إلى موظفى شئون الطلبة .. المعاملة بوشين !!!

[..::ciZar_Resala::..]

بسم الله الرحمن الرحيم

حبيت أكتب الموضوع ده .. لآن كليتنا عمرها ما هتتطور طول ما فيها حد بيعامل الناس وحش ..

أو بيعاملهم بوشين ،،

موظفين شئون شئون الطلبة .. و أكيد مش كلهم ..

و لما نقول شئون الطلبة .. كله يتذكر كلمة " من الشباك لو سمحت " ..

لما نقول أمين الكلية " اللى بيختملنا الورق " .. كله يتذكر كلمة العاملة اللى قاعدة ع الباب " ممنوع الدخول يا أستاذ أحسن يزعقلى " .. !!

المشكلة الأولى ..

و هى موظفى شئون الطلبة ..

و خصوصاً ف لما يكون فى ورق عاوزينه منهم أو كده ..

هقولكوا عدة مواقف .. المفروض تتصلح .. و قولوا رأيكوا فيها .. المواقف دى حصلت بالفعل لناس معانا ف الكلية .. و الكلام ده على لسانهم ..

1 - طالبة قامت بتثديم بحث اجتماعى للكلية .. لم تظهر النتيجة .. و لكن الطالبة دى كانت محتاجة شهادة قيد ..

طلبت من الموظف .. قالها " ممنوع " .. ممنوع إزاى يعنى ؟؟ .. " لما تدفعى المصاريف .. مقدرش أديكى حاجة غير لما تدفعى المصاريف " .. إزاى يعنى ... أنا مقدمة بحث اجتماعى على المصاريف .. و مش معايا فلوس و محتاجاها .. " ممنوع يا دكتورة دى تعليمات ... " .. !!!

لا تعليق

2 - أثناء استلام استمارة التدريب الصيفى .. بعد الموعد المحدد .. أنا معاكم إن الشخص ده غلطان .. بس تعالوا نشوف اللى حصل ..

" إنت منين يا بنى " .. من المكان الفلانى .. " طب و إيه اللى أخرك كده " .. مكنتش بسافر أيام الامتحانات كنت قاعد هنا .. " طب أنا مقدرش آخد منك حاجة روح للأستاذ ***** فى شباك رابعة هو اللى ياخدها منك " ..

و عند شباك رابعة .. نفس الكلام اتكرر مع الموظف التانى بالإضافة إلى .. " و الله إنتوا بتستهبلوا .. آخدها منك إزاى .. إحنا بدأنا توزيع .. روح للدكتور حسن " ..

بالصدفة كان العميد بالخارج .. و معاه الدكتور حسن ..

عند السكرتير " الدكتور حسن لسة مجاش يا بنى استناه " .. هو لسة مجاش .. و لا مع العميد .. " يعنى أنا بكدب .. قلتلك لسة مجاش " .. حاضر حاضر .. أنا بس بسأل .. " و بعدين إنت إيه اللى أخرك .. محدش هيرضى ياخد الاستمارة منك " .. الطالب " silence " ..

ربع ساعة و العميد طالع و معاه الدكتور حسن .. و كان الموظف ده بيجيب حاجة من فوق ... الطالب أول ما شاف الموقف و الطالب واقف .. و وقف مع العميد .. استخبى منه .. و منزلش ألا لما العميد دخل المكتب بتاعه !!

الطالب حب يتأكد من إنه شافه .. " طب معلش أنا هتحرج أدخل للدكتور حسن أقوله .. ممكن إنت تقوله ؟؟ " .. اقعد بس يا بنى ثوانى و هدخلك متقلقش إنت هتتحرج من إيه بس " .. شوية و الموظف إياه بتاع شباك رابعة داخل عاوز حاجة من الدكتور حسن .. الطالب كرر كلامه تانى .. راح السكرتير " معلش يا أستاذ فلان .. خدها منه و ضيفها و خلاص " .. ==> لما شاف الطالب واقف مع العميد .. مع إنه كان لسة بيقولوا محدش هياخدها .. و مع إن الطالب ده مطلبش من العميد حاجة .. ده كان بيسلم عليه .. !!

