استكمال التحميلات المنقطعة .. بعد سياسة الإنترنت الجديدة ..

[..::ciZar_Resala::..]

بسم الله الرحمن الرحيم

طبعاً بعد السياسة الجديدة للإنترنت .. اللى الناس لاحظته ف نهاية الشهر عند اكتمال باقات التحميل من انقطاع متواصل للإنترنت و بخاصة عندما تقوم بتحميل أى شىء من الإنترنت ..

جبتلكوا حاجة إن شاء الله تستفيدوا بيها .. و تطلعوا عين الشركة زى ما هى مطلعة عنينا ..

مواقع داونلود كتيرة بتديلك تذكرة ليها فترة معينة تنزل فيها التحميل بتاعك .. لو زاد عن الفترة دى بيفصل .. أو مثلاً الشركة فصلت عنك .. أو النور اتقطع .. أو أى حاجة حصلت الداونلود وقف ..

ف الحالة دى ممكن تكمله من الموقع نفسه .. أو من أى موقع تانى بشرط إن الموقع الجديد يكون داعم لاستكمال التحميل ..

طب إزاى ؟؟

تروح على سيرفر تانى فيه نفس الملف اللى عاوز تنزله ..

تعمله داونلود عادى .. أول ما يفتح معاك .. و يبان حجم الملف ( و ده معناه إن الداونلود مانجر بدأ تنزيله بالفعل ) اضغط على Download later ..

بعد كده هتروح تفتح الداونلود مانجر عادى ..

و تضغط على الملف الجديد اللى إنت قلتله download later .. هيفتحلك ال properties بتاعة الملف ..

هتلاقى عندك 3 عناوين

Save To
Address
Referer

الأول: ده مكان تخرينه ف الكمبيوتر بعد اكتمال التحميل ..

الثانى: عنوان السيرفر أو الملقم اللى البرنامج بيسحب منه الملف ..

الثالث: غالباً ما يكون عنوان الصفحة اللى ضغطت فيها على كلمة download ..

هتاخد إنت ال address من الملف الجديد كوبى ..

و بعدين تفتح الملف القديم اللى تحميله وقف " ف نصه و إنت هتجنن " .. تفتح ال properties بتاعته برده .. و بعدين تعمل paste للعنوان اللى نسخته ..

بعد كده هتعمل استكمال التحميل للملف القديم .. أو resume download .. هيكمل معاك عادى .. و دى الصور اللى بتوضح ..

===

أولا: أنا على سبيل المثال قلت أحمل أهداف ماتش الأهلى مع المحلة بتاع امبارح .. و حملته من موقع الرابيد شير .. و اللى مش بيدعم الاستكمال .. و لو فصل .. يبقى راح عليك الداونلود و تبدأ من الأول ..



ثانياً: هفترض إن النت فصل و أنا بنزل الملف .. و هروح للموقع اللى أنا منزل منه الملف و أشوف سيرفر تانى .. بس بشرط يكون بيدعم الاستكمال .. و ليكن ميديا فاير .. و أبدأ الداونلود من عليه .. بس هقوله download later زى ما اتفقنا .. عشان أنا عندى جزء من الملف أصلاً ..



ثالثاً: بعد كده هفتح برنامج الدونلود مانجر و أضغط على الملف الجديد اتنين كليك أو كليك يمين و properties عشان أجيب ال address بتاعه ..



رابعاً: لما الملف فتح .. لاحظ العناوين ال3 .. save to و address و referer .. اللى أنا عاوزه ال address ..



خامساً: هاخد ال address ده كوبى .. عشان أحطه ف الملف القديم ..



سادساً: هفتح الدونلود مانجر تانى .. بس المرة دى هفتح ال properties بتاعة الملف القديم ..



سابعاً: هعمل paste لل address اللى انا لسة آخده كوبى حالاً ..



ثامناً: هقوله أوكى .. و بعدين أعمل resume download أو استكمال التحميل للى عامله عربى ..



نشوف .. كمل التحميل و لا لأ ..



و كمان نزل باقى الروابط ..



طيب .. كل ده كده و تمام .. بس فى مشكلتين ممكن يقابلونا ..

أولاً: نوع الملف .. أو اسمه ..

ممكن الملف يكون مرفوع على الموقع التانى باسم تانى .. أو إنت عملت resume للقديم و الموقعع مش بيدعم الاستكمال فجابلك ملف بصيغة html و بعدين كنسلته .. ف الحالة دى هتظهرلك الرسالة الجاية دى .. لما تنسخ ال address الجديد و تحطه ف القديم و تعمل resume .. و ف الحالة دى هنقوله YES ..



ثانياً: المشكلة التانية هى مشكلة الوقت ..

