البنت اخرتها الجواز كفاية كده,,,

[dano_90]

مجتمعنا الحلو العسل ده بوشين .. ..قديمه يعني مش جديده..شفتوا أي تجمع عائلي موجود فيه ولد و بنت صغيرين؟؟ اول حاجه بيقولوها للولد ايه ..عايز تطلع ايه يا حبيبي لما تكبر..نص العيال المفترية بتقول ظابط و اللي عنده وعي شوية يمكن يقولك رئيس جمهورية ..جيل المستقبل بأه يا سيدي عنعمل ايه؟...طب و البنوته الصغيره بيقولولها ايه؟؟؟...نجوزك حماده يا سوسو لما تكبري ..والا تتجوزي ابيه خالد؟؟...تبص البت بغباء كده و تقولهم ..أناهاتجوز بابا . .و الكل يتفتح في الضحك و يخلص الموضوع على كده



و تطلع البنت من صغرها عروسة ..تسرحها و تلبسها الفرحه و تزفها ...و اي بنت في اي مجتمع تلاقي اول لعبه نفسها تلعبها ...عروسة و عريس !!! بالمعنى الطفولي مش بتاع الجامعات الخاصة و الورق العرفي
و تمشي البنت في سلك التعليم و كل اما تنجح في مرحلة ما يقولولها ..مبروك عقبال مانشرب شرباتك...وعقبال عدلك يا حبيبتي ..و لما تيجي تستشير حد في الكليه اللي هتدخلها بيبقى الرد الموحد ...يا ستي ماتشغليش بالك ..هي البنت آخرتها ايه غير بيت جوزها
و تفضل البنت تتشحن تتشحن طول حياتها على ان الشئ الوحيد المتوقع منها في الحياة انها تتجوز و تجيب عيال .....طب و لو ماحصلش


شوفوا معايا التلات حوارات دي




م1:هو انت معاكي ايه دلوقت؟؟
م2: معايا جوزين غوايش و ماشاءالله
م1:لأ يعني معاكي عيال ايه
م2: ل انا لسه ماتجوزتش
م1: يا عييييييني
---------------



بيئة تانية و مستوى تاني
م1: وانت معاكي ايه دلوقتي
م2:معايا ماجستير و باحضر في الدكتوراه
م1:لأ قصدي معاكي عيال ايه؟
م2: لأ انا لسه ماتجوزتش
م1: يا عيييييييني
---------------



بيئة تالته و مستوى تالت
م1: وانت معاكي ايه دلوقت
م2: انا معايا شيروكي 4*4
م1: لأ قصدي معاكي تشيلدرين ايه؟
م2:نو ..أنا لسه ماتجوزتش
م3:أوه ماي جود ..هاااانييييي

هو هو الحوار في كل المستويات ..ولا يوجد اي نجاح في اي مجال يقدر يحل محل الزواج بالنسبة للبنت الشرقية...طب و اللي مش لاقيه و اللي فاتها القطر و اللي بارت على رأي الناس مابتقول ...يبقى مالهاش لازمة ..تروح تولع في نفسها يعني؟؟

هي غالبا ما بتبقاش مستعده لا نفسيا و لا علميا و لا اقتصاديا لللحظه دي ..كل الناس بيقولولها هتتجوزي يعني هتتجوزي ..و ساعة لما مايحصلش .مابتلاقيش حواليها غير نفسها و بس

بعد مالنسبة زادت و بقى عدد اللي لسه قاعدين بالملايين..لازم كل البنات يحبوا نفسهم و يدوروا ع النجاح في كل الأماكن و يعيشوا حياتهم على انها حياتهم مش على أساس انها تتر لمسلسل لسه مابتداش



ولازم المجتمع يبطل يحصر البنت في دور العروسة و بس ..لأنه وقت الجد مش هيقدر يعملها حاجه و هيبقى هو اللي جنا عليها لأنه فهمها ان ده الطريق الوحيد و مافيش غيره..و هتحس ساعتها ان مالهاش لازمه و انها صفر ع الشمال,,

//

هااااااا رأيكم ايه??آخرة البنت الجواز ؟؟

[Joker]

