جربت قبل كده تعمل ctrl+z
[جربت قبل كده تعمل..
CTRL+Z؟!
تقريبا ده واحد من أجمل الاختراعات اللي في الدنيا كلها.. آه والله!
"شوف يا كابتن.. إنت أصلا ماتسواش بصلة.. لأ بصلة كتير.. إنت ماتسواش عود جرجير دبلان.. لا برضه كتير.. إنت ماتسواش جوافاية معطبة.. إنت ولا حاجة.. إنت نكرة.. إنت بتاع عاملة زي البتاعة اللي مالهاش تمن أو قيمة.. إنت إنت ولا إنتش داري!"
تؤ تؤ.. كتير قوي كده عليه.. طيب اديها CTRL + Z وبعدين لما أهدأ أبقى اكتب له حاجة تانية..
"الخاين الـ... الـ... الـ.....!"
***حصل لك الموقف ده قبل كده...
كنت بتكتب على الكمبيوتر رسالة غاضبة لواحد ولا لواحدة صاحبتك.. رسالة بتكتبها وإنت قلبك "قايد نار".. رسالة بتكتبها بحبر الغضب -مع إنه مافيش حبر في الكتابة على الكمبيوتر!- وجوه عروقك بتجري كرات الانفعال والضيق والخنقة بدل من كرات الدم البيضا والحمرا..
وبعدين لقيت إن الكلام اللي هتكتبه والأفعال اللي ممكن تعملها وإنت غضبان هتكون عواقبها وخيمة جدا.. وممكن تزود من اشتعال النار.. وتؤجج -يعني تشعلل!- من لهيبها.. فقررت إنك تمسح الكلام ده بضغطة على CTRL + Z.. هوب وفي لحظة واحدة اختفى الكلام الناري وبقت الصفحة بيضا زي ما كانت في الأول.. شوية بشوية هتهدأ.. وبالك هيروق.. وقدرتك على الكتابة بانفعال مظبوط هتكون أكتر.. عرفت بقى إن CTRL + Z واحد من أهم الاختراعات في الدنيا لأنه بيعطيك فرصة للتحكم في غضبك وللتراجع في أفعالك..
بس السؤال هنا..
ياترى يا هل ترى جربت إنك تستخدم الأمر CTRL + Z ده في حياتك العملية قبل كده..
ولاّ كل ما تيجي تجربه تكون زراير الكيبورد معلقة فمش بيتشغل معاك؟
***قبل ما تجاوب على السؤال..
خلينا نتفق مع بعض الأول إن CTRL + Z دي رغم إنها سهلة جدا وبتيجي بضغطة زرارين في وقت واحد.. إلا إنه من الصعب إن الواحد يعملها..
لاحظ إننا بنقول إنه من "الصعب" مش من "المستحيل"..
يعني عشان تعمل CTRL + Z لازم تكون على قدر كبير من التحكم في أعصابك..
وقادر إنك تروض غضبك زي ما مدرب الأسود بيعمل كده مع الأسد "تيجانا" لما يهيج والغضب والشر يظهر في عينيه..
طبعا ده صعب.. صعب جدا..
ومش بيقدر عليه ولا حتى أكثر الناس قوة من الناحية الجسمانية..
وعشان كده سيدنا "محمد" -عليه الصلاة والسلام- قال في حديث شريف:
"ليس الشديد بالصرعة وإنما الشديد الذي يملك نفسه عند الغضب" (رواه أبو هريرة..)الجامد مش اللي يضرب ويطيح في الناس بطشا واللي يترك الغضب يتحكم فيه وفي ردود أفعاله..
مطلقا..
الجامد والقوي بجد هو اللي يتحكم في نفسه وقت الغضب..
لأنه في وقت الغضب لا يدري عادة الإنسان ماذا يقول أو ماذا يفعل..
طبعا الغضب مشروع.. وحق كل واحد بيجري في عروقه دم أحمر ساخن..لكن الاستفادة من الغضب ده.. برضه أمر مشروع..
وإحاطة الغضب ده ووضعه في مكانه الصحيح أمر ضروري..
لاحظ بأن الغضب غالبا ما بينقلب على صاحبه..
يعني حتى إسرائيل لما عملت فيها سبع البرمبة وتمكن منها الجنون والغضب بعد اختطاف حزب الله لجنديين إسرائيليين تصورت أنها لما تحارب وهي بهذا الشكل الفاقد للعقل وللمنطق ستنتصر.. وهذا لم يحدث طبعا..
وما حدث في الأردن وما حدث من قبله في مصر والمغرب والسعودية وغيرها من الدول العربية وربما يحصل منه أكتر كمان من ردود أفعال غاضبة تؤدي إلى مقتل واحد ولا اتنين ولا حتى عشرة ولا عشرين من الأجانب أو غيرهم.. عمرها ما تحل قضية أو توصل بيها لنتيجة..
بل بالعكس ده بيعقدها أكتر.. مش هنقول كلام مكرر ومعاد عن منظرنا قدام الغرب إلى آخرة هذا الكلام الكبير.. لآ احنا بنتكلم عن منظرنا قدام نفسنا.. عن علاقتنا بينا وبين ربنا..
وإذا كان الرسول الكريم أمرنا بالتحكم في الغضب بل ويروى أنه –أي الرسول الكريم- ظل معتزلا لقاء أصحابه لفترة من الوقت حتى احتار أصحابه في ذلك ولم يعرفوا السبب إلا بعد أن خرج عليهم وقال لهم:
"لا تلقوا في أذني ما ينفرني من أصحابي فأنا أحب أن أخرج عليكم وأنا سليم الصدر" (رواه البخاري)
والمعنى واضح.. كان البعض يقول للرسول ما لا يحب فاعتمل الغضب بداخله من هذا السلوك -أي النميمة ونقل الكلام- فقرر ألا يخالط أصحابه حتى يزول تأثير هذا الغضب.. إذا كان هذا هو حال النبي، فلماذا إذن نحن لا نقتدي به في الأفعال والسلوكيات.. في كل حياتنا اليومية.. في تعاملاتنا مع الأسرة والأصدقاء والأقارب.. وحتى في التعامل مع الأجانب والغرباء..؟
لماذا لا نحاول..أن نروض غضبنا وأن نحسب له حسابات وأن نفكر في النتائج التي سيخلفها كلامنا والأفعال المدهونة بنار الغضب هذه..؟
لماذا لا نجرب..أن نستخدم CTRL + Z وأن نعيد التفكير بهدوء في الأمر بعد أن يكون الغضب قد زال وانتهى؟
لماذا..
دوما نتحكم في مشاعرنا الطيبة فلا نظهر ودا أو رحمة أو حبا للآخرين إلا بقدر محدود بينما نفتحها ع البحري ونجيب ع الرابع إذا كان الأمر مرتبطا بمشاعر غضب وكراهية؟
أسئلة إجابتها عندكم أكيد..
اكتب براحتك بس من غير ما تستخدم CTRL + Z!
رد مع اقتباس
