الزواج من اجنبية
انهاردة سمعت خبر عن خطف ابناء رجل مصرى لصالح والدتهم الاجنبية الى كانت مقيمة فى مصر ولكن تم الانفصال بعد خلافات حادة
والموضوع دا خلانى افكر لية واحد مصرى شرقى يروح يرتبط بواحدة اجنبية هل دا طبيعى ؟
المفروض اللى اعرفة ان الانسان قبل ما بيفكر يختار زوجة بيختار ام لاولادة طبيعى انة يختار واحدة اتربت على افكار وعادات مختلفة؟
تفتكروا ان الزواج دا ممكن يكون ناجح على المستوى الاسرى والاجتماعى؟
احب اعرف رأيكم
أولا هو الرسول صلي الله عليه وسلم وضع القواعد اللي الشاب بيختار علي أساسها شريكة حياته
وقال " فاظفر بذات الدين تربت يداك "
ثانيا بقي :
انا مش عارف ليه ده يحصل أصلا
هو من قلة البنات الكويسين في مصر ؟
طب علي الاقل البنت في مصر عارف متربية علي ايه وعاداتها وتقاليدها
انما اللي جايبها مستوردة دي متعرفش عنها حاجة!!!
غير كده حاجة زي دي بتساهم في زيادة مشكلة العنوسة في المجتمع
اللي هي مش ناقصة أصلا!!
والمشكلة دي بتطول بنتي أو أختي أو قريبتي!!
اقوم انا بقي اروح اتجوز أجنبية عشان ابقي خدت شرف المساهمة في المشكلة دي ؟!!!
بصراحة الموضوع ده عجبنى وعجبنى مناقشته لانى اعرف ناس كتير عايشه الموضوع ده ووجهة نظرى انه مش لازم الانسان يطاوع نفسه ويتجوز من اجنبية حتى لو حبها لان بسبب الاختلاف فى العادات والتقاليد بعد فتره بتمل من العادات والتقاليد دى وبتميل لعاداتها اللى بتختلف عنا وفى حالة وجود اطفال بتكون الاطفال بعادات ممتزجه مشتركة ولو لقدر الله حصل انفصال بتكون المشكلة الاخطر الاطفال هتعيش مع مين مع الاب ام الام الاجنبية مشكلة كبيرة
كلام جميل وانا متفقة معاكم جدا بس احب اشوف رأى باقى الناس ولو حد شايف تجربة حية ياريت يقولنا
اولا شكرا على الموضوع الحيوى ده واللى يخص بالاكتر المناطق السياحية زى الاقصر بالذات علشان ليا اصحاب حاكولى على الاوضاع هناك عندهم اولا دى مشكلة اقتصادية طبعا الشاب هناك بيتجوز ومراته تبعتله فلوس او تبعت تاخده ((( تخيلوا تتجوز واحدة وتسافر بلد تانية وانت هنا علشان تبعت فلوس او تبعت شغل ))) حاجة بجد تحزن ..... النقطة دى حبيبت اتكلم عليها علشان اتحكى ليا الوضع ده .
اما لو كان الموضوع عبارة عن جواز عن حب يعنى فيه استقرار طبعا المشاكل لاتنتهى بداية من العادات المختلفة بالاكيد بينا وبين الاجنبية اما لو حصل انفصال وفيه اطفال هما اللى بيدفعوا الثمن ....
يعنى بيقى فى الغالب ازمة اقتصادية
طيب شوفوا ده (((( للاسف ))))) سمعت عندنا فى بلدنا ان واحد سافر امريكا وعلشان ياخد الجنسية لازم يتجوز هناك لازم يطلق لو كان متجوز هنا ويتوثق فى السفارة فالاخ ده اتفق مع مراته انهم يطلقوا كده وكده ((( شفت الاعيب))) وفعلا اتطلقوا واتوثق العقد واتجوز الامريكية وكل شهر يبعت لها فلوس
طبعا الجوازات اللى زى دى مش بتستمر
عذرا على الاطالة تقبلوا تحياتى
برده أنا سمعت عن حالة كدة , شخص سافر فرنسا و تزوج هناك و سايب أصغر أولاده آخر مرة شافه أيام ما كان نونو لسة مولود ..
سافر تزوج هناك و ارتاح على عيشة هناك واحدة بتصرف عليه .. و بيبعت كل شهر فلوس ( باليورو ) لزوجته المصرية تحولها و تصرف منها ..
و أصلا زوجته قالت ماعادتش عايزاه يرجع ..
عمر الرجل العربي في رأيي ما يتزوج واحدة أجنبية الا لو كان عايز يستغل فلوسها أو ياخد الجنسية .. دة في 99% من الحالات ..
ممكن لو هي هتدخل في الاسلام و عايز يكسب فيها ثواب .. بس دي حالة نادرة ..
عموما بيكون طبعا نتيجة هذا الموضوع مش كويسة , و بتروح تخطف الأولاد و تسافر و يقعد يدور و في ناس كتير بتندم جداااا بعد كدة لأن مش بيقدر يلاقي قوانين تخدمه انه يلاقي ولاده ..
ليه يعمل كدة في نفسه ؟؟
الفلوس مش كل حاجة ..
اكيد انا متفقة معاكم ان معظم الجوازات دى بيكون لمصلحة زى الجنسية او الشغل او ان الجواز من اجنبية اقل فى التكلفة
فية حاجة تانية لفتت نظرى اوى ان فية ناس يوم ما يفكر فى بنت بلدة تبقى جريمة لوسمع انها اتكلت مع ولد قبلة او انها تكون عرفت حد قبلة لكن نفس الشخص لوفكر فى فى اجنبية كل دا بيشيلة من حسباتة نفسى اعرف اية السبب لوحد عندة اجابة ياريت يعرفنى يعنى
وحتى لوالارتباط دا عن حب طيب عادى انه ممكن يتطمن على اولادة مع ام اتربت على افكار عكسنا تماما
وياترى العائلات المصرية ممكن تتقبل الانسانة دى زوجة لابنهم ويحدث نوع من الانسجام العائلى؟؟؟؟؟؟؟؟؟
انا مستغربة جدا لان فعلا عدد مشاهدات الموضوع بتزيد بطريقة ملحوظة لكن مش عارفة ليه الناس مش عاوزة تقول رأيها
المشاركة الأصلية كتبت بواسطة رحيق الجنة
عادي يا دكتورة ولا تستغربي ولا حاجة
الحكاية دي منتشرة في جميع دول العالم
جديلة , طلخا والجلاء
ههههههههه
بس عموما الحكاية ان ممكن حد يعجبه الموضوع ويدخل يقرأ ويستفيد بس ميكونش عنده حاجة يقولها
بس المفروض انه يشارك حتي ولو بكلمة شكر او ابتسامة أو أي حاجة تعبيرا منه علي تقديره للموضوع
تقبلي مروري
اعتقد ان الراجل إللي بيتجوز اجنبية بيبقى بيبحث عن مستوى ثقافي أعلى
لأن المرأة العربية مها زاد مستواها العلمي برضو بيبقى مستواها الثقافي في حاجات كتير قليل
غير عادات و تقاليد بالية بتفضل متمسكة بيها .. هي و اهلها .. بتخنق الراجل
.,,
ضوابط المشاركة
رد مع اقتباس