مساااااابقة ....استفيد وورينا نفسك.....جوه الموضوع فى اسئله سهله خالص جاوبوها وهنعرف مين الأشطر

[a_elkamhawy]

ان شاء الله كل يوم هحاول ربنا بس يعينى على الاستمرار انى اعمل موضوع زى كدا ....هعرض لكم موضوع معين بأسلوب سهل خالص أتمنى انه يعجبكم....هنستفيد كلنا من المعلومات اللى فيه ....وهنلاقى جوه الموضوع اسئلة بين السطور...دوروا على اجابتها وشاركوا بايجابيه....واما نشوف بأ مين أشطر واحد أو واحده قدر يوصل للاجابة الصح

الميكروبات...البكتيريا...المضادات الحيوية...والفطريات

الموضوع كبير بس هنحاول نلمه ع السريع كدا عشان نفهم يعنى إيه الكلام دا

• أولا كلمة ميكروبات اصلا يعنى كائنات دقيقة microbes والميكروبات دى أنواع منها البكتيريا والفطريات والفيروسات وحاجات تانيه.
• طيب تعالوا نشوف البكتيريا دى عبارة عن ايه؟
1. البكتريا دى منها نوعين نوع مضر بالصحة زى السجاير كدا ههههههه ونوع تانى حلو وامور ومش مضر ولا حاجه وعلى فكرة الانواع المش مضرة دى موجوده بالملايين على جلد جسم الانسان
2. طيب البكتيريا دى علشان نشوفها لازم تحت الميكروسكوب يعنى مينفعش بالعين المجنرده كدا
برده من واحنا فى كى جى بيقولوا لنا ان فى من البكتيريا نوعين نوع موجب الجرام Gram +ve ونوع سالبة الجرام Gram –ve طيب يعنى ايه الكلام دا؟
بصوا...علشان نشوف البكتيريا قلنا هنشوفها تحت الميكروسكوب وعلشان نشوفها أكوس بنصبغها بنوعات معينه من الصبغات....واحده من الصبغات دى اسمها صبغة الجرام
• يبقى لو فى بكتيريا تنازلت وتكرمت ونفع اننا نصبغها فبنسميها جرام بوستيف
• ولو ساءت الدلال ومرضتش تتصبغ بنسميها جرام نيجاتف
لما حد مننا بيتعب وبتيجى له عدوى الدكتور بيكتب له على مضاد حيوى ...المفروض أن كل نوع من البكتيريا ولها مضاد حيوى معين علشان يقتلها لكن ياعم هو احنا لس هنعمل مزرعة بكتيرية bacterial culture علشان نعرف نوعها ايه البكتريا بنت اللذين دى....فالدكتور بيكبر دماغه وانت كمان بتبقى مبسوط علشان هتوفر....المهم بيكتب لنا مضاد حيوى بيكون له تأثير على أكتر من نوع من البكتيريا بالظبط زى الواد اللى فى الكوتشينه اللى بيقش كل الورق اللى ع الطربيزة....بس المشكله لو مخفتش يا حلو يبقى لازم تعمل مزرعة علشان نعرف أى نوع بكتيريا مستعصى للجرجه دى...وناخد له المضاد الحيوي المناسب
يعنى مثلا لو حد عنده دمل أو خراج فبتبقى البكتيريا دى غالبا موجبة الجرام من فصيلة staphylococci أو streptococci وعلى فكرة كلمة cocci يعنى عنقوديه لانها بتظهر تحت الميكروسكوب على شكل عنقودى....
أما لو عدوى فى الجهاز البولى أو التنفسى فبتبقى البكتريا بنت المؤذيه دى يا إما سالبة الجرام يا إما مختلطه
وعلى هذا فالمضادات الحيوية اللى فى الصيدليه منها اللى أكتف ضد الموجبة الجرام بس أو السالبة بس أو اللى بيقش يعنى بيخلص على الكل يا معلم
• انتم عارفين...المضادات الحيوية دى أصلا عبارة عن مواد بتفرزها بكتريا علشان تخلص على بكتريا تانيه لسبب أو لأخر احنا ملناش دعوه ممكن تكون ظروف عائلية بينهم يعنى مثلا الاتنين فى نفس المكان ومفيش الا وجبة واحده وهم الاتنين هيموتوا من الجوع تقوم واحده فيهم تطلع ماده زى سم كدا تقوم مسممه التانيه ومموتاها وهى اللى تاكل الكباب لواحدها....شايفين الشر....المهم احنا مالنا ياعم ....احنا بأ ناخد السم دا ونعبيه فى أزايز ونبيعه على انه مضاد حيوى لو حد جاله عدوى من البكتيريا المرحومه اللى ماتت غدرا دى....على الله تكون المعلومه وصلت
