المكان وتمشى مبتعملهاش...ورغم كده ربنا سايبنا....
مش هى دى الرسالة..مش هى دى الامانة...
كذبوا علينا وقالولنا موضة...كذبوا علينا وقالولنا عصرية وعولمة...كذبوا علينا وقالوا نيولوك..
واحنا مجرورين للاسف وراهم ..من غير ماحتى ندى لنفسنا فرصة فى التفكير...
اديك مثال صغير على الموضة بتاعتهم اللى للاسف ناس من دمنا ولحمنا ومسلمين زينا هما اللى بينشرولهم افكارهم...
ليه لما المسلمين مشوا على سنة نبيهم وقالوا نسيب لحيتنا..دقننا يعنى..علشان نبقى شبه الرسول..
الناس كلها حاربتهم وقالت تخلف ورجعية وشكل وحش وارهابيين و و و....
ولما طلع واحد شيوعى كافر بالله...ولا واحد قال دى ستايل ايطالى...كل الناس بقت تقلده وحبايبنا يسقفولهم...
ويقولوا برافو هو ده الاستايل وهى دى الموضة...
ياسلام ع النجم ده وهو مربى دقنه...اووووو شكله حلو مووووت...
مش هو ده اللى بنسمعه....
ولا لما اخوك الجميل قصر بنطلونه شوية علشان حابب يبقى شكل رسوله فى التواضع وعدم الفخر.. كل الناس حاربته...
على الرغم من ان اللى هاجموه دول هما هما اللى نزلوا اشتروا البنطلونات القصيرة لما طلعت (البنتاكور)
وقالوا ياسلام على الشياكة والاناقة والجمال والموضة....هى دى الاستايلات..هى دى النجومية...
مش هو ده اللى بتسمعوه بالله عليكم..صح ولا لا..نجم قال....واحد كل اللى بيعمله انه يخلى الاالف يرقصوا وراه
ويمشوا ورا غناه ويقلدوه...بقى نجم..كل تاريخه او السى فى بتاعه ..انه بيرقص ويسقط بنطلونه ويوقف شعره بقى نجم واسطورة...
واحد بيحارب ربنا..ايوة ايوة..بيحارب ربك يااخى...
تخيل نفسك كده لو حد عزمك على حفلة للشخص ده..حتقول ايه..
حتقول ياترى ادخل ولا حراام..ادخل ولا حغضب ربنا..
يعنى ايه...يعنى فلان الفلانى ده او ربنااااا...مقارنة اهى بتختار ده ولا ده والعياذ بالله....
حط نفسه فى مواجهة مع ربنا..ومع ذلك ربنا سايبه وبيرزقه وبيديله كل اللى هو عايزه..
بذمتك مش مكسوف بقى لما تقلده..بذمتك مش خسارة الذنوب اللى بتاخدها بسببه...
مش هو ده النجم يا أخويا وحبيبى فى الله ..النجم هو ابو بكر..النجم هو عمر...النجم هو عثمان..النجم هو على...
النجم هو ابى ذر و ابو عبيدة.. وابى هريرة وياسر وعبد الرحمن بن عوف...
مش الرسول هو اللى قال كده..قال..اصحابى كالنجوم..بايهم اقتديتم اهتديتم...
وعندنا دلوقت نجوم كتير يتقلدوا ياسيدى علشان متقولش انا فين وهما فين الصحابة...عندك اخونا فى الله مصطفى حسنى.....وعندك معز مسعود...وعندك احمد الشقيرى...حتلاقى ياماااا اوى...دول كلهم ..نجوم وشباب زيك يتقلدوا برضه..بس اى تقليد ليهم حتاخد به حسنات...
تخيل بقى الفرق....
وياسلام عليك بقى لو كبرت فى دماغك وقلت اقلد شيخنا محمد حسان مثلا ..ولا استاذ عمرو خالد...تبقى ولد بجد...
عرفت بقى مين النجم اللى يتقلد ولا لا...انت فاهم معنى كلمة نجم غلط....
عايز تبقى نجم يبقى لازم تكون نجم واضح تاخد بايد الناس وتساعدهم على الخير..
هو ده النجم..النجم هو اللى بيهدى..مش هو اللى بيضل..ده جى من اسمه ياخى..نجم..يعنى بينورلك طريقك...
مش بياخدك وينزل بيك لسابع ارض..
مش ربنا قال تعالى..وبالنجم هم يهتدون....
فوق بقى يااخى عايز كده تحس بالمسئولية..وتعرف ان ليك رسالة مادام ربنا خلقك...
ارفع بقى بنطلونك..واستر نفسك..ده ربنا سترك...
خاف على دينك..واعمل حاجة صح..ده ربنا سترك...
اوعى تمشى ورا نجم يضلك..وشوف اللى ياخد بايدك للحق ..ده ربنا سترك...
كلمة صغيرة لاختى الفاضلة...
اختى الكرنفالات اللى بنشوفها دى فى الشوارع وامام الكليات...
مش هى دى اللى حتجيب عرسان...انتى كده بتغضبى ربنا اللى عايز يسترك ويجملك بالحياء..
سبحان الله..تغضبى ربنا وتذلى نفسك للى يسوى واللى ميسواش علشان خاطر عريس ممكن تجيبيه بركعتين فى الثلث الاخيرمن الليل...
مش كده اسهل واطهر وبدعوة صادقة واتقاء المولى عز وجل...
وشوفى بقى اللى ربنا حيديهولك..مش اللى انتى عايزة تجيبيه وبرضه بامره..
..ربنا يحفظك ويسترك ويعفك ويحميكى يارب من كل سوء...
اخواتى واحبابى....
دعوة خالصة من قلبى ...علشان كلنا نعمل نيولوك...
ايوة بجد..عايزين نيولوك...
نيولوك فى اخلاقنا...نيولوك فى لبسنا..نيولوك فى تعاملاتنا..نيولوك فى طاعتنا وعبادتنا لربنا سبحانه وتعالى...
نيولوك صح ..من شباب اعزهم الله واكرمهم بدين الاسلام...
اسال الله العظيم ان يكون من عليا بكلمات تساعدنى اولا وتساعد اخواتى على تغيير احوالهم الى الاحسن..
وربنا يارب يحفظكم من كل سوء ويحميكم من انفسكم ومن شياطين الانس والجن يامة خير الخلق..
هذا وما كان من توفيق فهو من عند الله ..وما كان من سهو او تقصير فهو منى ومن الشيطان....
منقول للافاده
رد مع اقتباس