رد الأستاذ فلان بتاع شباك رابعة " طيب اكتب عليها رقمك .. و انزل لمدام فلانة اديهالها و قولها تضيفها و قولها إنها منى " .. لحد كده تمام ..

خلص الطالب مصلحته .. شوية و واحد زميله جاى متأخر برده و معاه الاستمارة .. و رفضوا ياخدوها منه بتاتاً !!

لا تعليق ..

3 - سحب ورق الخريجين .. ف يوم أنا كنت هناك .. و جت بنت بتقدم ورقها .. و سحبت ورق واحدة زميلتها .. كويس .. مقلناش حاجة ..

من يومين كنت هناك .. و فى أخت جاية تسحب و رق أختها .. " ممنوع يا أبلة .. مينفعش ألا هى لازم تيجى " .. " إحنا من بعيد .. و هى عندها ظروف صحية .. و مبتقدرش تسافر كتير .. " أمال كانت بتيجى الكلية إزاى .. مينفعش ألا هى اللى تاخدها .. أبوة يا حضرت .. حضرتك قلتلى اسمك إيه .. " .. لا تعليق ..

شوية و أم البنت دى جت .. و دخلت جوه المكتب .. و قعدت نص ساعة و زيادة جوه و خرجت .. صممت أعرف إيه اللى حصل ... سألتها ..

" بنتى و الله تعبانة و ما بتقدر تسافر .. و هم مصممين إن هى اللى تيجى .. ليه كده يعنى .. و أقعد أتحايل عليهم كل ده لحد ما يرضو يدوهالى .. دا أنا أمها .. و الله أمها .. و دى أختها .. مش حد غريب عشان يعملوا كده " ..

لا تعليق ..

4 - آخر موقف .. و ده حصل معايا أنا شخصياً ..

كان معايا الكارنيه بتاعى و البطاقة .. و رحت أجيب الكارنيه الجديد بتاع أختى من الشئون .. " ممنوع يا بيه .. دى بنت مش ولد .. " .. إزاى يعنى ممنوع أنا أخوها .. " برده ممنوع .. أنا اشعرفنى " .. يا عم البطاقة و الكارنيه بتوعى أهم خد اتأكد .. .. بص ع البطاقة و الكارنية و طابق الاسم .. و رجع بص على الكارنيه بتاعها و طابق الاسم .. و بعدين بصلى .. و إدالى البطاقة و الكارنيه بتوعى .. و قاللى .. " ممنوع .. هى اللى تيجى تاخدهم " .. قلتله هى محاتاجاه دلوقتى .. و أنا أخوها قولى ممنوع إزاى بقى .. " هى اللى هتيجى تاخده .. و مش هديهولك " ..

اتنرفزرت جداً .. و قلتله حسبى الله و نعم الوكيل فيك .. " موظف شئون له ذقن .. و أكيد الكل عارفه لآنه بيرخم على كله " ..

جت أختى .. و قالتلى فيها إيه لما تديهوله يعنى .. مش وراك البطاقة و الكارنيه .. تنزلنى ف الحر ده و تتعب الناس ليه .. ليه كده يعنى .. " براحة يا دكتورة مش كده .. المفروض هو يكون مبسوط إنى عملت كده .. لآنى مش هطلع حاجتك احد غريب " .. غريب .. و الله إنت بتستهبل .. بقولك أخويا .. و الله إنت بتستهبل .. حسبى الله و نعم الوكيل فيك ..

و ده كان آخر موقف ..

==========

يا ترى نصلح الناس دى إزاى ؟؟

نعلمها إزاى تتعامل معانا ؟؟

إزاى نفهمهم إنهم بيتعاملوا مع شخصيات محترمة .. و ناس دكاترة .. باعتبار ما سيكون ؟؟

إيه الحل ؟؟

إزاى نخلهم ميتعاملوش بوشين ؟؟

[Mohamed Al Gohary]

فى اجتماع استراتيجية الكليه مع الدكتور صالح الشرقاوي .. اكلم فى النقطه دى كتير اوي .. وركز على الموظفين جدا ..

بس فعلا هما بيتعاملوا بطريقه غريبه .. بس برضه ساعات بيبقى لهم اعذار فى بعض الورق .. لان بتبقى عندهم تعليمات معينه .. والورق لازم يمشي مسار معين ..