موضوع مهم وخطير فعلا يا دانو وكلامك مظبوط مية في المية
ربنا قال في القراّن الكريم " وخلقناكم من ذكر وأنثي" مش من ذكر بس ولا انثي بس بمعني ان الاتنين يسيران علي قدم المساواة ولما سبحانه وتعالي وضع مقياس للتفضيل قال جل شأنه " إن أكرمكم عند الله أتقاكم " ولم يحدد سبحانه وتعالي -وهو العدل- ان الكرامة او التقوي خاصة بنوع علي حساب الاخر
ومجتمعنا شارك بطريقة فاعلة في ترسيخ فكرة الانحياز لجنس علي حساب الاخر حتي في الاحاديث النسائية التي تطالب بتحرير المرأة يرسخون هذه الافكار الانحيازية دون أن يدروا
نيجي بقي للرجالة اللي عايزين يصلحوا الموضوع نلاقيهم هما كمان بيعززوا التمييز بين الرجل والمرأة بأنهم مثلا يقولوا نخلي للمرأة مقاعد معينة في البرلمان , لا نخلي للمرأة حصة من تعيينات المصلحة الفلانية
هي المرأة أساسا من حقها انها تتعين في المصلحة الفلانية او تقعد في البرلمان أصلا
مش مستنية حسنة من حد وكأنهم بيعطوها شئ تشكرهم عليه
الفكرة في الموضوع الفهم الانساني للقضية مش المادي يعني الراجل يحس ويتأكد ان المرأة فعلا نص المجتمع مش كده بس , دي نص المجتمع المسئول عن بناء النصفين معا
تخيلوا بقي ان الي بيبني النصين مع بعض يبقي كل همه وكل اللي شاغل باله هتجوز امتي ولا هتجوز وللا لا
وياريت والله يا بنات المنتدي الكرام تاخدوا بالكم من نفسكم شوية "أكيد مش في اللبس يعني هههههه"
اقصد ان البنت لازم يكون ليها احلامها وطموحاتها وعشان تقدر توصللها لازم تثقف نفسها وتجدد من فكرها وتهتم بمواضيع تانية غير المواضيع القديمة بتاعة الموضة والكلام ده
بجدد شكري ليكي دانو علي طرح الموضوع المهم ده
تقبلي مروري

[sekoseko]

اكيد كل بنت دلوقتى ليها احلام و طموحات كتير غير الجواز ... و اعتقد ان معظم الاهالى الايام دى بيقدروا ده وبيشجعوا البنت كمان انها تهتم و تنجز فى مجال دراستها و فى مجال عملها كمان

اعتقد فكرة ان دور البنت يقتصر على الجواز دى كانت الفكرة المنتشرة زمان ... ساعتها كان ممكن الراجل يجوز بنته لواحد هى عمرها ما شافته و ممكن تكون مش موافقة عليه بس متقدرش تقول لأ و الاب بيوافق لمجرد ان العريس جاهز و مش هيكلفه اى حاجة ... لكن دلوقتى البنت تقدر تقول لأ و تقدر تعبر عن رأيها و عن وجهة نظرها من غير خروج عن حدود الادب و الاحترام .. يعنى ليها فعلا مساحة من الحرية عن قبل كده ... و الحرية دى شملت حاجات كتير تانية اثبتت فيها البنت ان هى ممكن تبقى احسن من الولد فى مجالات معينة ... و طبعا لا ننكر ان فى مجالات معينة برده ماينفعش البنت تشتغل فيها و الولد بس هو اللى يقدر يقوم بيها

انا هقولكم على قصة حقيقية و حصلت فعلا ... القصة عن دكتورة زميلة ماما ... الدكتورة دى للأسف متجوزتش على الرغم من انها طيبة جدا بس هو ده النصيب بس قدرت ان هى تنجح فى شغلها و تخليه هو اساس حياتها و قدرت فعلا تتغلب على مشكلتها ....... و مش كده و بس ده على الرغم من انها متجوزتش الا انها وفقت بين ناس كتير اوى و جوزت ناس كتير و اد ايه بتبقى فرحانة لما توفق اتنين مع بعض و يتجوزوا ... هى دلوقتى بمثابة الام ليهم لان ليها الفضل الاكبر فى جوازهم و هى طبعا بتعتبرهم زى اولادها اللى هى مخلفتهمش
انا اعتقد لو واحدة مكانها و متجوزتش فعلا كان هيبقى جواها حقد و غل لكل اللى حواليها ... اى نعم الاحساس ده هيبقى بسبب جرح كبير جواها ... بس شفتوا ازاى بجد الواحد ممكن يتغلب على اى شعور مش حلو جواه بانه يعمل خير و يعوضه فى ناس تانية و يشوف الفرحة فى عيونهم و يفرح هو كمان عشانهم مش يحقد عليهم

شكرا كتير كتير يا دانو على الموضوع الحلو ده ... و بجد كل مواضيعك تحفة
ربنا يخليكى للمنتدى
*

[Anas]

أنا شفت الكلام ده فين قبل كده ... فين قبل كده فييييييييييييين

مش فاكر بالضبط ... بس هو كان من د/ غادة عبد العال اللي استضفناها في الجمعية العلمية في الكلية في ندوة في الترم الاول .. مش فاكر بقى كنت قرأته في الكتاب ولا على المدونة

بغض النظر عن اللي فات ... هو كلام منطقي الى حد ما

و الكلمة رغم انها بتطلع بتلقائية شديدة لان الناس خلاص ترسخت في أذهانهم ان هي آخرتها كده " ربنا يحسن آخرتنا جميعا "