يعنى إيه ؟؟

بفرض إن النت فصل عندك كام يوم .. و بعدين جيت تعمل الحكاية دى .. هيجيبلك رسالة كبيرة كده مش فاكرها المهم فيها time modified .. و يقولك يحمل المف من البداية ولا لأ .. و ف الحالة دى طبعاً هتقوله No .. هيكمل الملف من نقظة ما وقفت عادى .. يعنى لازم ناخد بالنا هو بيقول إيه لو جتلنا أى رسالة

معرفتش أجيب صورة لدى عشان أنا عملت المشاركة بسرعة ..

يا ريت يكون حد استفاد من كلامى ..

[amir]

حلوة الفكرة يا ياسر
بس طالما أنا عندي لنكات لمواقع تدعم الاستكمال، أنا ايه اللي يخليني أنزل من مواقع لا تدعم الاستكمال وبعدين لما تقف أبقي أرجع للمواقع اللي تدعم

[..::ciZar_Resala::..]

حلوة الفكرة يا ياسر
بس طالما أنا عندي لنكات لمواقع تدعم الاستكمال، أنا ايه اللي يخليني أنزل من مواقع لا تدعم الاستكمال وبعدين لما تقف أبقي أرجع للمواقع اللي تدعم

جميل يا أمير .. حلو السؤال ..

الموضوع اتعمل مخصوص عشان لو الموقع بتاعك اللى بيدعم الاستكمال ده وقف لآى سبب من الأسباب ,

خليك مثلاً بتحمل حاجة من على موقع الميديا فاير .. و خلى النت يفصل من سيرفر الشركة " مش نت كت " لو فاصل من السيرفر عمره ما هيرضى يكمل غير بعدها بيوم أو يومين ..

و فرضاً إنك كنت واقف على 95 % من الملف !!

حصلت معايا كنت بنزل ملف حجمه 400 ميجا و مش متقسم .. و الداونلود وقف عن 395 ميجا و مش راضى يتحرك .. طب أعمل إيه نزله من الأول ؟؟ دا انا يجيلى سكتة قلبية فيها ..

قعدت أدور و أجرب .. لحد ما وصلت للفكرة دى ..

و شغاااااااااااااااااالة تمام .. بس بشرط زى ما قلت .. الموقع التانى يدعم الاستكمال .. و بغض النظر عن الموقع الأول بيدعم و لا لآ ..

أنا كنت جايب الرابيد شير كمثال بس ..

شكراً على مداخلتك و سؤالك يا أمير ..

[عبدالله عبدالرحمن]

شكرا دكتور ياسر
بس انا عايز اقولك ان الخاصية دى موجودة فى الدونلود مانجر النسخة 5.17
ممكن تروح لنفس الموقع الل انت بتحمل منه وتضغط على الرابط مرة تنانية وهيكمل من نفس نقطة التوقف

[..::ciZar_Resala::..]

عارف إنها موجودة ..

بس جرب لو النت فصل من الشركة إنك تحمل الحاجة دى من موقع زى الميديا فاير أو filezzz .. و صدقنى .. مش هينفع .. .. يعنى الموقع اللى إنت بتحمل منه كده اتضرب !! هتعمل إنت إيه ؟؟

مكنتش تعبت نفسى و عملت الموضوع .. كل اللى بتقولوا عليه ده مجربوا .. أنا مش أول مرة أقعد ع النت

لو النت فصل من الشركة الميديا فاير مش هيكملك الداونلود .. و هتضغط على download يحملك الصفحة من أول و جديد ..

أما موقع فايلز .. فبيريح نفسه و يفولك إن السيرفر مقفول ..

[Dr/HULK]

على فكرة الداون لود امره سهل

لو تعرف بقى طريقة لupload

لانى بجد لما جيت ارفع حاجة قبل كده

كان كل شوية يفصل ويخلينى ابدا

من جديد لحد ماكان هيجيلى الضغط

[..::ciZar_Resala::..]

لو بترفع على موقع الفور شيرد هيريحك من الحوار ده ..

نزل الفور شيرد ديسك توب أبلود مانجر .. و ارفع بيه .. و حتى لو النت فصل بيفضل يحاول لحد ما النت ييجى ..

أنا جربت .. و بيرفعه عادى .. بس بييجى ف الأخر و يجيبلك رسالة إنه مش عارف يتصل بالموقع ..

دخلت ع الموقع لقيت الملف اترفع و عادى جداً ..

[hesham]

الفكرة بتاعت الداونلود مانجر دي على فكرة جامده جدا انا كنت بعملها بالفعل بس لو الموضوع مش منقول يبقى اكيد انت بتفهم اوى
وشكرا على الموضوع

[..::ciZar_Resala::..]

الفكرة بتاعت الداونلود مانجر دي على فكرة جامده جدا انا كنت بعملها بالفعل بس لو الموضوع مش منقول يبقى اكيد انت بتفهم اوى


وشكرا على الموضوع

على فكرة يا إتش ..

أنا مبحطش أى مواضيع منقولة ف منتدى الكمبيوتر ..

كل المواضيع من عندى الحمد لله .. و مش بحطها ف أى منتدى تانى كمان ..

ميرسى على مرورك و ردك ..