 أول من اكتشف المضادات الحيوية دى واحد اسمه الكسندر فلمنج سنة 1928 والراجل دا اخد جايزة نوبل علشان اكتشف البنسلين اللى بأ ملطشة دلوقتى لاى بكتيريا .....لأن كل انواع البكتيريا دلوقتى تقريبا عندها مناعه ضده...ودا عن طريق انها بتفرز مواد تبطل مفعول البنسلين
( انزيم بيكسر الدوا penicillinase OR Beta lactamase) )
يمكن الاستعمال اللى البنسلين متساب علشانه فى السوق لغاية دلوقتى انه بيعالج حاجه اسمها الحمى الروماتيزميه...أنا مش هقولكم ايه هى....دوروا انتم عليها وورونى شطارتكم !!
 طبعا العلماء مسكتوش على اللى بيحصل دا وقعدوا يغيروا فى شكل المركب ويشيدوا مضادات حيويه جديده فى المعمل علشان تقدر على أنواع البكتيريا المختلفة وكمان علشان نقدر ناخدها بطرق مختلفه يعنى حقن او عن طريق الفم وعلى فكرة كلمة تشييد هى الترجمة الصح لكلمة synthesis على اساس ان لو ترجمناها تخليق هتبقى مش مقبوله دينيا وكدا
 البنسلين دا بأ بيحلل الجدار بتاع البكتيريا دا ويدمره فى مضادات حيوية تانيه تم تصنيعها بتعدى من الجدار دا وبتدخل تبوظ الحمض النووى بتاع البكتيريا او بتضرب عملية تكوين البروتين جواها أو أى حاجه المهم نخلص عليها
 وعليه فالمضادات الحيوية دى عباره عن باقات كدا زى ART ههههه....
1. مجموعة البنسللين ومنها البنسلين ذات نفسه والأمبسللين والأموكسيللين...
2. مجموعة السيفالوسبورين ودى حلوة زى ما قلنا فى حالة الدمامل والخراريج ومنها السيفالكسين والسيفكزيم
3. مجموعة الماكروليد ومنها الاريثروميسين والكلاريثروميسين ودى بقى اشطه جدا فى حالة عدوى الجهاز التنفسى بالذات لما يبقى المريض عنده حساسية من البنسللين...معلش حد يدور لنا على موضوع حساسية البنسللين دا ويشاركنا...اعملوا حاجه بأ؟؟؟
4. مجموعة الكينولون ودى بتبقى قشطه طحن فى حالة عدوى الجهاز البولى والتنفسى ومنها الاوفلوكساسين والسيبروفلوكساسين
5. وفى مضادات حيويه تانيه زى ادوية السلفا و التتراسيكلين و الكلورامفينيكول ....حد يعرف الكلورامفينيكول بنستعمله امتى؟
• على فكرة احنا بنعرف اننا تعبانين لما درجة حرارة الجسم تزيد ونحس بالاعياء والكلام دا طبعا بيكون نتيجة المعركة الشرسة بين البكتيريا المؤذية دى وكرات الدم البيضا (المناعه) وبتكون نتيجة لهذه الحرب الشرسه جنود كرات دم بيضا وبكتيريا ميته الحاجات دى بتبقى سامه وهى اللى بترفع درجة حرارة الجسم بتقولك اصحى ...فوق ياعم...شوف اى حاجه تقدر على البكتيريا دى ....تقوم انت زى الشاطر تاخد مسكن لدرجة الحرارة ....برافو عليك والله فعلا صيدلى كوفاءه.....طبعا الكلام دا مينفعش المفروض انك بتاخد الانتى بيوتك المناسب زى ما فهمنا وبتاخد معاه مسكن وخافض لدرجة الحرارة مفيش مشكله
• أما بالنسبة للفطريات فمنها اللى بيصيب القدم ومنها اللى بيصيب الجلد (التينيا ) واللى بيصيب فروة الراس ويعمل قشرة واللى بيصيب العضو التناسلى للأنثى
الأدوية الموجوده للفطريات فى الصيدليه لو تلاحظوا هتلاقوا اخرها كلمة (زول) وموجوده على هيئة بودرة أو كبسولات أو محلول للجلدأو كريمات
اللى هم:-
1. كلوتريمازول ودا اللى هو الديرماتين واللوكاستين
2. ميكونازول ودا اللى هو الدكتارين والمويكونيز