حتى مثلا لما يكون واحدة شايلة ابنها و هو لسه مولود كده اللي حواليها يقولو ... يا رب نشوفك دكتور ... لا ظابط ... و كده
انما لو بنت ... هي كلمة واحدة ... يا رب نشوفك عروسة ... مفيش حل تاني

و دي الطبيعة اللي ربنا خلقنا عليها ... و اللي يرفضها أو مش قادر يتقبلها يبقى عنده حاجة مش مظبوطة

انما اللي مش طبيعي هو ان الناس توقف حياتها على كده ... يعني ياكده يا اما تبقى البنت فيها عيب أو ناقصها حاجة ... لا أبدااااااااا

عمرها ما تتحسب بالمنطق ده أبدااااااااااااا

و ان شاء الله ليا عودة للكلام ده بعد الامتحانات ... بس هي تخلص

[احمد شبند]

كل ده على شان احنا مش بنفكر غير فى ننفسنا

لازم يكون فى هدف فى الحياة

لكن تجبر وتتعلم وتيجيب عيال وتموت وزى ما جيت زى ما رحت يبقى اكيد البنت اخرها الجواز

لكن لو الهدف كبييييييير يبقى مش هناقش موضوع زى ده اصلا

[dr_orchida]

الموضوع حلو يا دانو تسلم ايديكي
وتناول موضوع حيوي فعلا
بس والله الموضوع ده قل كتير الايام دي
علشان مجتمعنا تحضر اخيرا وفهم اهمية المراه عموما في المجتمع
(ايه الكلام الكبير اللي انا بقوله ده؟!)ههههههههه
وثانكس مرة تانية علي التوبيك الرائع ده

[N!CE_@ngel]

تسلمي يا دانو
هو فعلا في ناس كتير تفكيرهم لسه كده
بس مش كلهم لان افكار الناس اتغيرت و كمان
مافيش اي مجال مافيهوش بنات بيشتغلوا وانا شايفه
ان في مساواه بس المهم اصلا البنت ان ما يكونش
هو ده هدفها الاول والاخير وشايفه ان الحياه بس انها تتجوز
وتخلف وخلاص لازم يكون لها هدف انها تحقق حاجه مش
معني ان الراجل هو اللي بيصرف انه هو اللي يشتغل
شكرا يادانو مره تانيه علي الموضوع الجميل
وان شاء الله هنفرض نفسنا اكتر علي المجتمع
ونقعد الرجاله شويه نريحهم من الشغل

[Joker]

وان شاء الله هنفرض نفسنا اكتر علي المجتمع
ونقعد الرجاله شويه نريحهم من الشغل

والله لو نيتكم كويسة وعايزين تقعدونا عشان تريحونا ماشي

انما بقي لو حاجة تانية

[SHYMAA]

شكرا دانو على الموضوع الحيوى جدا ده
بس انا شايفه ان فعلا الحكايه دى قلت اليومين دول
يمكن علشان بقى فى انفتاح اكتر
وكمان مش كل البنات لسه بتفكر فى الجواز وبس
حصلنا على مستويات علميه كبيره جدا
ونزلنا برده اشتغلنا فى كل المجالات
ما بقاش عندنا وقت حتى نفكر فى حكاية الجواز
يعنى جت ما جاتش مش هتفرق كتير فى حياتنا
بس اكيد كل واحده فى الاخر
نفسها فى فستان فرح وزفه وكوشه والحاجات دى
بس لما تفضى بقى

[Mahmoud_Seif]

اولا شكرا ليكي كتير يادوك علي التوبيك ده.....

الاسلام وضح دور المراه كويس اوووووي ومابخسش حقها في اي حاجه .......

دي نص المجتمع المسئول عن بناء النصفين معا
تخيلوا بقي ان الي بيبني النصين مع بعض

كلام جميل يادوك وزر ماحضرتك قلتي انها اللي بتبني النص التاني..... طب بتبنيه ازاي ؟؟؟؟؟؟

في بيتها ....... يعني اكبر نجاح تحققه في حياتها ايوه اكبر نجاح انها تعرف تربي اولادها صح وتربي فيهم الاخلاح الكريمه عشان لما يكبروا يقدروا ينفعوا...... عشان كده الجمله دي ترسخت في عقول كل الناس ....وده طبعا مايمنعش ان البنت تكون متعلمه ومثقفه وتكون علي وعي بكل الاحداث اللي بتحصل حواليها ..... اما بقي اذا كان هدفها في حياتها انها تكون شخصيه جامده في منصب جامد في المكان الفلاني فده اكيد هاياثر علي حياتها وبيكون في تقصير في البيت ......

اما اللي ربنا ماقدرلهاش انها تتجوز فده نصيبها وده اكيد خير ليها من ربنا وتقدر برضه تبني وتربي بانها تعلم اللي حواليها كل حاجه كويسه ........تقبلوا مروري ..


لكم سلاماتي .