اما حكاية بوشين دى .. فدي حاجه طبيعيه فى مصر ..

[daylight]

حضرتك لو سالت كل طالب ف الكلية هتلاقيه مر بموقف من دول مع شئون الطلبة وهتلاقي كل الناس بتشتكي منهم فعلا حاجه تضايق

[dry_tears]

على فكرة الكارثة مش فى كدة او من الاخر ممكن نوجد ليهم عذر انا مش عارفة ازاى لكن مش مشكلة واللى يغيظ اكتر بقة موضوع الاكل بجد بتبقة ماسااااااااااه
الكارثة الكبيرة فى معاملة المعيدين وبالزات معاملة البنات منهم للبنات الطلبة بجد حاجة تحسسك انك مش كلية محترمة ......ولا ياسلام معاملة العماااال حاجة بجد تجيب ضغط الواحد لما بيتعرض لحاجة زى دى مبيبقاش قادر يتكلم من كتر الزهول

[marooo]

هو هو عمو ابو دقن بجد صعب جدا مع احترامى له حصلى موقف معاه كنا واقفين على الشباك مش فاكره كنا بناخد حاجه وكانت الدنيا زحمه جدا وطبعا عارفين ان البنات اضعاف الولاد فى كليتنا فلازم يكوناوا مغطيين عليهم قام عمو ده رايح يقولنا انتوا منظر بنات هتبقوا امهات مسلمين والشباك اتفقل فى وشنا فى نفس الوقت من جوه الاوضه بتاعته كان الوسايط شغاله وخلص الناس واحنا واقفين الصراحه العميد لازم يحط حد للكوسه اللى فى الكليه انا عارفه ان هى فى كل مكان بس يمكن يحصل وتتغير عندنا اتمنى ان المشكله دى تتحل ويبقى فى نظام سواء فى دفع فلوس اوسحب ورق او اى حاجه تخص الدفع كلها حتى لو هيقسموها بلارقام ميرسى جدا يا دكتور على طرح الموضوع ده وياريت يكون فى استجابه

[barbie]

[موظفه طموحه]

بسم الله الرحمن الرحيم
السلام عليكم كل عام وانتم جميعا بخير
اولا لكم منى جميعا كل احترام وتقدير .
مهلا مهلا يجماعه بالراحه شويه انا معاكم ان لما واحد يتعرض لموقف من المواقف دى حاجه تنرفز بس انا عوزه اقول حاجه
على فكره انا مسكه معمل تحضير مش فى شؤن طلبه
الناس دى بتتعامل طول النهار مع الطلبه
ممكن نلتمس لهم العذر من ضغط الشغل او ضغوط اخرى وبعدين هم كمان ناس كبار ومحترمين يعنى بقالهم عمر طويل فى الكليه وبيتعاملوا معاكم انكم فى سن اولادهم اما من ناحية الكوسه دى فعلا ذى ماقلتم موجوده فى كل مكان وبعدين ممكن اوى يكون حد من زمايلهم ابنه او بنته جايه الكليه بيخدموا زميلهم ده وبيخلصوله ورقه من جوه يعنى احنا كموظفين فى الكليه ملناش حق عليها ؟
وبعدين يجماعه احنا كلنا كل فى مكانه بنتعب جدا عشانكم لغاية ماتتخرجوا وتبقوا احسن ناس ودفعات كتير اتخرجت من تحت ايدينا برده يجماعه ولا ايه رايكم ؟انا طبعا مش بمحى الخطأ ولكن بوضح حاجات انا لمساها كويس جدا.
وبعدين على فكره يجماعه احنا بنشوف نماذج من الطلبه عندهم قمة الاستهتار
يعنى مثلا انا كان عندى توزيع المذكرات الخاصه بقسم التحليليه من حوالى سنتيين
لقيت طالبه داخله على وفى ايدها علبة الكنز وعلى ودنها الموبايل وبتتطلب منى المذكرة بطريقه فيها قلة ذوق شديده جدا
قولت لها لما تخلصى كلام فى الموبايل انا تحت امرك .هل احنا لا نستحق الاحترام منكم ؟
وطالبه اخرى تدخل ترمى الفلوس على المكتب وتقول عاوزه المذكره بالله عليكم دى طريقة ناس المفروض قدوه ؟.
وفى ناس غيرى مسكوا المذكرات دى السنه اللى فاتت واللى قبلها وبرده حصل مشاكل من الطلبه
طبعا انا اسفه جدا بس والله فى حاجات كتير احنا بنشوفها من الطلبه مستفزه جدا واسلوب معامله سىء طبعا مش كل الطلبه بالعكس فيه طلبه قمه فى الاخلاق الواحد امامهم بيكون مش عارف يعمل ليهم ايه والله اسفه جدا على الاطاله بس زى مافيه طلبه كده وكده برده فيه موظفين كده وكده يعنى بتقدر تتصرف مع المواقف وناس مش بتقدر .اشكركم جميعا ولكم منى كل التقدير والاحترام .