جوه الموضوع فى 3 أسئلة....ورونى همتكم بأ....يلا عاوزين مشاركات كتييييييييييييييييييييير

[BoNbOoNa]

مش ممكن اللي بيحصل ده
جزاكم الله كل خير يا د\ أحمد ....موضوع هايل و باذن الله نشارك فيه

الأدوية الموجوده للفطريات فى الصيدليه لو تلاحظوا هتلاقوا اخرها كلمة (زول) وموجوده على هيئة بودرة أو كبسولات أو محلول للجلدأو كريمات
اللى هم:-
1. كلوتريمازول ودا اللى هو الديرماتين واللوكاستين
2. ميكونازول ودا اللى هو الدكتارين والمويكونيز

مممممممم ... تمام .... هلقي نظرة في الصيدلية ان شاء الله علي الحكاية دي

جوه الموضوع فى 3 أسئلة....ورونى همتكم بأ....يلا عاوزين مشاركات كتييييييييييييييييييييير

هشارك اكيييييييييد باذن الله و لكن آخر النهار لاني نازلة كمان شوية ان شاء الله
شكرا جزيلا د\ احمد ..... بالتوفيق في الماستر و الي الأمام دائما ...

[Sincerity]

مشكور دكتور احمد بجد مسابقه جميله جدا وبما انى درست ميكرو فالكلام ماشاء الله سهل وبسيط ومفهوم ..
بالنسبه لل 3 اسئله اللى موجودين ..



ماهى الحمى الروماتيزميه اللى بيعالجها البنسلين ؟؟


اللى اسمعه عنها ان تقريبا لما بيحصل احتقان ف اللوزتين ومش
بيتعالج بيحصل ان اللوز بتفرز حاجات بتسبب ضيق وتليف
لصمامات القلب وبتسبب الام مبرحه ف المفاصل ..





السؤال التانى كان عن حساسيه البنسلين ؟؟

قبل ما يتم حقن البنسلين لازم اعمله اختبار حساسيه لان من side effects
بتاعته انه بيعمل rashes و anaphylactic shock
وانا شفت اختبار الحساسيه ده بنفسى كنت بكشف عند الدكتور ايام الامتحانات
وطلبت من الممرض انه يعمله ادامى من باب العلم بالشىء
هوا اخذ تقريبا كميه صغيره جدا من الحقنه وحقنها ف ايد المريضه تحت الجلد
والحمد لله طلعت مش عندها حساسيه منه ..
اما بعض الحالات اللى بيبقى عندها حساسيه من البنسلين
وبياخدوا الحقنه بسعفهم علطول بحقنه ادرينالين ..





السؤال التالت الكلورمفينيكول بنستعمله امتى ؟؟

اللى اعرفه انى بستخدمه كعلاج وقائى للالتهاب السحائى
او بستخدمه لعلاج التيفود
بس ليه side effects وبيسبب bone marrow suppression
بينتج عنه aplastic anemia

يارب تكون الاسئله والاجابه صحيحه ..
وبشكر حضرتك يا دكتور انك خلتنى استعيد المعلومات دى تانى ...

[m_pharmacist89]

Rheumatic fever causes chronic progressive damage to the heart and its valves it can cause also endocarditis

Pathophysiology
ARF is a sequela of a previous group A streptococcal infection, usually of the upper respiratory tract. One beta-streptococcal serotype (eg, M types 3, 5, 18, 19, 24) is linked directly to ARF. Two vaccines—one that is 26-valent and likely to proceed into clinical trials—are based on the M protein characteristics of responsible subtypes.
Good evidence suggests that there is genetic susceptibility to development of the disease.
Non–group A streptococci has never been shown to cause this disease.
The disease involves the heart, joints, central nervous system (CNS), skin, and subcutaneous tissues. It is characterized by an exudative and proliferative inflammatory lesion of the connective tissue, especially that of the heart, joints, blood vessels, and subcutaneous tissue.

-----
ESR (Erythrocyte sedimentation rate
واحد من التحاليل التى تطلب احيانا عندما يشك الطبيب فى وجود التهاب معين وهذا التحليل لا يشخص الحمى الروماتيزمية ولكنه يشخص الالتهابات الناتجة عنها

القيم الطبيعية
1st hour up to 10mm/hr
2nd hour up to 25mm/hr

Strep throat is the most common bacterial cause of sore throat. Because strep throat can occasionally lead to rheumatic fever, antibiotics are given. Strep throat often includes a fever (greater than 101 degrees Fahrenheit), white draining patches on the throat, and swollen or tender lymph glands in the neck. Children may have headache and stomach pain

[a_elkamhawy]

مشكور دكتور احمد بجد مسابقه جميله جدا وبما انى درست ميكرو فالكلام ماشاء الله سهل وبسيط ومفهوم ..
بالنسبه لل 3 اسئله اللى موجودين ..



ماهى الحمى الروماتيزميه اللى بيعالجها البنسلين ؟؟


اللى اسمعه عنها ان تقريبا لما بيحصل احتقان ف اللوزتين ومش
بيتعالج بيحصل ان اللوز بتفرز حاجات بتسبب ضيق وتليف
لصمامات القلب وبتسبب الام مبرحه ف المفاصل ..





السؤال التانى كان عن حساسيه البنسلين ؟؟

قبل ما يتم حقن البنسلين لازم اعمله اختبار حساسيه لان من side effects
بتاعته انه بيعمل rashes و anaphylactic shock
وانا شفت اختبار الحساسيه ده بنفسى كنت بكشف عند الدكتور ايام الامتحانات
وطلبت من الممرض انه يعمله ادامى من باب العلم بالشىء
هوا اخذ تقريبا كميه صغيره جدا من الحقنه وحقنها ف ايد المريضه تحت الجلد
والحمد لله طلعت مش عندها حساسيه منه ..
اما بعض الحالات اللى بيبقى عندها حساسيه من البنسلين
وبياخدوا الحقنه بسعفهم علطول بحقنه ادرينالين ..





السؤال التالت الكلورمفينيكول بنستعمله امتى ؟؟

اللى اعرفه انى بستخدمه كعلاج وقائى للالتهاب السحائى
او بستخدمه لعلاج التيفود
بس ليه side effects وبيسبب bone marrow suppression
بينتج عنه aplastic anemia

يارب تكون الاسئله والاجابه صحيحه ..
وبشكر حضرتك يا دكتور انك خلتنى استعيد المعلومات دى تانى ...

بسم الله ماشاء الله عليكى ميه ميه والاجابات فى الجووووووووووول

[Sincerity]

بسم الله ماشاء الله عليكى ميه ميه والاجابات فى الجووووووووووول

ميرسى يا دكتور ربنا يخليك ..
أخجلتم تواضعنا ..
منتظرين المسابقه الجايه ان شاء الله ..

[BoNbOoNa]

طبعا مفيش كلام يتقال بعد كلام فلة .... جزاكم الله جميعا كل خير

[محمد_على_سلام]

شكرا لحضرتك يا دكتور احمد وجزاك الله كل خير على المعلومات القيمة الجميلة والشرح المبسط

[احمد شبند]

جزاكم الله خيرا يا دكتور

منتظرين المقال القادم

[حنين الأمس]

جزااااااااااااك الله ألف خير يا د/أحمد
والشرح جمييييل ومبسط جداااا
وفي انتظار الموضوع التالي