[..::ciZar_Resala::..]

أنا اتعاملت مع موظفين الشئون بتوع طب أسنان .. من حوالى يومين ..

و الله حسيت إنهم ملايكة .. لو قارنتيهم باللى عندنا !! ملاااااااااااايكة !!

هم مش دول موظفين و دول موظفين برده ؟؟ و نفس المكان الإدارى ؟؟؟

[Dr/HULK]

انا مشارك بس فى الموضوع ده

عشان انتوا بتتكلموا على ناس فى الاخر مش لينا احتكاك

بيهم جامد غير ممكن مرتين تلاته فى السنة

عاوزين تتكلموا بجد

اتكلموا عن معاملة اعضاء التدريس للطلبة

واللى بيكون ليها تاثير مباشر علينا



اه وبعدين كوسة ايه اللى بتتكلموا عنها

هى الكوسة فى دى بس

[Dr. Atallah F. Ahmed]

أنا اتعاملت مع موظفين الشئون بتوع طب أسنان .. من حوالى يومين ..

و الله حسيت إنهم ملايكة .. لو قارنتيهم باللى عندنا !! ملاااااااااااايكة !!

هم مش دول موظفين و دول موظفين برده ؟؟ و نفس المكان الإدارى ؟؟؟

يا حاج ياسر
السلام عليكم
اولا انا مبسوط انك بتوضح بعض الأمور و لكن فى هذا الأمر لا أحب التعميم فى الحكم. لأن هذا لم يعلمه الله لنا. ثم ان وسيلة التبليغ (عن بعض السلبيات التى تخص شخصيات عامة او شبه عامة) و التى انت استخدمتها هنا حاليا ليست مناسبة على الإطلاق بالرغم من وجود صندوق شكاوى الكترونى يصل للعميد مباشرة و لوحدة الجودة كذلك.
فقد شهرت بالرجل الذى هو فى مثل سن والدك.
اعلم ان كل فرد من الناس حريص على مصلحته و لكن احيانا اسلوب المعاملة من أحد الطرفين يفرق فى انجاز تلك المصلحةبسبب انهم بشر.
انا ارى ان الإبتسامة الجميلة التى تنصح زملائك المتدربين فى الصيدلية ان يتمسكوا بها فى مقابلة الناس و استيعابهم لم تستخدمها انت فى هذا الموقف (اظن ذلك) برغم فعاليتها فى النفوس.
يعنى كن واسع الصدر يا ياسر فهذه المواقف ليست نهاية الكون كما تحكيها و مثلما تجدها هنا احيانا و الله اجدها هناك فى بلاد الأمم المتقدمة بسبب التزامهم البالغ باللوائح و القوانين و هذا ليس عيب و لكن متروك لمساحة المعاملة و الثقة و بعض الإعتبارات الأخرى.
الأمر الأخر هو ان كلامك يدخل فى دائرة الغيبة (فى هذه الساحة العامة) و هذا يستوجب منك الإستغفار و اعلم ان من تكلمت عليه هكذا قد كسب من وراءك الكثير (حسنات طبعا) بالرغم من انفه و طبعا هذا ينقص من حسابك انت........ و احنا و الله فى عرض حسنة واحدة فى هذه الدنيا.
مع تحياتى